Matukũ aa Ngũsĩ sya Yeova, nĩsyĩsĩkĩe mũno nũndũ wa wĩa wasyo wa kũtavany’a nyũmba na nyũmba, nĩsyonekaa mũno iitavany’a kũla kwĩthĩawa na andũ aingĩ iitũmĩa tũkalĩ twa kwilĩĩla mavuku.

Ĩvinda yĩte ĩasa ĩvĩtu, nzĩa ĩno ya kũtavany’a nĩnambĩĩie kũtũmĩwa mũno. Mweinĩ wa 11, 2011, Ngũsĩ sya Yeova taoninĩ ya New York nĩsyambĩĩie kũtavya andũ ũvoo matũmĩĩte mesa na tũkalĩ twa kwilĩĩla mavuku. Nzĩa ĩsu yaĩ na mosyao maseo nginya atavany’a mambĩĩa kũmĩtũmĩa taoninĩ ingĩ.

Kũvikĩĩa Mwei wa 3, 2015, tũkalĩ 165,390 nĩtwanenganĩtwe ikundinĩ syĩ kĩvathũkany’o sya Ngũsĩ sya Yeova nthĩ yonthe. O na kwĩ na tũsũmba mũthemba wa kiosk, sitandi sya kwilĩĩla mavuku, na mesa ngili mbingĩ inenganĩtwe kwondũ wa kũtũmĩwa ũtavany’anĩ.

Kũtavany’a nyũmba na nyũmba nĩ yo nzĩa ĩla nene Ngũsĩ itũmĩaa. Ĩndĩ kũtũmĩa tũkalĩ twa kwilĩĩla mavuku nĩkwĩthĩĩtwe na mosyao maseo. Kwasũanĩa ngelekany’o ii:

Mũndũũme ũmwe wĩtawa Raul kuma nthĩ ya Peru, nĩwaendie vala Ngũsĩ syatavanasya na kakalĩ ka kwilĩĩla mavuku na amakũlya: “Mwaaĩe va? Nĩmanthĩte Ngũsĩ kwa ĩvinda ya myaka ĩtatũ! Na ĩla noona kakalĩ kaa kenyu, namũtũngĩa Ngai mũvea.”

O na kau Ngũsĩ nĩsyatavanasya kĩsionĩ kyoo mũno, Raul ndeethĩawa mũsyĩ mũthenya, kana wikendi. Aeleisye kana vau mbeenĩ nĩweemanyĩasya Mbivilia na Ngũsĩ na nĩwendaa kũendeea kwĩmanyĩsya. Mĩvango nĩyeekiwe nĩ kana ambĩĩe kwĩmanyĩsya Mbivilia ĩngĩ.

Nakw’o nthĩ ya Bulgaria, mũndũũme ũmwe na kĩveti kyake, mate akũũ mũno, nĩmongamie vala vaiĩtwe kakalĩ ka mavuku na moosa ĩvuku Siri ya Kupata Furaha ya Familia. Kyumwa kĩla kyaatĩĩe nĩmasyokie na moosa mavuku angĩ elĩ: Ĩvuku Yakwa ya Ngewa sya Mbivilia na Jifunze Kutoka kwa Mwalimu Mkuu. Mwana-a-asa ũla watavanasya na kakalĩ kau nĩwamakũlilye me na syana siana. Maisye atĩĩ: “Tũinamba kũkwata kana, ĩndĩ ĩla twĩkwata, tũvangĩte tũkakamanyĩsya ĩũlũ wa Ngai. Mavuku aa makatũtetheesya mũno.”

Mũndũũme ũngĩ wa nthĩ ya Ukraine, ũla weekĩĩte ngũa sya ita nĩwaendie vala Ngũsĩ syatavanĩasya na kakalĩ ka mavuku. Asyĩie atĩĩ: “Eĩtu, ndavyei Ali–Maketoni ĩkooka ĩndĩĩ.” Mũndũũme ũsu aĩ anauma kaũnĩ wa nthĩ ya Ukraine. Maũndũ ala maendeee ĩũlũ wa nthĩ nĩmamũĩkĩĩthĩtye kana Ali–Maketoni yĩ vakuvĩ, na aseng’aa nĩkĩ Ngai ũtaaĩsa kwosa ĩtambya. Atavany’a asu nĩmatũmĩie Mbivilia kũmũelesya kana Ngai e na kĩtumi kĩseo kya kũlea kwosa ĩtambya, na kana o mĩtũkĩ nũkamina andũ onthe athũku. Mũndũũme ũsu nĩwoosie makaseti ma Mũsyaĩĩsya, ma Amkeni!, na ĩvuku Je, Kuna Muumba Anayekujali?

Nakw’o nthĩ ya Macedonia, mũndũũme ũmwe wa mũika nĩwatavisye Ngũsĩ imwe syatavanasya na kakalĩ ka mavuku kana nĩwasomete makaseti moo ĩndĩ yu endaa ĩvuku Mbivilia Yo Ĩmanyĩasya Ata? Ameie kana eyĩsoma avika mũsyĩ oou.

Ĩtina wa masaa elĩ ou, mũndũũme ũsu nĩwasyokie na aĩ anasoma mathangũ 79 ma mbee ĩvukunĩ yĩu. Aisye atĩĩ: “Ĩvuku yĩĩ nĩyĩalyũlaa andũ! Nĩnoona kana maũndũ maingĩ ala nĩĩkĩĩaa ti ma w’o. Maũndũ onthe ala ĩvuku yĩĩ yĩeleetye nĩmosanĩte na kĩlĩko. Yatuma nĩalyũla vyũ woni wakwa ĩũlũ wa maũndũ!”