Ĩtina wa Yesũ kũelesya kana “ĩĩthya ĩnini” ya andũ makanengwa Ũsumbĩ wa ĩtu, nĩwasyokie aelesya maũndũ angĩ makonetye ũndũ ũsu. (Luka 12:32) Yesũ eekie ũu nũndũ kũlika Ũsumbĩnĩ nĩ mũthĩnzĩo mũseo mũno ũtaĩle kũvũthĩĩw’a o na vanini. Yesũ nĩwakindĩlĩĩile nĩkĩ nĩ ũndũ wa vata mũndũ kwĩthĩwa na woni waĩle nĩ kana alike Ũsumbĩnĩ wa ĩtu.

Eeie amanyĩw’a make mekalae meyũmbanĩtye kwondũ wa kũsyoka kwake. Ameie-ĩ: “Ĩkĩai ngũa na mũyĩthĩwa mwĩyũmbanĩtye na taa syenyu syakene, nenyu mwaĩle kwĩthĩwa mũilye andũ meteele vwana woo asyoke kuma mũtwaanonĩ, nĩ kana ooka na akũnanga, methĩwe matonya kũmũvingũĩa mĩtũkĩ. Nĩ ndanu ngombo ila vwana wasyo ooka wĩsyĩthĩa isyaĩĩsye!”—Luka 12:35-37.

Waĩ ũndũ wĩ laisi kwa amanyĩw’a kũkwatya kĩla Yesũ waneeneaa ngelekany’onĩ ĩsu. Ngombo ila wawetaa nĩsyeeyũmbanĩtye syeteele vwana woo asyoke. Yesũ aeleisye asya: “O na [vwana] ooka ũsyaĩĩsyonĩ wa kelĩ [kwambĩĩa ta saa itatũ sya ũtukũ nginya ta saa sita sya ũtukũ], kana ũsyaĩĩsyonĩ wa katatũ [kwambĩĩa ta saa sita sya ũtukũ nginya ta saa kenda sya ũtukũ], na aisyĩthĩa syĩyũmbanĩtye, ikeethĩwa syĩ ndanu!”—Luka 12:38.

Ndeto isu syĩonany’a kana amanyĩw’a nĩmaaĩle kwĩka maũndũ angĩ maingĩ eka o kwĩthĩwa athũkũmi me kĩthito. Yesũ, ũla nĩwe Mwana wa mũndũ, nĩwoonanisye ũndũ ũsu nesa yĩla weewetie ngelekany’onĩ ĩsu. Eeie amanyĩw’a make atĩĩ: “Nenyu ĩkalai mwĩyũmbanĩtye, nũndũ Mwana wa mũndũ akooka ĩsaa yĩla mũtataĩĩe.” (Luka 12:40) Kwoou, ve ĩvinda yesaa kũvika na Yesũ ayũka. Atanamba kũka endaa aatĩĩi make, na mũno mũno “ĩĩthya ĩnini,” mekalae meyũmbanĩtye.

Vetelo nĩwendaa kũelewa nesa kĩla ndeto sya Yesũ syoonanasya, na nĩkyo kĩtumi wamũkũlilye atĩĩ: “Mwĩaĩi, no ithyĩ ũũtavya ngelekany’o ĩno, kana nĩ kĩla mũndũ?” Vandũ va kũmũsũngĩa Vetelo ĩmwe kwa ĩmwe, Yesũ nĩwanenganie ngelekany’o ĩkonetye ũndũ ũsu. Aisye: “Nũũ ĩndĩ mũũngamĩi wa nyũmba mũĩkĩĩku na mũĩ, ũla vwana wake wamũnyuvie nĩ kana aũngamĩe athũkũmi make, na aiendeea kũmanengae kĩthimo kĩla kyaĩle kya lĩu ĩvinda yĩla yaĩle? Ngombo ĩsu ĩkeethĩwa na ũtanu ethĩwa vwana wayo ooka akeethĩa ĩyĩka ũu! Nĩmũtavya w’o, akamĩnyuva ĩũngamĩe syĩndũ syake syonthe.”—Luka 12:41-44.

