Livru di Apocalipse ta fla ma Babilónia Grandi é tudu kes relijion falsu di mundu. Kes relijion li ka ten aprovason di Deus. a (Apocalipse 14:8; 17:5; 18:21) Sikrê kes relijion li ten alguns kuza diferenti di kunpanheru, di un manera ô di otu es tudu, es ta afasta pesoas di kel Deus verdaderu, Jeová. — Deuteronómio 4:35.

Modi ki nu pode sabe kuzê ki é Babilónia Grandi

1.   Babilónia Grandi é un sinblu. Bíblia ta mostra ma el é un ‘mudjer’ i un ‘grandi prostituta,’ i se nómi é un ‘mistériu, “Babilónia Grandi.”’ (Apocalipse 17:1, 3, 5) Dja ki livru di Apocalipse ta pâpia di txeu ‘sinal’, nu pode fla ma Babilónia Grandi é un sinblu. El é ka un mudjer di verdadi. (Apocalipse 1:1) Alén di kel-li, el ‘sta xintadu riba di txeu agu,’ i kel-li ‘ta reprizenta povus, monti di algen, nasons i línguas.’ (Apocalipse 17:1, 15) Un mudjer di verdadi ka ta pode faze kel-li.

2.   Babilónia Grandi ta reprizenta un organizason di mundu interu. El ta txomadu di ‘kel sidadi grandi’ ki ten un reinu ki ta governa kes rei di Téra. (Apocalipse 17:18) Nton, el é un organizason ki ta influensia mundu interu.

3.   Babilónia Grandi é un organizason relijiozu, ka un organizason pulítiku nen di komérsiu. Na kel antigu sidadi di Babilónia, es éra txeu relijiozu i es éra konxedu pa ses ‘nkantamentu’ i ‘fitisaria’. (Isaías 47:1, 12, 13; Jeremias 50:1, 2, 38) Na kel sidadi li, es ta adoraba deuzis falsu, i kel-li ka ta agradaba kel Deus verdaderu, Jeová. (Génesis 10:8, 9; 11:2-4, 8) Kes governanti di Babilónia éra orgulhozu i es ta atxaba ma es éra más midjór di ki Jeová i se adorason. (Isaías 14:4, 13, 14; Daniel 5:2-4, 23) Di mésmu manera, Babilónia Grandi é konxedu pa kes ‘bruxaria ki el ta faze.’ Kel-li ta mostra ma el é un organizason relijiozu. — Apocalipse 18:23.

    Babilónia Grandi ka pode ser un organizason pulítiku, pamodi ‘kes rei di Téra’ ta lamenta se distruison. (Apocalipse 17:1, 2; 18:9) Nen el ka ta reprizenta komérsiu, pamodi Bíblia ta mostra ma el é diferenti di kes ‘komersianti di Téra’. — Apocalipse 18:11, 15.

4.   Babilónia Grandi ta reprizenta relijion falsu. Envês di djuda pesoas ten un amizadi ku kel Deus verdaderu, ki é Jeová, relijion falsu ta poi pesoas ta adora otus deus. Bíblia ta txoma kel-li di ‘prostituison spritual’. (Levítico 20:6; Êxodo 34:15, 16) Inda nu ta atxa na relijions falsu kes krénsa i kes prátika, ki ta izistiba na Babilónia antigu, sima Trindadi, ma alma ka ta móre i uza imaji. Na ses adorason, kes relijion li, ta mostra ma es ta ama mundu. Bíblia ta fla ma kel-li é adultériu spritual. — Tiago 4:4.

    Rikéza di relijion falsu i manera ki es ta izibi, é igual ku kel ki Bíblia ta fla sobri Babilónia Grandi, ki sta ‘bistidu di kor roxu i brumedju’, ku ‘oru, pédras di valor i jóias’. (Apocalipse 17:4) Babilónia Grandi é fonti ‘di kuzas suju di Téra’ ô ensinus i konportamentu ki ka ta agrada Deus. (Apocalipse 17:5) Kes algen ki ta faze párti di relijion falsu é kes ‘povu, monti di algen, nasons i línguas’, ki ta apoia Babilónia Grandi. — Apocalipse 17:15.

 Babilónia Grandi é responsável pa mórti ‘di tudu kes ki matadu na Téra.’ (Apocalipse 18:24) Duránti stória di mundu, relijion falsu partisipa na géra i es insentiva terorismu. Tanbê, es ka inxina pesoas verdadi sobri Jeová, kel Deus di amor. (1 João 4:8) I pamodi kel-li, txeu algen móre. Pur isu, kes ki krê agrada Deus debe ‘sai di el’ ô fika lonji di kes relijion falsu. — Apocalipse 18:4; 2 Coríntios 6:14-17.