Tɔm ñʋŋ weyi ɩɖɛwa yɔ ɩwɩlɩ ɛzɩma paɖʋ jw.org yɔɔ takayɩsɩ ndɩ ndɩ nɛ videowaa mba papɩzɩɣ nɛ pakpaɣ elɛkɩtroniiki wondu yɔɔ yɔ; ɩwɩlɩ ɖɔɖɔ ɛzɩma patɩŋnɩ jw.org yɔɔ nɛ peyele nɛ ɛyaa tɩlɩ ɛjaɖɛ kpeekpe yɔɔ ɖo-koobiya hɔʋ yɔɔ toovenim tɔm yɔ. Kɛdɛzaɣ hɔɔlʋʋ kʋnɛ kɩkaɣ wɩlʋʋ ɛzɩma jw.org ɖʋ nesi tɔm susuu tʋmɩyɛ ɛjaɖɛ kpeekpe yɔɔ yɔ.

Kʋnʋmɩŋ: Paɖaɣnɩ ñɔɔzʋʋ jw.org août 2012 taa lɛ, kʋnʋmɩŋ weyi ɩ-taa kɩɩwɛɛ yɔ ɩɩkpɛndɩ 139. Pɩtalaɣ août 2014 lɛ kʋnʋmɩŋ weyi ɩ-taa kɩɩwɛɛ yɔ ɩɩcɛzɩ 500 (pɩnaɣ ŋga ka-taa palɩzɩ traktɩ nakʋyʋ se pasɩnɩnɩ ɛyaa nɛ patɩlɩ ɖɛ-tɛ intɛrnɛɛtɩ lone), nɛ ndamaa kʋnʋmɩŋ 22 kaawɛ ɩ-taa. Sɔnɔ, kʋnʋmɩŋ weyi ɩ-taa ɖɛ-tɛ intɛrnɛɛtɩ lone nɖɩ ɖɩwɛɛ yɔ ɩcɛzɩ 1070 yɔɔ, nɛ kʋnʋmɩŋ ɛnɩ ɩ-taa lɛ ndamaa kʋnʋmɩŋ cɛzɩ 100 yɔɔ.

Tɔm ñʋŋ weyi ɩkɔm ɩ-alɩwaatʋ yɔɔ yɔ: Octobre 2019 taa lɛ paɖaɣnɩ ñɔɔzʋʋ jw.org. Ŋsʋʋ kɩ-ɖɩbaɣzɩyɛ taa lɛ ŋnaɣ tɔm ñʋʋ nakʋyʋ nɛ kɩ-kɩlɛmʋʋ hɔŋ ɛyaa lɩmaɣza, tɔm ñʋʋ ŋgʋ kɩ-tɛɛ lɛ ŋnaɣ tɔm ñʋŋ cikpeŋ 3 lɛɛŋ. Pɩɩkɛnɩ nʋmɔʋ kɩbaŋʋ ŋgʋ kɩ-yɔɔ papɩzaɣ se patɩŋna nɛ pɔhɔ ɛyaa lɩmaɣza nɛ powoni tɔm ñʋŋ weyi ɩwɛ intɛrnɛɛtɩ lone nɖɩ ɖɩ-yɔɔ nɛ itukuuni tɔm susuu tʋmɩyɛ nɛ pɩkɩlɩ yɔ. Pʋwayɩ lɛ, Tɔm maʋ tʋmɩyɛ nɛ Kɩlɛmɩŋ lɩzɩyaa patɩŋaɣnɩ nʋmɔʋ nakʋyʋ yɔɔ nɛ palɩzɩɣ tɔm ñʋŋ weyi ɩwɛ jw.org ɖɩbaɣzɩyɛ taa yɔ nɛ ɩ-kɩlɛmɩŋ lɛɛ lɛɛ. Piyekaɣ se paa ɛzɩmtaa lɛ, paɖʋʋ tɔm ñʋŋ nɩɩyɩ jw.org ɖɩbaɣzɩyɛ taa, weyi ɩyɔɔdʋʋ mbʋ piɖiɣni labʋ ɛjaɖɛ kpeekpe yɔɔ yɔ pɩ-tɔm yɔ. Kɩɖaŋ nɩɩyɩ yɔ: Paaɖʋ tɔm ñʋŋ nɩɩyɩ jw.org ɖɩbaɣzɩyɛ taa nɛ ɩyɔɔdʋʋ COVID-19 kʋdɔŋ kɩɖɛɖɛʋ tɔm, you ŋgʋ kɩlɩ Rusii nɛ Ukrɛɛnɩ pɛ-hɛkʋ taa yɔ kɩ-tɔm nɛ ɛzɩma you ŋgʋ kiyeba nɛ ɛyaa nabɛyɛ pɩsɩ kʋyʋʋ ɖʋyaa yɔ pɩ-tɔm.

