Yeova nĩwendete kũmanyĩsya andũ make. Na nũndũ wa ũu, ũseũvyo wake nĩwambĩĩsye sukulu kauta ila imanyĩasya amanyĩwʼa ũndũ matonya kwĩanĩsya ianda syoo. Sukulu ĩmwe katĩ wa isu nĩ Sukulu ya Atavanyʼa ma Ũsumbĩ (SKE). Myakanĩ ya mĩtũkĩ, ũseũvyo wa Yeova nĩwĩthĩĩtwe ũyaĩlangya masomo ala matwaĩĩawʼa sukulunĩ isu. Na ti ũu wĩ wʼoka ĩndĩ nĩwĩthĩĩtwe ũyaĩlangya myako ĩla sukulu isu itwaĩĩawʼa. Kĩeleelo kĩnene kya kwĩka ũu nĩ kũĩkĩĩthya kana alimũ nĩmamanyĩsya vate mathĩna, namo amanyĩwʼa nĩmeemanyĩsya mateũthĩnĩka. Mĩvothi yaku ĩtetheeasya ata kwĩanĩsya mũvango ũsu?

 Kwa myaka mingĩ, sukulu sya kĩtheokulasi nĩsyĩthĩĩtwe iyĩkĩwa Nyũmbanĩ sya Ũsumbĩ na Nyũmbanĩ sya Maũmbano Manene. Kwoou nĩkĩ twĩthĩĩtwe tũyaka kana kũtũngĩĩa nyũmba mbingangĩ sya kwĩkĩa sukulu isu? Sũanĩa itumi itatũ.

 Kwĩ na vata mũnenange. Christopher Mavor, ũla nĩ mũtetheesya wa Kamitii ya Ũthũkũmi ya Nzama Ĩla Ĩtongoesye aĩtye: “Movisi ma ũvonge nĩmatũtavĩtye kana nĩvekwendeka ana-a-asa na eĩtu-a-asa aingangĩ ma kũtetheesya wĩanĩ wa kũtavanyʼa. Kwa ngelekanyʼo, mwaka wa 2019, ovisi wa ũvonge wa Brazil waisye kana nĩvendekaa ana-a-asa na eĩtu-a-asa ta 7,600, maminĩte sukulu ya SKE nĩ kana matetheesye wĩanĩ wa kũtavanyʼa kĩsionĩ kĩu.” Ovisi wa ũvonge wa Amelika nũwetete kana ve na vata mũnene wa mavainia me na ũtũĩka matonya kũmanyĩsya angĩ kũtavanyʼa taoninĩ ila nene, ilĩndĩnĩ, na yela. O na ĩngĩ ve na vata wa ana-a-asa ma kũthũkũma Mũvĩanĩ wa Kũvangĩthya na Kwaka Myako ya Ũsumbĩ na Kamitiinĩ sya Maũndũ ma Sivitalĩ. Onthe ala mamina sukulu ya SKE no matetheesye maũndũnĩ asu.

 Kwongeleka kwa amanyĩwʼa. Movisi maingĩ ma ũvonge nĩmakwatĩte vomu mbingĩ sya amanyĩwʼa ala mekwenda kũthi sukulu. Ĩndĩ o na vailye ũu, movisi asu mayĩthĩawa na ũtonyi wa kũmathokya onthe. Kwa ngelekanyʼo, ovisi wa ũvonge wa Brazil nĩwakwatie mavalũa ta 2,500 ma SKE kwa ĩvinda ya mwaka o ũmwe. Ĩndĩ nũndũ ovisi ũsu ndwaĩ na kũndũ kũtonya kwĩanĩa amanyĩwʼa asu onthe, weetie o amanyĩwʼa 950.

 Kũndũ kũseo kwa kwĩkala. Yĩla amanyĩwʼa meekĩa sukulu Nyũmbanĩ ya Ũsumbĩ kana Nyũmbanĩ ya Maũmbano Manene, ana-a-asa na eĩtu-a-asa ma kĩsio kĩu nĩmo mamathokasya kwoo. Mũvango ũsu ũthũkũmaa nesa nthĩnĩ wa nthĩ ila ilasi o nini ivangĩĩawa kĩla mwaka. Ĩndĩ no wĩthĩwe wĩ ũndũ ũte laisi kwa atavanyʼa kũthokya amanyĩwʼa mĩsyĩ kwoo, isionĩ ila kwĩthĩawa na ilasi kauta kwa mwaka. Kwoou nyũmba sya kũkoma nĩsyakawa vakuvĩ na vala sukulu ĩkekĩawa, na mũno mũno syĩthĩawa kwondũ wa amanyĩwʼa.

 Nyũmba ya kwĩkĩa o kĩlasi kĩmwe, vamwe na nyũmba sya kwĩkala sya alimũ na amanyĩwʼa vakuvĩ 30, no ikue ndola vakuvĩ milioni siana ũna sya Amelika, kwosana na vala kĩsio kĩĩ na maũndũ angĩ ta asu.

