Ne March 2020, ha World Health Organization i zibisa kuti COVID-19 i pandemic, bathu ba njinji ba ka be ba si nga kumbule kuti bugwele igogu gowo be gu chi yapo shule kwe gole. Dzimiliyoni dze bathu, ne Bafakazi ba Jehova, ba ka lingisana ne mathatha e bugwele, e mazwiwo, ne e ku sheta mari ne ntata ye bugwele. Bafakazi ba Jehova ba ka thama ndongoloso ipi ye ku batsha ne zwithu zwi no sheteka mu chibaka ichechi cha ka sima?

 Pasi kwe butungamili gwe Komiti ye Babatshanyi ye Gubungano li no Laula le Bafakazi ba Jehova, Dzikomiti dze Disaster Relief Committees (DRC), dzi no pinda 950, dza ka thamiwa mu shango yose ku mililana ne COVID-19. Mu ndawo dzingwe, ba ka thama kuti ku be ne ba no batsha mu ndawo dzabo, ngono mu dzingwe ndawo, Bafakazi ba ka batshiwa ne mibuso. DRC dza ka thama ndongoloso ye ku batsha ne zila wulu.

 Ha ti lakidzila, bona cha ka shingikala ku Paraguay. Pampiri nngwe ye dzikhani ya ka kwala kuti ne ntata ye ku sheta kwe mari kwa ka zhisiwa ne bugwele, “bunji gwe bathu be Paraguay ba no bulawa ne zhala ba li mu mizi yabo.” Ngono DRC ye Paraguay ya ka be ya chi tangisa ku pa bathu zwa ba no sheta, zwi nga ba tola viki mbili—ili zojiwa, zwisipa, ne zwi no shingisiwa mu mamuko e bathu, ku nga lizana nsha we bathu ba li 4. Zwithu izwezwi zwi nga tengiwa ne P318.15.

 Bashingi ibaba ne bangwe ba no zwibabalila chini mu bugwele gwe COVID-19? Ba no mbala dzimask ne ku shingisa social distancing. Ba no bona kuti dzikhamphani dza ba no tenga mu dzili dzo shingisa milayo i no bakilila zojiwa mu bugwele, ne ku shingisa ba ka simisisa milawo ye ku zwibakilila. Ichecho cho dwa kuti bose ba no bata zojiwa ba ka ambala zwiambalo zwi no ba bakilila, ba tshwayile ne ku suka dzikoloi dzabo, ne ku biga zojiwa mu ndawo mbuyanana. Kakale, ba no yesa zojiwa ba ka fanila shingisa social distancing pakati kwabo ne bazwalani ba no zwiamuchila.

 Ku no ti January 2021, Komiti ye Babatshanyi ya ka duma kuti ku shingisiwe mari a no pinda P265 127 250.00 ku batsha mu COVID-19. Matabi ne dzi DRC ba no shingisa zwipo izwezwi zwibuyanana ne ku shinga ba ka simisa ku lebesana ne kwe dzipraisi dzi butuka mu zwithu zwa ba no sheta. Ku Chile, ha ti lakidzila, bazwalani ba mu nshingo we ku batsha ba ka be be shaka tenga 750 kilograms (1,653 lb) ye nyemba. Ngono dzipraisi dze nyemba dza ka be dza paphidzika ka bili mu ngwedzi! Dziawara dzili mbili ba si no be ba dumana ku tenga nyemba ne mari a pezhugwi, ntengesi a ka ba budza kuti kuna nngwe wa buza nyemba dza a ka be a tenga. Mu bumo gwe kuti a shake mari a pezhugwi a ba ka be ba dumana, ntengesi a ka ba tengesela ne praisi ye kutanga!

 Ne kwa ka jalo, bazwalani bedu ha ba no tola nyemba, ntengesi e be e gwisa ku shandula chidumano cha ba ka be ba dumana nacho, e ba biga nlandu we kuti a ba to pa bathu zojiwa zwibuyanana, se kwa ku thama makubungano angwe. Shule kwe ku tembezelela mu moyo, nngwe we bazwalani bedu a ka budza ntengesi kuti gubungano lingwe ne lingwe lo chi ziba kuti lowo batsha bathu ba ngapani ba no sheta. Bazwalani kakale ba ka chenesa kuti, ne kuti bathu a ba zo kudziwa ne zila i no fanana, zojiwa zo piwa bathu ne zila i no fanila misha i no zwi amuchila. Ngono, ba ka budza ntengesi kuti zwipo zose zwe mari zwi no piwa Bafakazi ba Jehova, nde zwi no dusiwa ne ku da. Ichecho chi ka nshathisa kwazo. Ntengesi ha a zo duma koga ku tapudza praisi ngono wa ka dusa chipo che 400 kilograms (882 lb) ye nyemba mu odara i no tobela.

 Lusu, Nfakadzi wa kula we Liberia, u no gala ne be nsha uwe ba li 5. Ya ka ti be ja zojiwa zwe mangwanana be bala ndimana ye zhuba, ngwana we ngwana wa Lusu u na makole a li 7 wa ka bona kuti a ku chi na zojiwa mu ngumba. A ka buzwa kuti, “Towo jani?” Lusu wa ka nchenesela kuti wa chi tembezela kale kuti ba batshiwe, ne kuti wa ka be e themba kuti Jehova u nowo ba batsha. Mu zhuba ilelo, Lusu wa ka lidzigwa ne bakugwana be gubungano lile kuti a zhe a wo tola zojiwa. U no leba kuti: “Ngwana we ngwana wangu a kati wo ziba kuti Jehova u no hwa ne ku dabila mitembezelo, ne kuti wa dabila yangu.”

 Nkadzi nngwe ku Democratic Republic of Congo u no gala pejo ne ngumba ye Bafakazi. Shule kwe ku bona nsha iwoyo u amuchila zojiwa ku dwa mu bazwalani babo, wa kati, “Shule kwe pandemic, towo be Bafakazi ba Jehova ne kuti ba ka thokomela bazwalani ne dziazwadzi dzabo mu chibaka ichechi cha ka sima.” Nlume uwe a ka mbuzwa a kati, “Apa u nowo be Nfakazi wa Jehova koga ne ntata ye ku bona ba piwa sakana le rice?” A ka dabila e ti, “A ku zo jalo, ngono sakana ileli le rice lo lakidza ludo gwe malebeswa.”

 Bafakazi ba Jehova ba ka batsha bazwalani ne azwadzi dzedu dzi no sheta chinyolocho mu chibaka ichechi che pandemic, ne ku batsha kwenyu kwe zwipo zwi no dusiwa ne ku da. To bokela zwipo zwa ma ka dusa mu shingisa zila dza ka siyasiyana dze donate.isa4310.com.