Nthĩnĩ wa ngelekany’o ĩla Yesũ wanenganie mbee, “vwana” nĩ Mwana wa mũndũ, ũla nĩ Yesũ. Namo ala metĩtwe “mũũngamĩi wa nyũmba mũĩkĩĩku” nĩ aũme amwe kuma kĩkundinĩ kya “ĩĩthya ĩnini” kĩla kĩkanengwa Ũsumbĩ. (Luka 12:32) Ndetonĩ isu, Yesũ oonanasya kana andũ amwe kuma kĩkundinĩ kĩu makanengae ‘athũkũmi make kĩthimo kĩla kyaĩle kya lĩu ĩvinda yĩla yaĩle.’ Kwoou, Vetelo na amanyĩw’a angĩ ala Yesũ wamanyĩasya na kũmaĩthya kĩ-veva nĩmamanyie kana ve ĩvinda yũkĩte yĩla Mwana wa mũndũ ũkoka. Na ĩvindanĩ yĩu, kũkeethĩwa mũvango mũseo wa kũĩthya aatĩĩi ma Yesũ, ala nĩmo “athũkũmi” ma Vwana.

Yesũ nĩwatũmĩie nzĩa ĩngĩ nĩ kana akindĩlĩĩle nĩkĩ amanyĩw’a make maĩlĩte kwĩthĩwa me metho vyũ kĩ-veva. Eekie ũu nĩkwĩthĩwa nĩ ũndũ wĩ laisi mũndũ akaeka kũsyaĩĩsya na ayambĩĩa kũvĩnga athaithi ala angĩ. Aisye-ĩ: “Ĩndĩ ngombo ĩsu ĩkambĩĩa kwasya ngoonĩ yayo, ‘Vwana wakwa nũkwĩkalanga ayĩsa kũka,’ na ĩyambĩĩa kũvũa athũkũmi aũme na athũkũmi aka na kũya na kũnyw’a na kũmilwa, vwana wa ngombo ĩsu akooka mũthenya ũla ĩtataĩe na ĩsaa yĩla ĩtesĩ, na akamĩthĩny’a mũno na aimĩnenga kĩanda kyayo vamwe na ala mate aĩkĩĩku.”—Luka 12:45, 46.

Ĩtina wa ũu Yesũ aisye kana ookie “kwakany’a mwaki ĩũlũ wa nthĩ.” Eekie ũu yĩla wamanyĩisye maũndũ matumie kwĩthĩwa ngusanĩsyo katĩ wa andũ na mavuany’a momanyĩsyo ma ũvũngũ na syĩthĩo itaĩle. O na momanyĩsyo ma Yesũ nĩmaetie mũaanĩko katĩ wa andũ maaĩlĩte kwĩthĩwa na ngwatanĩo. Na nĩkyo kĩtumi Yesũ waisye kana “ĩthe akookĩlĩla mwana nake mwana ayũkĩlĩla ĩthe, inyia akookĩlĩla mwĩĩtu wake nake mwĩĩtu ayũkĩlĩla inyia wake, inyia wa mũũme akookĩlĩla mũka-a-mwana nake mũka-a-mwana ayũkĩlĩla inyia wa mũũme.”—Luka 12:49, 53.

Ndeto ila Yesũ waneenie syakonetye amanyĩw’a tũ. Na ĩtina wa kũneena namo, nĩwasyokie ambĩĩa kũneena na ĩkomano. Andũ aingĩ ĩkomanonĩ yĩu nĩmaleete na ngũlũ kwĩtĩkĩla kana Yesũ nĩwe Masia, na kwoou ameie atĩĩ: “Yĩla mwoona ĩtu yaumĩla ũthũĩlonĩ wa syũa, mwaasya, ‘Kĩuutani nĩkyũkĩte,’ na ũu ũyĩthĩwa. Na yĩla mwoona kĩseve kĩuutanĩte kuma ngalĩko ya ĩtheo, mwaasya, ‘Nĩkũkwĩthĩwa ũvyũvu mwingĩ,’ na ũu ũyĩthĩwa. Angangany’a, nĩmũsiasya na mũkamanya ũndũ nthĩ na yayaya ikwĩthĩwa iilye, ĩndĩ nĩkĩ mũtesĩ kũsisya na kũmanya yĩĩ nĩ ĩvinda yĩkũ?” (Luka 12:54-56) Kwa w’o, andũ asu mayeeyũmbanĩtye kũmwĩtĩkĩla Masia.