Oji, más di ki nunka, Tistimunhas di Jeová sta ta resebe más publikason na formatu dijital ki ten bazi na Bíblia i más vídiu. Má na txeu párti di mundu, irmons ka ten dinheru pa poi internet. Otus ta vive na lugaris ki internet ta kai txeu i na lugaris ki ka ten internet.

 Má gósi, txeu irmon ta konsigi diskarega publikasons, sikrê es ka ten internet. Modi ki es ta konsigi?

 Es ta uza JW Box ki é un dispozitivu pikinoti ki mandadu pa kes kongregason na kes lugar ki ten prubléma ku internet. JW Box ten un router ki kunpradu na un inpréza. Tanbê, el ten un software ki Dipartamentu di Konputador na Betel kria i el ten kes publikason na formatu dijital i kes vídiu ki sta na jw.org. Kada dispozitivu JW Box ta kusta kuazi 75 dóla (kuazi 7.500 skudu).

 Na Salon di Reinu, irmons ta uza ses aparelhu iletróniku pa liga ku JW Box através di Wi-Fi. Asi es ta konsigi diskarega publikasons i vídius. Mésmu kes irmon ki ten aparelhu antigu ô más baratu ta konsigi liga ku JW Box. Má modi ki JW Box ta konsigi sta atualizadu na kes kongregason ki ka ten internet? Di vês en kuandu, Filial ta manda kes kongregason pen drives ki ten vídius i publikasons di jw.org. Kada pen drive ta kusta uns kuatu dóla (kuazi 400 skudu).

 Modi ki JW Box sta ta djuda nos irmons? Nathan Adruandra, un pai di família ki ta mora na Repúblika Dimokrátika di Kongu, fla: “Dja dura ki N sta tenta diskaregaba kes vídiu Ó Jeová... Confio em Ti i Lembrem-se da Mulher de Ló. Má nunka N ka konsigi i kel-la ta dexaba mi dizanimadu. Gósi N ta pode diskarega kes vídiu na nha telemóvel. Kel-li ta djuda nos ki é pai inxina nos fidju más midjór.”

 Un irmon ki ta djuda kes kongregason na Nijéria konfigura JW Box, fla: “Irmons ta odja JW Box sima un prezenti spesial ki ben di Jeová. Es sta txeu kontenti pamodi gósi es pode diskarega faxi publikasons i vídius ki ta faze párti di nos Feraméntas prinsipal pa inxina.”

 Mandadu más di 1.700 JW Box pa irmons na Áfrika, Osiania i Mérka di Sul. Obijetivu é manda JW Box pa mutu más kongregason. Di undi ki ta ben dinheru pa faze tudu kel-li? El ta ben di kes kontribuison ki ta fazedu pa trabadju na mundu interu. Txeu di kes kontribuison ta fazedu através di site donate.isa4310.com. Obrigadu pa kes kontribuison ki nhos ta faze di korason!