Kɩsɩnɩ ɛyaa se patɩlɩ-ɖʋ: Intɛrnɛɛtɩ lone jw.org sɩɣnɩ laŋa kɩbana tɩnaa se patɩlɩ toovenim tɔm ɖɛ-ɛgbɛyɛ yɔɔ nɛ tʋma wena ɖɩlakɩ yɔ a-yɔɔ. Kɩwɩlɩɣ ɖɔɖɔ nʋmɔʋ ŋgʋ kɩ-yɔɔ ɛyaa mba pɔsɔɔlaa se patɩlɩ nɛ pɩkɩlɩ yɔ papɩzɩɣ patɩŋna nɛ pɔyɔɔdɩnɩ Yehowa aseɣɖe tɩnaa yɔ. Halʋ nɔɔyʋ kɛ ndam, nɛ ɛyɔɔdaa se alɩwaatʋ ndʋ ɛɛkɛ pɛlɛ yɔ, ɛ nɛ Yehowa aseɣɖe tɩnaa paakpɛlɩkɩ Bibl, ɛlɛ ɛkɔm nɛ ɛkʋyɩ ɖenɖe ɛɛwɛ yɔ nɛ ɛɖɛɛ lɛ, kpɛlɩkʋʋ sɩŋ. Ɛɛsɔɔlaa se ɛɖaɣnɩ paɣzʋʋ kpɛlɩkʋʋ ɛlɛ ɛtɩnatɩ Yehowa aseɣɖe tʋ nɔɔyʋ. Ɛtɔzɩ ɖɛ-tɛ intɛrnɛɛtɩ lone jw.org yɔɔ lɛ, ɛtɩŋnɩ ɖɩ-yɔɔ nɛ ɛpɔzɩ se pɛkpɛlɩkɩnɩ-ɩ Bibl. Kɩyakɩŋ pazɩ wayɩ lɛ, koobiya 2 mba pɛkɛ nʋmɔʋ lɩzɩyaa kiya yɔ pɔkɔtɩ ɛ-pɔɔyʋʋ yɔɔ. Pɩtasɩna se ɛɖaɣnɩ paɣzʋʋ kpɛlɩkʋʋ lɛ, ɛpaɣzɩ wobu kediɣzisi ɖɔɖɔ. Lɛɛlɛɛyɔ pamɩyɩsɩ-ɩ lɩm, nɛ eɖiɣni kpɛlɩkʋʋ e-piya 3 Yehowa yɔɔ tɔm. Ɛyɔɔdaa se: «Mɛnsɛɣ Yehowa se ɛlabaɣ lɛ intɛrnɛɛtɩ lone ɖɩnɛ ɖɩ-yɔɔ, mbʋ pʋyɔɔ yɔ ye pɩtaakɛ ɖɩ-yɔɔ yɔ, pɩtɩla pɩɩpɔzaa se manɖaŋ nɛ pɩkɔɔ pɩsɩɩnɩ alɩwaatʋ ndʋ mankatɩɣ Yehowa aseɣɖe tʋ nɔɔyʋ yɔ pʋcɔ nɛ manɖaɣnɩ paɣzʋʋ kpɛlɩkʋʋ.»

Tɔm susuu tʋmɩyɛ wɛɛ nɛ ɖɩɖɛɣnɩ ɛsɩndaa, nɛ pɩkɛnɩ-ɖʋ taa leleŋ se ɖiɖiɣzina se Yehowa ɛgbɛyɛ kaɣ wobu pɩ-yɔɔ nɛ ɖɩlɩzɩɣ wondu ndʋ tɩɖʋʋ nesi tʋmɩyɛ nɖɩ yɔ.—Izaayii 60:22.

• Videowaa mba pakpakɩɣ paa fenaɣ ŋga yɔ

• Fenaɣ taa lɛ, mba powoki jw.org yɔɔ paa evemiye nɖɩ yɔ

• Mars 2013, palɩzɩ jw.org tɛ Logo

• Juillet 2014, jw.org wɛ ndamaa kʋnʋmɩŋ taa

• Octobre 2019, paɖaɣnɩ ñɔɔzʋʋ jw.org ɖɩbaɣzɩyɛ se pɩkɛdɩnɩ ɛyaa nɛ pɩkɩlɩ

• Janvier 2022, palɩzɩ Nɩɩ wezuu leleŋ tam! takayaɣ