Mabalin Kadi nga Agikkat ti Maysa kas Saksi ni Jehova?

I-PLAY

Wen. Mabalin nga agikkat ti maysa iti organisasionmi iti dua a pamay-an:

Babaen iti pormal a panangibaga. Mabalin nga ibaga ti maysa nga indibidual ti desisionna a saannan a kayat ti maibilang a Saksi ni Jehova, berbal man wenno surat.
Babaen iti aramid. Mabalin nga agaramid ti maysa a tao iti banag a mangipakita a saannan a kayat ti maibilang kas Saksi ni Jehova. (1 Pedro 5:9) Kas pagarigan, mabalin a sumrek iti sabali a relihion ken ipakitana a kayatna ti agtalinaed iti dayta.—1 Juan 2:19.

Kasano no saanen a mangaskasaba wenno umat-atender iti gimong ti maysa nga indibidual, ibilangyo kadin a nagikkat?

Saan. Ti panagikkat, wenno ti isisina iti organisasion, ket naiduma iti panagbalin a nakapuy iti pammati. Kaaduanna, dagidiay saan unayen a mangaskasaba ken makigimgimong, wenno dagidiay simmardengen ket dida tinallikudan ti pammatida, no di ket maup-upayda laeng. Imbes nga adaywanmi ida, ikagkagumaanmi ketdi a liwliwaen ken tulongan ida. (1 Tesalonica 5:14; Judas 22) No agkasapulan dayta a tao iti tulong, dagiti panglakayen wenno mangidadaulo iti kongregasion ti mangyun-una iti panangited kenkuana iti naespirituan a tulong.—Galacia 6:1; 1 Pedro 5:1-3.

Uray no kasta, awan autoridad dagiti panglakayen a mangpilit wenno mangpuersa iti maysa tapno agtultuloy kas maysa a Saksi ni Jehova. Ti tunggal indibidual ti agdesision no ania ti kayatna a pagtalinaedan a relihion. (Josue 24:15) Patienmi a dagidiay agdayaw iti Dios masapul nga aramidenda dayta a boluntario ken naimpusuan.—Salmo 110:3; Mateo 22:37.