“Paxénxa di maridu ku mudjer ta pasa pa próva tudu dia. Talvês óras ki nos é solteru nu ka ta atxa ma paxénxa é un kualidadi inportanti, má na kazamentu nu ta da kónta ma el é rei di inportanti.” — John.

•  Pamodi ki bu meste ten paxénxa?

•  Modi ki bu pode mostra paxénxa?

•  “Paxénxa é rei di inportanti”

•   Si bo é kazadu é más fásil bu repara na fadjas di bu maridu ô mudjer.

   “Na komésu di kazamentu tudu é bunitu. Má sima ténpu ta ba ta pasa, é más fásil konsentra na fadjas di kunpanheru. Óras ki kel atitudi negativu li entra na kazamentu, é fásil perde paxénxa.” — Jessena.

•   Falta di paxénxa pode pô-u pâpia antis di pensa.

   “N ta fla kel ki N ta xinti faxi, alvês faxi ti dimás. Si N tinha más paxénxa, talvês N ta pensaba midjór antis di pâpia i txeu bês N ta daba kónta ma nen ka mesteba fla nada.” — Carmen.

   Bíblia ta fla: ‘Amor ten paxénxa i el é bon.’ (1 Coríntios 13:4) Kel-li ta siginifika ma dôs algen ki ta ama kunpanheru debe mostra paxénxa. Má alvês kel-li ka ta kontise. John, ki dja nu papiaba di el antis, fla: “Sima kalker otu bon kualidadi, ku ténpu, é más fásil nu fika ku ménus paxénxa di ki fika ku más paxénxa. Pa nu ten más paxénxa, nu meste sforsa.”

•   Óras ki ta kontise un kuza ki bu ka staba ta spéra.

   Pur izénplu: Bu maridu ô bu mudjer ta fla algun kuza ki ta magua-u. Primeru kuza ki bu ta krê faze é magua-l tanbê.

   Prinsípiu di Bíblia: ‘Ka bu ofende faxi, pamodi é korason di algen tolu ki ta fika ofendidu.’ — Eclesiastes 7:9.

   Modi ki bu pode mostra paxénxa: Para un poku. Antis di bu fla algun kuza, tenta ntende kuzê ki bu maridu ô mudjer krê flaba envês di pensa ma el krê maguaba bo di propózitu. Un livru sobri kazamentu a ta fla: “Txeu bês nu ta reaji di akordu ku kel ki nos nu ta atxa ma nos maridu ô mudjer krê flaba, envês di kel ki el krê flaba mê.”

   Má sikrê bu maridu ô mudjer tinha intenson di provoka-u, ka bu reaji di mésmu manera ki el. Si bu mostra paxénxa bu ta midjora kel situason envês di piora-l. Sima Bíblia ta fla: ‘Undi ki ka ten lenha, lumi ta paga’. — Provérbios 26:20.

   “Si bu komesa ta xinti sima ki bu mudjer é bu inimigu, para bu pensa pamodi ki bu krê-l txeu i faze lógu un kuza ki el ta gosta.” — Ethan.

   Pensa na kel-li:

  •  Modi ki bu ta reaji óras ki bu maridu ô mudjer fla ô faze algun kuza ki bu ka gosta?

  •  Modi ki bu pode mostra más paxénxa si kel-li torna kontise?

•   Óras ki ta kontise sénpri mésmu kuza.

   Pur izénplu: Bu mudjer ô maridu ta sta sénpri atrazadu, el ta pô-u ta spéra i kel-li ta pô-u ta fika xatiadu.

   Prinsípiu di Bíblia: ‘Nhos kontinua ta suporta kunpanheru i ta púrdua kunpanheru di korason’. — Colossenses 3:13.

   Modi ki bu pode mostra paxénxa: Tenta preokupa más ku kel ki é bon pa bu kazamentu envês di kel ki é bon pa bo. Pergunta bu kabésa: ‘Si N fika xatiadu ku kel kuza li ô N diskuti sobri el, kel-li ta midjora nos kazamentu?’ Tanbê ka bu skese ma ‘nos tudu nu ta fadja txeu bês’. (Tiago 3:2) Kel-li krê fla ma bo tanbê bu ten ki midjora na alguns kuza.

   “Alvês N ta mostra más paxénxa ku un amiga di ki ku nha maridu. N ta atxa ma é pamodi N ta pasa más ténpu ku nha maridu i N ta repara más txeu na se fadjas. Má si N mostra paxénxa, N ta mostra ma N ta ama-l i ma N ta ruspeta-l. Nton paxénxa é txeu inportanti na nha kazamentu.” — Nia.

   Pensa na kel-li:

  •  Bu ta mostra paxénxa óras ki bu ten ki lida ku fadjas di bu maridu ô mudjer?

  •  Modi ki bu pode mostra más paxénxa di li pa dianti?