Alguns algen ta bebe bebida alkólika más txeu óras ki es sta txeu preokupadu, óras ki es ta xinti es sô ô sô pamodi es sta nfadadu. Bu sta ta bebe más txeu di ki kel ki bu ta kustumaba? Si kel-li sta kontise ku bo, modi ki bu pode ten sertéza ma bu ka sta bebe dimás i nen ma bu ka sta fika visiadu na bebida alkólika? Odja alguns informason ki pode djuda-u kontrola kantu bebida alkólika ki bu pode bebe.

•  Kuzê ki é bebe na limiti?

•  Modi ki bu pode sabe ma bu sta ta bebe dimás

•  Sinku kuza ki pode djuda-u kontrola pa bu pode bebe na limiti

 Kuzê ki Bíblia ta fla: ‘Ka bu fika na meiu di kes algen ki ta bebe vinhu txeu dimás’. — Provérbios 23:20.

 Pensa na kel-li: Bíblia é ka kóntra bebe bebida alkólika na limiti. (Eclesiastes 9:7) Má, el ta pâpia di diferénsa entri bebe na limiti, bebe fóra di limiti i toma moku. (Lucas 21:34; Efésios 5:18; Tito 2:3) Mésmu óras ki kel ki bu ta bebe ka ta pô-u ta toma moku, bebe dimás pode prujudika bu kapasidadi di toma disizon, bu saúdi ô bu amizadi ku otus algen. — Provérbios 23:29, 30.

 Txeu autoridadi ta mostra kal ki é diferénsa entri bebe na limiti i bebe dimás. Es ta fla kantu bebida ki un algen pode toma déntu limiti pa dia i kantu bês pa simana ki el pode bebe. a Má, kada algen ten se limiti i na alguns situason, midjór disizon é ka bebe nada. Kes-li é alguns informason di akordu ku kel ki Organizason Mundial di Saúdi ta fla:

 “Mésmu un kópu ô dôs pode ser dimás, na situasons sima kes-li:

•   Óras ki un algen sta konduzi ô trabadja ku mákina.

•   Óras ki un mudjer sta grávida ô el sta ta da mama.

•   Óras ki un algen sta ta toma ramedi.

•   Si bu ten algun prubléma di saúdi.

•   Si bu ka ta konsigi kontrola kantu bebida alkólika ki bu ta toma.”

 Kuzê ki Bíblia ta fla: ‘Nu djobe i nu izamina nos kaminhu’. — Lamentações 3:40.

 Pensa na kel-li: Bu pode proteje bu kabésa di kes mau rezultadu di bebida, si sénpri bu izamina kantu bês i kantu bebida alkólika ki bu ta toma i faze mudansas si meste. Djobe kes kuza ki sta dibaxu, ki pode djuda-u sabe si bu ka sta ta kontrola kantu bebida alkólika ki bu ta bebe.

•   Bu ta bebe pa bu pode xinti sábi. Bu ta xinti ma bu ta meste bebe pa bu pode fika diskontraídu, xinti avontádi na meiu di algen i pa bu pode divirti. Bu ta bebe pa bu pode lida ku bus prubléma.

•   Bu sta ta bebe más txeu di ki antis. Bu sta ta bebe sénpri. Gósi bu sta ta toma bebida más fórti i bu sta bebe más txeu pa bu pode xinti di mésmu manera ki bu ta xintiba antis, kantu bu ta bebeba más poku.

•   Bebida dja pô-u ta kai na prubléma na kaza ô na trabadju. Pur izénplu, bu sta ta gasta más dinheru ku bebida di ki kel ki bu ta pode paga.

•   Bu sta ta toma disizon mariadu óras ki bu bebe, sima konduzi, bai nada ô trabadja ku mákina.

•   Otus algen sta preokupadu ku bo pamodi kantu bebida ki bu sta bebe. Óras ki es ta fla-u, bu ta ranja diskulpa. Bu ta tenta bebe sukundidu ô bu ta konta mintira sobri kantu bebida ki bu sta ta toma.

•   Bu ka sta konsigi larga bebida. Dja bu tenta bebe más poku ô larga bebida, má bu ka konsigi.

 1. Faze un planu.

 Kuzê ki Bíblia ta fla: ‘Planus di un algen ki ta sforsa, di sertéza ta ten bons rezultadu.’ — Provérbios 21:5.

 Tenta faze kel-li: Skodje ki dias na simana ki bu ta bebe. Disidi kal ki é limiti di bebida ki bu ta toma na kes dia la. I skodje peloménus dôs dia na kel simana ki bu ka ta bebe.

 Un instituison di karidadi na Reinu Unidu pa orientason sobri bebida alkólika fla: “Bebe uns dia sin, uns dia nau é midjór manera di ivita fika visiadu na bebida alkólika.”

 2. Faze kes kuza ki bu poi na bu planu.

 Kuzê ki Bíblia ta fla: ‘Nhos tirmina kuzê ki nhos kumesa.’ — 2 Coríntios 8:11.

 Tenta faze kel-li: Djobe kal ki é kes limiti ki autoridadis di bu país ta fla, asi pa bu pode kontrola dretu kantu bebida ki bu ta bebe déntu di kes limiti la. Ranja kes bebida ki bu gosta, ki ka ten álkuol i ki ka ta prujudika-u, i pô-s na un lugar ki bu ta panha faxi.

 Institutu nasional di Mérka sobri prublémas i vísiu di álkuol fla: “Bu ta ten ménus xansi di ten prubléma pamodi bebida, si bu faze alguns mudansa pikinoti na ábitus ki bu ten ku bebida.”

 3. Mante firmi ku kel ki bu disidi.

 Kuzê ki Bíblia ta fla: ‘Pa nhos sin ser sin i nhos nau, nau’. — Tiago 5:12.

 Tenta faze kel-li: Sta priparadu pa fla “nau” ku jetu má di manera firmi, si un algen oferese-u un bebida ki ta afeta kel planu ki bu faze.

 Kel institutu nasional di Mérka sobri prublémas i vísiu di álkuol fla: “Si lógu bu fla ‘nau’, óras ki es oferese-u un bebida, bu ta ten ménus xansi di bebe dimás.”

 4. Konsentra na kes vantaji di bu disizon.

 Kuzê ki Bíblia ta fla: ‘Fin di un asuntu é midjór di ki se komésu.’ — Eclesiastes 7:8.

 Tenta faze kel-li: Faze un lista di kes vantaji ki ta pô-u sta disididu na kontinua ta kontrola kantu bebida ki bu ta bebe. Skrebe vantajis sima kes ki bu ta ten na saúdi, ku dinheru, na bus amizadi i na konsigi durmi midjór. Óras ki bu ta pâpia ku otus sobri bu disizon, konsentra na kes vantaji envês di kes dizafiu.

 5. Pidi Deus pa djuda-u.

 Kuzê ki Bíblia ta fla: ‘Pa tudu kuza N ten forsa pamodi kel ki ta da-m puder.’ — Filipenses 4:13.

 Tenta faze kel-li: Faze orason i pidi Deus pa djuda-u, si bu sta preokupadu pamodi kantu bebida alkólika ki bu sta bebe. Pidi-l pa el da-u forsa i pa el djuda-u kontrola bu kabésa. b I tra ténpu pa bu prende kuzê ki se Palavra, Bíblia, ta fla ki pode djuda-u. Ku se ajuda, bu ta konsigi kontrola sénpri kantu bebida alkólika ki bu ta bebe.