 Mavinda maingĩ sukulu syakawa kĩsionĩ kĩte na kelele, vaasa na taoni ĩla nene, ĩndĩ kũte thĩna wa ngalĩ sya kũthi kwʼo. O na ĩngĩ ve maũndũ angĩ masũanĩawa ta, ethĩwa ve na atavanyʼa matoetye kwĩyumya matetheesye kũsũvĩa nyũmba isu na syĩndũ ila syĩ vo.

 Myako ĩsu nĩyĩthĩawa na nyũmba sya mavuku ma kwĩka ũkunĩkĩli, kũndũ kwa kũsomea, kombiũta, masinĩ sya kũtumbĩthya, na syĩndũ ingĩ. Kaingĩ, vethĩawa na nyũmba ĩla amanyĩwʼa na alimũ matonya kũĩĩa lĩu me vamwe. O na ĩngĩ vethĩawa na mwanya ũtoetye wa kwĩkĩa masoesi na kũthyũmũa.

 Nĩtũvangaa ũndũ kĩlasi kĩkwĩthĩwa kĩilye. Troy, ũla ũthũkũmanaa na Mũvĩa wa Nthĩ Yonthe wa Kũvangĩthya na Kwaka Myako ya Ũsumbĩ, ũla wĩ Warwick, New York, aĩtye: “Nĩtwaneenie na Mũvĩa wa Masukulu ma Kĩtheokulasi ũtũtetheesye kũmanya ũndũ tũtonya kũseũvya ilasi kwa nzĩa amanyĩwʼa matonya kũtanĩa yĩla mekwĩmanyĩsya. Ana-a-asa nĩmatũnengie myolooto ĩkonetye ũnene wa ilasi ila tũkwaka, ũndũ syaĩle kwĩthĩwa ivangĩtwe, o vamwe na kyeni na syĩndũ sya kwĩthukĩĩsya na kwĩloela vitio.” Aiweta ĩũlũ wa mĩio ya wasya, Zoltán, ũla nĩ mwalimũ wa SKE kuma Hungary aĩtye: “Mbeenĩ, tũyaĩ na maikulovoni o na ĩmwe, kwoou mavinda maingĩ tweekaa kũlilikanyʼa amanyĩwʼa maneene na wasya mũnene. Ĩndĩ thĩna ũsu nĩwathelile nũndũ yu kĩla mesa yĩ na maikulovoni yayo!”

 Nyũmba na syĩndũ sya kũtũmĩa sukulu ila syaĩlangĩtwʼe itumĩte alimũ na amanyĩwʼa matetheka ata? Angela, ũla waendie sukulu ya SKE taoninĩ ya Palm Coast, ĩla yĩ Florida, Amelika, aĩtye: “Nĩ vandũ vaseo mũno na vauĩtye.” Ongelete kwasya, “Kĩla kĩndũ kĩvangĩtwe nesa, na ũu nĩ vamwe na kĩlasi, na kũndũ kwa kwĩkala, nĩ kana wĩthĩe no tũtanĩe yĩla tũkwĩmanyĩsya.” Csaba ũla nĩ mwalimũ kuma nthĩ ya Hungary, nũtũngaa mũvea nũndũ wa myanya ĩla makwataa ya kũya vamwe na amanyĩwʼa. Ongelete kwasya: “Mavinda ta asu amanyĩwʼa nĩmakothaa kũtũelesya maũndũ ala makomanĩte namo. Kĩu kĩtumaa tũmamanya nesanga. Na nũndũ wa ũu, twĩthĩawa tũtonya kũtũmĩa nesa vyũ ũvoo ũla tũũmanyĩsya nĩ kana wosane na mavata ma amanyĩwʼa.”

 Amanyĩwʼa na alimũ monaa nyũmba sya kwĩkĩa sukulu ila syaĩlangĩtwʼe ne ũathimo kuma kwa Mũmanyĩsya witũ Ũla Mũnene Vyũ, Yeova. (Isaia 30:20, 21) Mwĩĩtu-a-asa ũmwe kuma Philippines, ũla waendie sukulu ya SKE ĩla yeekĩawa mwakonĩ ũmwe watwʼĩkĩthiwʼe nyũmba ya kwĩkĩaa sukulu, aisye atĩĩ: “Mawĩthyũlũlũko ma sukulu ĩsu matũlilikanilye kana tũi o amanyĩwʼa tũ ĩndĩ twĩ aeni ma mwanya ma Yeova. Endaa tũtanĩe yĩla tũkwĩmanyĩsya Ndeto yake na kĩthito.”

 Nyũmba sya kwĩkĩa sukulu no syakwe, ikatũngĩĩwa, na ikasũvĩwa nũndũ wa mĩvothi yaku, na mingĩ yayo yumawʼa kwĩsĩla donate.isa4310.com. Nĩ mũvea mũno nũndũ wa ũlau waku.