Marta, ũla nĩ ũmwe wa Ngũsĩ sya Yeova kĩsionĩ kya Guatemala, emanyĩasya kĩthyomo kya Kekchi nĩ kana atetheesye andũ ala maneenaa kĩthyomo kĩu memanyĩsye Mbivilia. Mũthenya ũmwe nĩwoonie mũndũũme aumĩte sivitalĩ. Amũsisya nesa nĩwamanyie nũtonya kwĩthĩwa aumĩte kĩsionĩ kĩ iĩmanĩ kĩtatavanawʼa mũno nĩ Ngũsĩ sya Yeova, kĩla kĩtwĩe andũ maneenaa kĩthyomo kya Kekchi. Nĩwatatie kũmũneenyʼa aitũmĩa kĩthyomo kĩu o na kau ndaambĩte kũkĩmanya vyũ.

 Marta nĩwakũlilye mũndũũme ũsu memanyĩsye Mbivilia. Nĩweetĩkĩlile e mũtanu kwĩmanyĩsya, ĩndĩ amwĩa nde na mbesa sya kũĩvĩa masomo asu. Marta nĩwamũeleisye kana Ngũsĩ sya Yeova imanyĩasya andũ Mbivilia vate ndĩvi. Ĩngĩ, nĩwamũtavisye kana o na kau e vaasa, no amũkũnĩae simũ makemanyĩsya Mbivilia e na andũ ala angĩ ma mũsyĩ wake. Mũndũũme ũsu nĩweetĩkĩlile mũvango ũsu. Marta nĩwamũnengie Mbivilia ya Ũalyũlo wa Nthĩ Nzaũ ya kĩthyomo kya Spanish nũndũ aĩ atonya kũsoma na kũandĩka kĩthyomo kĩu. Nĩwasyokie amũnenge ĩvuku ya kwĩmanyĩsya Mbivilia yĩtawa Mbivilia Yo Ĩmanyĩasya Ata? ya kĩthyomo kya Kekchi. Kyumwa kĩla kyaatĩĩe, Marta nĩwakũnĩie mũndũũme ũsu simũ na mambĩĩa kwĩmanyĩsya Mbivilia vamwe na kĩveti kyake na syana syoo ilĩ. Meemanyĩasya kelĩ kwa kyumwa. Marta aĩtye: “Tweemanyĩasya na kĩthyomo kya Spanish, na nũndũ mũka wa mũndũũme ũsu ndaeleawa kĩthyomo kĩu, mũũme nĩwe wamũtetheeasya kũelewa kĩla tũkwĩmanyĩsya. Syana syoo nĩsyaeleawa kĩthyomo kya Spanish.”

 Mũndũũme ũsu aĩ Vasita ĩkanisanĩ yake. Nĩwambĩĩie kũmanyĩsya aatĩĩi make kĩla waĩ anambĩĩa kwĩmanyĩsya Mbivilianĩ. Andũ ma kanisa wake nĩmendeeiwʼe mũno nĩ momanyĩsyo asu na mamũkũlya vala wĩmanyĩĩtye maũndũ asu. Yĩla wamaeleisye ũndũ wĩthĩĩtwe ayĩmanyĩsya Mbivilia, nĩmendeeiwʼe nĩ mũvango ũsu. Mambĩĩie na ũmwe na ĩtina wa ĩvinda ĩkuvĩ mongeleka mavika kĩkundi kya andũ 15 kĩla Marta wamanyĩasya Mbivilia simũnĩ me vamwe kĩla kyumwa. Ĩtina wa ĩvinda nĩmambĩĩie kũthengeeasya kĩndũ kya kwosa wasya (microphone) vau simũnĩ na maikwatanyʼa na sivika nĩ kana kĩla mũndũ ewʼe nesa.

 Yĩla Marta watavisye atumĩa ma kĩkundi kyake ĩũlũ wa andũ asu waendeee kũmanyĩsya Mbivilia, mũtumĩa ũmwe nĩwaendie kĩsionĩ kĩu akakomane na amanyĩwʼa asu. Nĩwamathokisye mathi makethukĩĩsye ũvoo waĩ umwʼe nĩ mũsyaĩĩsya wa mũthyũlũlũko a kĩsionĩ kĩngĩ kyaĩ vaasa. Kũvika vo waĩ mũendo wa ĩsaa yĩmwe na ngalĩ na ũisyoka ũthi na maaũ masaa elĩ. Amanyĩwʼa 17 nĩmaendie kwĩthukĩĩsya ũvoo ũsu.

 Ĩtina wa syumwa siana ũna mũsyaĩĩsya ũsu na atavanyʼa angĩ meana ũna nĩmathokeie amanyĩwʼa asu na matindanyʼa namo mĩthenya ĩna. Masaa ma kwakya meeloela vitio sya Mbivilia sya Kĩthyomo kya Kekchi nthĩnĩ wa jw.org, na mayĩmanyĩsya kavuku ketawa Naaũ Mekaa Kwenda kwa Yeova Ũmũnthĩ? Masaa ma wĩoo meeloelaa vitio ingĩ nthĩnĩ wa JW Broadcasting. O na ĩngĩ, mũsyaĩĩsya ũsu wa mũthyũlũlũko nĩwavangĩthisye kĩla mũmanyĩwʼa ethĩwe na mwalimũ wake wa Mbivilia.

 O na ĩngĩ, mĩthenya ĩsu ĩna maĩ kũu, nĩmatavanisye isionĩ ingĩ syaĩ vakuvĩ na kĩsio kĩu ila ineenawa kĩthyomo kya Kekchi na mathokya ekali ma kũu ũmbanonĩ wa mwanya weekiwe kĩsionĩ kĩu. Andũ 47 nĩmookie ũmbanonĩ ũsu na ana-a-asa mathokya onthe mambĩĩe kwĩmanyĩsya Mbivilia. Andũ kuma mĩsyĩ 11 nĩmeetĩkĩlile kwĩka ũu.

 Ĩtina wa myei mĩvũthũ, atumĩa ma kĩkundi nĩmeekie mĩvango kwĩthĩawe na maũmbano kĩla wikendi kĩsionĩ kĩu. Ũmũnthĩ, andũ ta 40 nĩmokaa maũmbano kĩla kyumwa. Na yĩla ana-a-asa meekie ũmbano wa kũlilikana kĩkwʼũ kya Yesũ kĩsionĩ kĩu, matanie mũno kwona andũ 91 mooka.

 Marta aĩtye ũũ asũanĩa vala ngewa ĩsu yonthe yambĩĩe na ũndũ yesie kumya mũthya: “Nĩmũtũngĩaa Yeova mũvea mũno. Mavinda amwe nĩwʼaa ndesa kwĩanĩsya maũndũ maingĩ. Ĩndĩ ithyĩ tũilye ta mĩio ya wĩa mokonĩ ma Ngai. Nĩweesĩ ũndũ ngoo sya andũ ala maĩ kĩsionĩ kĩu iilye. Na nĩwamakusisye amaete andũnĩ make. Yeova nũmendete.”