Karai a Mungdan gaw, shinggyim masha asuya yawng hpe yeng seng kau nna, mungkan ting hpe uphkang na re. (Daniela 2:44; Shingran 16:14) Dai aten du jang Karai a mungdan gaw . . .

•   Tingkyeng myit hte masha ni hpe sharu shatsang nga ai n kaja ai masha ni hpe yeng seng kau na. “Tara n lang ai ni chyawm gaw, dai mungdan na shamyit kau ai hkrum” na re.—Ga Shagawp 2:22.

•   Majan n nga sai. Karai Kasang gaw ‘ga ting hta na hpyen majan jasim kau’ ya na re.—Shakawn 46:9.

•   Ginding aga hpe nga mu nga mai shangun na. Simsa shangun na. “Langai hte langai tinang a tsabyi ru hte, tinang a lakum hpun nhpang hkan e dung nga nna, shanhte hpe jahkrit shama na wa, kadai” nga na n re.—Mihka 4:4.

•   Mungkan ga hpe Hparadisu byin hkra galaw ya na. “Nam mali hte hkraw hkun ai shara gaw, kabu gara na ra ai; zaibru jang mung awng sharawng nna, mari pan zawn pu na ra ai.”—Esaia 35:1.

•   Masha shagu hta, akyu nga nna myit dik shangun ai bungli nga na. “Shanhte galaw ai amu ni a jaw e shanhte hpring hpring tsup tsup kabu gara lu na mara ai. Shanhte galaw ai amu awng dang na mara ai.”—Esaia 65:21-23, JCLB.

•   Ana zingli yawng hpe yeng seng kau na. “Dai hta shanu ai wa gaw, Ngai machyi nga nngai, nga nna n tsun na ra ai.”—Esaia 33:24.

•   Ding gai ding la ai lam n nga hkra galaw ya na. “Shi a hkum shan gaw ma kaji a hkum shan zawn hkalung wa nna, shi gaw brang ram prat bai galai na ra ai.”—Yoba 33:25.

•   Si mat ai ni hpe bai jahkrung sharawt ya na. “Lup ni hta rawng nga ai ni nlang hte gaw shi a nsen na nna, pru lu na ahkying du na ra ai.”—Yawhan 5:28, 29.