Talalit n llufan, si tama, aţ-​ţessefṛeḥ imawlan-​is, si tama nniḍen, a ten-​thewwel. Ay imezwaǧen, m’ara wen-​d-​ilal llufan amezwaru, ahat aţ-​ţwehmem m’ara twalim belli amur ameqran si lweqt-​nwen akk-​d lǧehd-​nwen yeţṛuḥu i llufan-​nni. M’ara ken-​ixaṣṣ yiḍeṣ yerna yeţţucewwel lḥisas-​nwen, ayagi yezmer ad isɛeddi lɛalaqa-​nwen di ccedda tameqrant. Ilaq-​awen i sin aţ-​ţqeblem liḥala-​yagi tajdiṭ akken aţ-​ţbeddem ɣer llufan-​nwen w’aţ-​ţḥarbem ɣef zzwaǧ-​nwen. Amek ara ken-ɛiwnent lewṣayat n Wedlis Iqedsen akken aţ-​ţqablem liḥala-​ya?

AYEN I D-​IQQAR WEDLIS IQEDSEN: “Leḥmala, iwseɛ lxaṭer-​is, leḥmala tesɛa lxiṛ” yerna “ur teţnadi ara ɣef nnfeɛ-​is, ur treffu ara.” (1 Ikurintiyen 13:4, 5) Kem a tayemmaţ, i d-​isɛan llufan amenzu, bla ccekk teţţelhayeḍ-​d dima yid-​es. Lameɛna, izmer wergaz-​im ad iḥuss am wakken testehzaḍ deg-​s. Ihi, mmekti-​d belli ula d neţţa yeḥwaǧ a d-​telhiḍ yid-​es. S ṣṣber akk-​d leḥnana, ɛiwen-​it ad iḥuss belli yeṣleḥ yerna teɛna-​t ţṛebga n llufan-​nwen.

Adlis Iqedsen inna-​d: “Kwenwi [...], ay irgazen, lḥut s leɛqel i tlawin-​nwen.” (1 Buṭrus 3:7) Ay ababat, steɛṛef belli tameṭṭut-​ik aţ-​ţefk amur ameqran si lǧehd-​is i llufan-​nwen. Imi tesɛa lecɣal ijdiden ara tqabel, tezmer aţ-​ţetqelleq, aţ-​ţeɛyu neɣ aţ-​ţefcel maḍi. Tikwal, tezmer ahat a d-​terr fell-​ak zzɛaf-​is, lameɛna qqim tetheddneḍ, axaṭer “win ẓẓayen i reffu xiṛ n lefḥel.” (Lemtul 16:32) Tɛeqqel yerna ţţak-​as lemɛawna i teḥwaǧ.—Lemtul 14:29.

AYEN I TZEMREḌ AŢ-​ŢXEDMEḌ:

• Ay ababat: Ɛiwen tameṭṭut-​ik a d-​telhi d llufan-​nwen, ula deg yiḍ. Ḥudd-​ed tilisa i lweqt i tesɛeddayeḍ di leḥwayeǧ nniḍen iwakken a d-​tessigreḍ akteṛ n lweqt ara tesɛeddiḍ ţ-​ţmeṭṭut-​ik d llufan-​ik

• A tayemmaţ: M’ara yebɣu wergaz-​im a kem-​iɛiwen di ccɣel yeɛnan llufan-​nwen, ur ţţagi ara. Ma yella ur iwenneɛ ara ccɣel-​nni, ur t-​ţlummu ara, meɛna mel-​as s leɛqel amek ara yexdem

AYEN I D-​IQQAR WEDLIS IQEDSEN: “Ad uɣalen d yiwet n lǧeţţa.” (Laṣel n ddunit 2:24) Ɣas ma yella tewseɛ twacult-​nwen, ur ilaq ara aţ-​ţeţţum belli kečč ţ-​ţmeṭṭut-​ik d “yiwet n lǧeţţa” i tellam. Xedmet ayen akk iwumi i tzemrem akken aţ-​ţeqqim lɛalaqa-​nwen teǧhed.

