We Ngai E Tei?
MAŨNDŨ ALA WŨMBI ŨTŨMANYĨASYA
Tei nĩ “ũtonyi wa kwĩthĩwa ũtonya kwĩwʼa ũndũ mũndũ ũngĩ wĩ na thĩna ũkwĩwʼa, kana kũsũanĩa ũndũ ũtonya kwĩwʼa keka nue wĩ thĩnanĩ ũsu.” Mũsomi ũmwe wĩtawa Dr. Rick Hanson aisye kana “tũsyaawa twĩ na ũtonyi wa kwĩwʼanĩa tei.”
KWASŨANĨA ŨNDŨ ŨŨ: Nĩkĩ twĩthĩawa na ũtonyi wa kwĩwʼanĩa tei kĩvathũkanyʼo na syũmbe ila ingĩ? Mbivilia yĩeleasya kana Ngai oombie andũ na kĩtutya kyake. (Mwambĩlĩlyo 1:26) Tũmbĩtwe na kĩtutya kya Ngai na kwoou no twĩthĩwe na ndaĩa nzeo o take. Kwoou, yĩla andũ matetheesya angĩ nũndũ wa kwĩthĩwa na tei, methĩawa mayĩatĩĩa ngelekanyʼo ya Mũmbi woo, Yeova Ngai, ũla wĩ tei mwingĩ.—Nthimo 14:31.
MAŨNDŨ ALA MBIVILIA ĨTŨMANYĨASYA ĨŨLŨ WA TEI WA NGAI
Ngai nũtwĩwʼĩaa tei na kwoou nũmenete kwona tũithĩna. Kwa ngelekanyʼo, yĩla ana ma Isilaeli maĩ ngombo Misili, na mathĩnĩie weũnĩ myaka 40, Mbivilia yaasya kana “thĩnanĩ woo wʼonthe [Ngai] nĩwathĩnawʼa.” (Isaia 63:9) O vamwe na Ngai kwona maithĩna, nĩwaũmĩaa ngoonĩ oona maithĩna na nĩkyo kĩtumi waisye atĩĩ: “Nĩnĩsĩ mathĩna moo.” (Kuma 3:7) Na asyokete akasya: ‘Ũla ũkũkiitaa akiitaa kyũma kya itho yakwa.’ (Nzekalia 2:8) Yĩla andũ angĩ matũũmĩsya, o nake nũũmĩaa.
O na kau mavinda angĩ no twĩwʼe tũtaĩle kwĩwʼĩwa tei nĩ Ngai, Mbivilia ĩtũĩkĩĩthasya kana “Ngai nĩ mũnene kwĩ ngoo sitũ, na nĩwĩsĩ maũndũ onthe.” (1 Yoana 3:19, 20) Ngai nũtwĩsĩ nesa kwĩ ũndũ twĩyĩsĩ. Nĩwĩsĩ maũndũ onthe ala matũkwataa, mosũanĩo maitũ, na ũndũ tũkwĩwʼa. Na nũtwĩwʼĩaa tei.
No tũmwĩkwatye Ngai atũkiakisye, atũnenge ũĩ, na aitũtetheesya, tũte na nzika kana nũmewʼĩaa tei ala mekũthĩna
Maandĩko nĩmatũĩkĩĩthasya ũndũ ũsu
-
“Nĩvo ĩndĩ wĩĩtana, na Yeova akĩtĩka; ũkamwĩkaĩla, nake akasya, Ninyioo.”—ISAIA 58:9.
-
“Nũndũ nĩnĩsĩ mosũanĩo ala nĩsũanĩaa kwondũ wenyu, easya Yeova, mosũanĩo ma mũuo, na ti ma ũthũku, kũmũnenga wĩkwatyo mũminũkĩlyo wenyu. Na mũkeengaĩla, na mũkathi kũmboya, na ngamwĩthukĩĩsya.”—YELEMIA 29:11, 12.
-
“Ĩkĩa methoi makwa sũvanĩ waku; ti maandĩke ĩvukunĩ yaku?”—SAVULI 56:8.
NGAI NŨTWĨSĨ, NŨTŨELEAWA, NA NŨTWĨWʼĨAA TEI
Kũmanya kana Ngai nũtwĩwʼĩaa tei no kũtũtetheesye kũmĩanĩsya na mathĩna? Kwasũanĩa kĩla kyamũkwatie Maria:
“Ndyonaa vata wa kwĩthĩwa nĩ thayũ ĩtina wa kũũmĩa mũno nũndũ wa kũkwʼĩĩwa nĩ kamwana kakwa ka myaka 18, kala kawaĩte kanza myaka ĩlĩ. Nĩnamũthatĩe Yeova nũndũ wa kũlea kũvosya kamwana kau!
“Ĩtina wa myaka thanthatũ, mũnyanyawa waĩ na tei kuma kĩkundinĩ kitũ nĩwambĩthukĩĩisye ndimũelesya ũndũ noonaa Yeova ta ũtambendete. Ĩtina wa kũmbĩthukĩĩsya ate kũlikĩlĩĩla vandũ va masaa meana ũndũ mũna, nĩwandavisye mũsoa wangiitie ngoo. Mũsoa ũsu wĩ ĩandĩkonĩ ya 1 Yoana 3:19, 20 yĩla yaasya: ‘Ngai nĩ mũnene kwĩ ngoo sitũ, na nĩwĩsĩ maũndũ onthe.’ Nĩwandavisye kana Yeova nũeleawa nĩ mathĩna maitũ.
“Ĩndĩ o na ũu wĩ o vo, ndwaĩ ũndũ wĩ laisi kũveta ũthatu ngoonĩ yakwa! Nĩnasyokie nasoma ĩandĩko ya Savuli 94:19, yĩla yaasya atĩĩ: ‘Mosũanĩonĩ makwa maingĩ nthĩnĩ wakwa, mokiakisyo maku nĩmatanĩthisye ngoo yakwa.’ Neewie ta inyie naandĩkĩawa mĩsoa ĩsu! Ĩtina, nĩneewie naĩle kũneena na Yeova ĩũlũ wa mathĩna makwa, nde na nzika kana nĩwĩthukĩĩasya na nũeleawa.”
Nĩ ũndũ wa kũkiakisya mũno kũmanya kana Yeova nũtũeleawa na nũtwĩwʼĩaa tei! Ĩndĩ, nĩkĩ kwĩ na mathĩna maingĩ? Nĩvatonyeka ũkethĩa nĩ Ngai wĩthĩawa aitũsilĩla nũndũ wa mavĩtyo maitũ? Ngai akeeka ata nĩ kana amine mathĩna onthe? Maũndũ asu nĩmekũneenewa ilungunĩ ila iatĩĩe.
No Wendeewʼe Nĩ Ii
MŨSYAĨĨSYA
Mo Mathĩna Nĩ Ũsilĩlo Kuma kwa Ngai?
We Ngai atũmĩaa maũndũ ta mowau kana mĩisyo kũsilĩla andũ nũndũ wa naĩ syoo?
