Bibl kaakɛdɩɣ Armaagedɔɔ tɔm lɛ, kɩyɔɔdʋʋ se Armaagedɔɔ kɛ you nɛ you ŋgʋ kɩkaɣ labʋ kominawaa nɛ Ɛsɔ pɛ-hɛkʋ taa nɛ kɩkaɣ labʋ ɛjaɖɛ kpeekpe yɔɔ; pɩtɩkɛ you ŋgʋ kɩkaɣ labʋ tɛtʋ hɔɔlʋʋ nakʋyʋ ɖeke taa yɔ.

•   «Tɩkɛ tɔm ndʋ tɩlɩnɩ aleewaa cɔlɔ yɔ . . . nɛ tiwoki tɛtʋ kpeekpe yɔɔ awiya cɔlɔ, se tikpeɣli-yɛ Ɛsɔ Ðoŋ Tɩŋa Tʋ tɛ kɩyakʋ sɔsɔʋ you taa. . . . Tikpeɣli-yɛ lone nɖɩ payaɣ Ebree taa se Armaagedɔɔ yɔ ɖɩ-taa.»—Natʋ 16:14, 16.

 Palɩzɩ tɔm piye Armaagedɔɔ nɛ Ebree tɔm pee Har Megidɔɔnɩ taa nɛ a-tɔbʋʋ lɛ se «Megido Pʋʋ.» Megido kaakɛ caanaʋ taa Izrayɛɛlɩ taa tɛtʋ natʋyʋ. Pʋyɔɔ ɛyaa nabɛyɛ maɣzɩɣ se sɔnɔ Izrayɛɛlɩ ɛjaɖɛ taa pakaɣ labʋ Armaagedɔɔ you. Ɛlɛ, lone naɖɩyɛ fɛyɩ kedeŋa hɔɔlʋʋ ŋgʋ kɩ-taa nɛ ɖɩpaɣlɩ siŋŋ se «tɛtʋ kpeekpe yɔɔ awiya» nɛ pɔ-sɔɔjanaa papɩzɩɣ nɛ pekpeɣli ɖɩ-taa.

 «Yʋsasɩ» palabɩnɩ tʋmɩyɛ nɛ pama Natʋ takayaɣ. (Natʋ 1:1) Armaagedɔɔ tɩkɛ lone naɖɩyɛ keekee, ɛlɛ kɩkɛ wɛtʋ ndʋ tɩ-taa kedeŋa kpeekpe yɔɔ ajɛɛ kpeɣliɣ se akaɖɩnɩ Ɛsɔ kɛdɛzaɣ ɖeɖe yɔ.—Natʋ 19:11-16, 19-21.