Kemm, a tameṭṭut, cekkeṛ argaz-​im imi ibedd ɣur-​em yerna yeţɛawan-​ikem. Ayagi a s-​yili “d ddwa.” (Lemtul 12:18) Kečč, ay argaz, qqar-​as i tmeṭṭut-​ik acḥal i ţ-​tḥemmleḍ d wacḥal i k-​teɛǧeb. Cekkeṛ-​iţ ɣef wamek i tbedd ɣer twacult.—Lemtul 31:10, 28.

“Ur ţnadit ara ɣef nnfeɛ-​nwen kan kunwi, meɛna nadit ɣef nnfeɛ n wiyaḍ.” (1 Ikurintiyen 10:24, Awal n tudert, 2001) Xeddem dima ayen yellan d lɛali-​t i tmeṭṭut-​ik. Heddṛet gar-​awen, yerna wa ad icekkeṛ wa, wa ad iḥess i wa. Deg wayen yeɛnan lɛalaqat-​nwen deg wusu, ur ţxemmim ara kan ɣef yiman-​ik. Mkul yiwen ad iḥebbeṛ i wayen yeḥwaǧ wayeḍ deg wannect-​a. Adlis Iqedsen yenna-​d: “Wa ur iţḥeṛṛim wa, siwa ma temtafaqem.” (1 Ikurintiyen 7:3-5) Ihi, heddṛet ɛinani kečč ţ-​ţmeṭṭut-​ik ɣef temsalt-​agi. Ma telliḍ d win iṣebbren yerna tfehhmeḍ tameṭṭut-​ik, aţ-​ţesseǧhdeḍ zzwaǧ-​nwen.

AYEN I TZEMREḌ AŢ-​ŢXEDMEḌ:

• Ɛzel-​ed lweqt ara tesɛeddiḍ ţ-​ţmeṭṭut-​ik di sin yid-​wen kan

• Sbeggen-​as-​d belli tḥemmleḍ-​ţ, ɣas s leḥwayeǧ timecṭaḥ. Di lemtel, aru-​yas kra n imeslayen neɣ efk-​as lḥaǧa

AYEN I D-​IQQAR WEDLIS IQEDSEN: “Seg wasmi i meẓẓiyeḍ, tessneḍ tira iqedsen; zemrent a k-​fkent lekyasa yeţţawin ɣer leslak.” (2 Timutawus 3:15) Meyyzet d acu ara txedmem akken aţ-​ţesselmdem llufan-​nwen. Llufan yesɛa tazmert akken ad yelmed xilla n leḥwayeǧ ula mi gella di tɛebbuṭ n yemma-​s. Uqbel akk a d-​ilal, yella iɛeqqel yakan taɣect-​nwen yerna iţţarra-​d s lexbaṛ i wayen i teţḥussum. Qqaret-​as tiktabin segmi ara yili d aleqqaq. Ɣas m’ur ifhim ara ayen i s-​teqqarem, yezmer lḥal a s-​teɛǧeb leqraya m’ara yimɣur.

Ur ḥeţţbet ara belli llufan-​nwen bezzaf meẓẓi bac a s-​thedṛem ɣef Ṛebbi. Ţẓallat i Yahwa yid-​es s taɣect ɛlayen. (Asmekti 11:19) Ula m’ara tleɛɛbem yid-​es, heddṛet-​as ɣef leḥwayeǧ i gexdem Ṛebbi. (Ahellil 78:3, 4) M’ara yeţţimɣur, ad iḥuss i leḥmala i tḥemmlem Yahwa w’a t-​iḥemmel ula d neţţa.

AYEN I TZEMREḌ AŢ-​ŢXEDMEḌ:

• Ḍleb i Ṛebbi a k-​d-​yefk lekyasa i gwulmen bac aţ-​ţesselmdeḍ llufan-​ik

• Ţɛawad-​as-​d i llufan-​ik tiktiwin (ixemmimen) akk-​d imeslayen yesɛan azal akken a ten-​yissin si temẓi