Teng man ai lam hku nawku daw jau ai wa hte shut shai ai hku nawku daw jau ai wa lapran shai ai lam hpe chye lu hkra Chyum Laika hta, n dai hku ga shadawn lang nna tsun da ai: “Shanhte a asi hte shanhte hpe chye lu na rai mu ai. Ju hpun hta na tsabyi si, salau hpun hta na maihpang si di la lu a ni?” (Mahte 7:16) Asi hpe yu nna ju hpun hte tsabyi hpun hpe chye ginhka lu ai zawn, lailen hpe yu nna teng man ai hte shut shai ai nawku daw jau ai lam hpe nang ginhka lu ai.

1.   Teng man ai nawku htung gaw, masha a ningmu hpe n re ai sha, Chyum Laika hpe madung tawn nna sharin ya ai. (Yawhan 4:24; 17:17) Dai hta, wenyi hte seng ai lam, mungkan hparadisu hta lu la na htani htana asak myit mada lam hte seng ai teng man ai lam ni lawm ai. (Shakawn 37:29; Esaia 35:5, 6; Ezekela 18:4, JCLB) Dai sha n-ga, shut shai ai nawku htung ni a lam ni hpe mung tsun dan ai.​—Mahte 15:8-9; 23:27, 28.

2.   Teng man ai nawku htung gaw, masha ni Karai Kasang a lam chye wa na matu hte Karai Kasang a amying gaw Yehowa re ai lam chye wa hkra karum ya ai. (Shakawn 83:17; Esaia 42:8; Yawhan 17:3, 6) Karai Kasang gaw shinggyim masha ni hte san san nga ai ngu sharin ya na malai, anhte hte hku hkau nihtep mayu ai ngu sharin ya ai.​—Yaku 4:8.

3.   Teng man ai nawku htung gaw, Yesu Hkristu hku nna sha Karai Kasang hkye hkrang la ai lam jaw ai hpe sharin ya ai. (Kasa 4:10, 12) Teng man ai nawku htung hta nga ai ni gaw, Yesu a ga matsun ni hpe hkan sa nna, shi a prat hkrun lam hpe shakut nna kasi la ai.​—Yawhan 13:15; 15:14.

4.   Teng man ai nawku htung gaw, shinggyim masha ni a matu Karai Kasang A Mungdan sha, myit mada lam re ai hpe hkap la ai. Dai majaw, shanhte ni gaw Karai Kasang A Mungdan hte seng ai lam ni hpe kaga masha ni hpe myit lawm let tsun dan nga ai.​—Mahte 10:7; 24:14.

5.   Teng man ai nawku htung gaw, tingkyeng akyu n tam ai tsawra myit madun na matu n-gun jaw ai. (Yawhan 13:35) Dai hta n-ga, gara amyu, gara masha hpe mung hkungga na matu, htunghking, shingdu labau hte amyu ga n bung timung n ginhka ai sha kanawn mazum na matu sharin ya ai. (Kasa 10:34, 35) Teng man ai nawku htung kaw nna masha ni gaw tsawra myit hpe madung tawn ai majaw, majan hta n shang lawm ma ai.​—Mihka 4:3; 1 Yawhan 3:11, 12.

6.   Teng man ai nawku htung kaw shabrai sha ai tara hkaw sara n nga ai. Teng man ai nawku htung hta nga ai masha ni a lapran hta, madang tsaw ai arawng sadang amying ni jaw ai mung n nga ai.​—Mahte 23:8-12; 1 Petru 5:2, 3.

7.   Teng man ai nawku htung gaw mung masa lam ni kaw n shang lawm ai. (Yawhan 17:16; 18:36) Raitim, teng man ai nawku htung hta nga ai masha ni gaw, shanhte nga ai mungdan asuya a tara upadi ni hpe hkungga nna madat mara ai. “Kehta hte seng ai hpe gaw, Kehta hpe ya mu; Karai Kasang hte seng ai hpe mung Karai Kasang hpe ya mu” ngu ai Chyum Laika Tara hpe hkan sa ai.​—Marku 12:17; Roma 13:1, 2.

8.   Teng man ai nawku htung ngu ai gaw prat hkrun lam langai re ai. Htung hking lailen n re ai. Teng man ai nawku htung hta nga ai masha ni gaw, masa lam yawng hta Chyum Laika a tsang madang ni hte maren hkan sa nna asak hkrung ma ai. (Ehpesu 5:3-5; 1 Yawhan 3:18) Shanhte gaw ngwi pyaw lam n nga nna, garen gari hkamsha nga ai masha ni n re. “A rawng ai Karai Kasang” hpe nawku ai majaw, grai kabu gara nga ma ai.​—1 Timohti 1:11.

9.   Teng man ai nawku htung hpe hkan sa ai masha gaw law law nga na n re. (Mahte 7:13, 14) Teng man ai nawku htung hta nga ai masha ni gaw, Karai Kasang a myit ra ai hku galaw ai majaw, yu kaji hkrum ai, jahpoi asawng hkrum ai, zingri zingrat hkrum ai.​—Mahte 5:10-12.

Teng man ai nawku htung ngu ai gaw tinang ra sharawng ai lam hta madung tawn ai nawku htung n re

 Tinang sharawng ai lam hpe sha madung tawn nna nawku htung hpe lata ai gaw shoihpa nga ai. Shinggyim masha ni gaw tinang “madat la mayu ai lam ni hpe sharin ya na sara ni shanhte a matu grau grau law wa hkra tam lahkawn la ai aten du na ra ai” nga nna Chyum Laika hta tau hkrau myihtoi htoi da ai. (2 Timohti 4:3, JCLB) Dai majaw, Chyum Laika hta ndai lam matsun hpe hkan sa na matu n-gun jaw da ai: “Naw ku htung chyawm gaw, Ru tsang kyin dut hkrum ai jahkrai nmai ni hte, gaida gaina ni hpe kawan katsan yu yu nna, mungkan ga a awu asin re ai hpe koi kau na gaw, Kawa Karai Kasang a man e san seng ai hte ra n rawng ai nawku htung rai nga ai.”​—Yaku 1:27; Yawhan 15:18, 19.