PA MARIDU KU MUDJER
3: Ruspetu
KUZÊ KI KEL-LI SIGINIFIKA
Maridu ku mudjer ki ta mostra ruspetu na ses kazamentu, ta nporta ku kunpanheru, mésmu óras ki es tene opinion diferenti. Un livru a ta fla: “Kes maridu ô mudjer li ka ta finka pé un bês bai na ses opinion. . . Envês di kel-li es ta kontinua ta pâpia ku kunpanheru sobri kuzas ki ses opinion é diferenti. Es ta obi opinion di kunpanheru ku ruspetu i es ta atxa un soluson ki é bon pa es tudu dôs.”
KONSEDJU DI BÍBLIA: ‘Amor ka ta djobe sô ses interesi’. — 1 Coríntios 13:4, 5.
“Ruspeta nha mudjer krê fla ma N ta da-l valor i ma N ka krê faze nada ki ta prujudika ael ô nos kazamentu.” — Micah.
PAMODI KI KEL-LI É INPORTANTI
Óras ki maridu ku mudjer ka ta ruspeta kunpanheru, es pode kumesa ta kritika, ta bota piada ô faze trósa i ti ta dispreza kunpanheru. Kes algen ki ta faze piskiza, ta fla ma kes-li é sinal ki ta mostra sédu ma kel kazamentu pode kaba na divórsiu.
“Fla kuzas ku maldadi, bota piada ô faze trósa di bu mudjer, sô ta pô-l ta xinti ma el ka ten valor, ta kaba ku kunfiansa ki el ten na bo i kel-li ta prujudika nhos kazamentu.” — Brian.
KUZÊ KI BU PODE FAZE
FAZE UN TÉSTI PA BU KABÉSA
Duránti un simana, presta atenson na manera ki bu ta pâpia i ki bu ta aji. Dipôs faze bu kabésa kes pergunta li:
-
‘Kantu bês ki N kritika nha maridu ô mudjer i kantu bês ki N ilojia-l?’
-
‘Na ki kuzas ki N mostra ma N ta ruspeta nha maridu ô mudjer?’
NHOS PÂPIA KU KUNPANHERU SOBRI KES PERGUNTA LI
-
Ki kuzas nhos pode faze ô fla pa kada un di nhos xinti ma nhos maridu ô nhos mudjer ta ruspeta nhos?
-
Ki kuzas bu maridu ô bu mudjer ta faze ô fla ki ta pô-u ta xinti ma el ka ta ruspeta-u?
AJUDA
-
Skrebe três kuza ki bu ta gostaba pa bu maridu ô bu mudjer mostra-u ruspetu na es. Fla bu maridu ô bu mudjer pa faze mésmu kuza. Nhos troka lista i nhos sforsa pa nhos mostra kunpanheru ruspetu di akordu ku kel ki sta na kes lista.
-
Faze un lista di kes kuza ki bu gosta na bu maridu ô bu mudjer. Dipôs fla-l di kes kuza li ki bu gosta txeu na el.
“Ruspeta nha maridu krê fla ma N ta mostra-l na kuzas ki N ta faze, ma N ta da-l valor i ma N krê pa el ser filís. Ka ten ki ser un kuza grandi, alvês faze kuzas pikinoti tudu óra é ki ta mostra ma N ta ruspeta-l di verdadi.” — Megan.
Más inportanti é ka si bu ta atxa ma bu ta mostra ruspetu ô nau, kuzê ki ta konta é si bu maridu ô bu mudjer ta xinti ma bu ta ruspeta-l.
KONSEDJU DI BÍBLIA: ‘Nhos bisti di konpaxon, bondadi, umildadi, brandura i paxénxa.’ — Colossenses 3:12.
a Ten Lessons to Transform Your Marriage
