Mungdan Ga Daga Masha Wunawng Wuwa Sat Hkrum Ai Lam Myit Dum Ai Nhtoi hpe 2023, January 27 hta masha law law galaw na re. Lai wa sai 75 ning jan hta byin wa ai hkrit hpa mabyin a majaw, Karai Kasang gaw masha wunawng wuwa sat hkrum ai lam hpe hpa majaw ahkang jaw da ai kun? ngu ai ga san pru wa shangun ai.

•   Chyum Laika hta hpa tsun da ai hpe chye na matu, “Masha Wunawng Wuwa Hpe Sat Ai Lam Ni Hpa Majaw Byin Ai Kun? Karai Kasang Gaw Dai Lam Hpe Hpa Majaw N Jahkring Kau Ya Ai Kun?” ngu ai sumhpa hpe hti u.

 Grai hkrit hpa Masha Wunawng Wuwa Sat Ai Lam hpe, laksan hku nna Ju masha ni hkrum sha wa ai. Masing jahkrat nna sat ai hpe wan hku law ai masha ni hkrum wa ai. Kaga hpung ni kaw na masha law law mung, Masha Wunawng Wuwa Sat Ai Lam byin ai aten hta sat hkrum wa ai. Dai hta Yehowa Sakse ni mung lawm ai. Shanhte gaw Chyum Laika makam masham a majaw, dai zawn zingri zingrat hkrum ai re.

•   Grau chye mayu yang, “Masha Wu Nawng Wu Wa Sat Hkrum Ai Aten Hta Yehowa Sakse Ni Hpa Byin Wa Ai Kun?” ngu ai sumhpa hpe hti u.

 Masha law law gaw, Masha Wunawng Wuwa Sat Hkrum Ai Lam zawn re ai mabyin bai byin na hpe hkrit ai. Kabu hpa gaw, dai zawn yawn hpa mabyin ni htawm hpang hta byin sana n re ngu Chyum Laika hta ga sadi jaw da ai.

•   “Yehowa ning nga ai: Nanhte a lam ngai myit ai hku, ngai chye nga nngai: nanhte hpe jahten na n rai; nanhte myit mada ai lam, htawm hpang e lu la hkra, ngwi pyaw ai hku hkrai ngai myit nga nngai.”—Yeremia 29:11. a

 Yehowa Karai Kasang gaw, nhkru ai nat hpe shamyit kau nna shi a majaw hten za mat ai lam yawng hpe bai kaja hkra galaw ya ai aten hta, dai myit mada lam hpring tsup wa na re. Kade n na yang ndai lam ni hpe galaw ya sana re:

•   Hkra machyi hkra galaw ai nhkru ai masha ni hpe shamyit kau na.—Ga Shagawp 2:22.

•   Yakhkak jamjau hkrum nga ai ni hpe shamai shatsai ya na.—Shingran 21:4.

•   Si mat ai ni hpe mungkan ga hta asak bai hkrung hkra galaw ya na.—Yawhan 5:28, 29.

 Chyum Laika hta tsun da ai shalan shabran ya ai myit mada lam hpe nang kam mai ai. Hpa majaw kam mai ai hpe chye na matu, manu jahpu n jaw ra ai marai langai ngai hte Chyum Laika rau hkaja lamang hpe chyam yu na matu nang hpe saw shaga ai.