‘Onra bu pai ku bu mai, pa bu vive txeu ténpu na téra ki Jeová, bu Deus, sta ta da-u’. — Êxodo 20:12, Tradução do Novo Mundo.

 Deus fla kes israelita na ténpu antigu pa onra ses mai ku ses pai. Kantu el da-s kel órdi li, el faze-s un promésa, nton es tinha más un motivu pa es obi ku kel órdi. Nbóra na nos ténpu, kristons ka meste obi ku kel lei di Muizés, ki éra kel lei ki Deus da pa kes israelita, prinsípius di Deus ka muda. Kel lei di Deus ten bazi na prinsípius ki inda ta sirbi pa nos. — Colossenses 3:20.

 Fidjus, pikinoti ku grandi, ta mostra ma es ta onra ses mai ku ses pai óras ki es ta ruspeta-s i obi ku es. (Levítico 19:3; Provérbios 1:8) Mésmu óras ki fidjus bira grandi i es ranja ses própi família, es debe kontinua ta ama ses pai ku ses mai. Pur izénplu, es debe kuida di ses pai ku ses mai óras ki dja es sta di idadi, i ti da-s dinheru ô otus kuza ki es meste. — Mateus 15:4-6; 1 Timóteo 5:4, 8.

 Repara ma fidjus di israelitas tinha ki onra es tudu dôs, ses pai ku ses mai. Kel-li ta mostra ma mai ten un papel inportanti na família. (Provérbios 6:20; 19:26) Fidjus di oji debe faze mésmu kuza.

 Kel órdi di onra mai ku pai sénpri tevi limiti. Kes fidju di israelitas ka tinha ki obi ku mai ku pai ô ku kalker otu algen, si pa kel-la es tinha ki dizobidese Deus. (Deuteronómio 13:6-8) Oji tanbê kristons debe ‘obi ku Deus antis di obi ku ómis’. — Atos 5:29.

 Na kel lei ki Deus da Israel, el promete ma kes fidju ki ta onraba ses pai ku ses mai ‘ta viveba txeu ténpu i kuzas ta koreba es dretu na kel téra’ ki Deus da-s. (Deuteronómio 5:16) Si kes fidju ki dja staba grandi, ta obiba ku lei di Deus es ka ta sufreba kes kastigu éra pa kes ki rabelaba kóntra ses mai ku ses pai. (Deuteronómio 21:18-21) Kes prinsípiu ki sta na kes lei inda ta aplika na nos ténpu. (Efésios 6:1-3) Ô nos é jóven ô dja nu sta grandi, nu ten ki presta kónta pa nos Kriador. Deus ka ta fadja ku se promésa. Kes algen ki obi ku el, ku ses mai i ku ses pai ta ben vive pa txeu ténpu. Na verdadi, es ten speransa di vive pa tudu ténpu. — 1 Timóteo 4:8; 6:18, 19.

 Kel órdi ki sta na Êxodo 20:12 é un di kes primeru órdi ki sta na kes 10 mandamentu. (Êxodo 20:1-17) Kes mandamentu ki ta fika antis di el, ta pâpia sobri kes obrigason ki kes israelita tinha ku Deus, sima nisisidadi ki es tinha di adora sô el. Kes mandamentu ki ta fika dipôs di el, ta pâpia sobri kes obrigason ki kes israelita tinha ku kunpanheru, ki ta inklui kel mandamentu di ser lial pa ses maridu ô mudjer i ka furta. Pur isu, kel mandamentu di ‘onra bu pai ku bu mai’ ta sirbi dretu pa liga kes dôs tipu di mandamentu ki ta fika antis i dipôs di el.