Kas iti adu a pagilian, umad-adu ti natataengan iti Australia. Dadduma ti maipan iti pagaywanan kadagiti babbaket ken lallakay (nursing home) tapno aywanan dagiti empleado ken ipaayanda kadagiti inaldaw a kasapulanda.

Siempre, saan laeng a pannakaaywan ti pisikal a salun-at ti kasapulan dagiti babbaket ken lallakay. Mabalin met a ma-boring-da no dadduma, malidayanda, ken mariknada nga awanen ti serserbida. Linawas a bumisbisita dagiti Saksi ni Jehova iti dua a nursing home iti Portland, nga ili ti Victoria, Australia tapno mangipaayda iti namnama ken liwliwa.

Makisarsarita dagiti lumugar a Saksi iti maysa a grupo dagiti natataengan maipapan kadagiti topiko a naibatay iti Biblia, kas kadagiti napapateg a pasamak iti biag ni Jesus. “Ibasami kadagiti nataengan dagiti salaysay ti Biblia,” kuna ni Jason, “sa ilawlawagmi kadakuada.” Gapu ta nakapuy ti salun-at ti adu kadakuada, mangipapaay met dagiti Saksi iti namnama ken pammaregta babaen ti panangilawlawagda iti kari ti Dios a pukawennanto ti sakit ken ipapatay.

“Idi damo, kagudua nga oras laeng ti pannakisaritami, ngem kayat dagiti natataengan nga iyat-atiddogmi,” kuna ti maysa a lumugar a Saksi a ni Tony. “Isu nga ita, agarup maysa nga orasen ti pannakisaritami uray no kayat ti maysa a nataengan a dua nga oras koma!” Gapu ta dadduma kadakuada ti bulsek, saanen a makabangon, wenno saanen a makagunay nga agmaymaysa, tultulongan ida dagiti Saksi bayat ti panagadal ken parparegtaenda ida a makipartisipar agingga a mabalin.

Paset ti ibibisita ti panagkanta dagiti Saksi ken dagiti natataengan iti sumagmamano a kanta a pammadayaw iti Dios, ket kaaduanna a kayat dagiti nataengan ti ad-adu pay. Kuna ti nataengan a ni John: * “Magusgustuanmi dagiti kantayo. Makatulong dagita tapno maam-ammomi ken maidaydayawmi ti Dios.” Kabesadon ti nataengan a bulsek a ni Judith ti amin a liriko dagiti paboritona a kanta!

Interesado dagiti Saksi iti pagimbagan ti tunggal nataengan. Kuna ti volunteer a Saksi a ni Brian a no agsakit dagiti nataengan, bisitaenda ida iti kuartoda. “Kasarita ken komustaenmi ida. No dadduma, agsublikami iti sabali nga aldaw tapno kitaenmi ti kasasaadda.”

Ipatpateg dagiti nataengan kadagiti nursing home ti ibibisita dagiti Saksi. Kuna ni Peter, a linawas nga umat-atender iti panagadal: “Magagaranak iti tunggal panagadal.” Ibaga no kua ni Judith iti caregiver-na: “Mierkolesen! Tulongannak nga agsagana para iti panagadalmi iti Biblia. Diak kayat ti maladaw!”

Magusgustuan dagiti nataengan dagiti maad-adalda ken mariknada a nadekdekketdan iti Dios. Kalpasan a napagsasaritaanda ti maysa a pannursuro ni Jesus, kinuna ni Robert: “Diak idi maaw-awatan daytoy a salaysay ti Biblia. Ngem maawatak itan!” Nasursuro ni David no kasano kapateg ti panagkararag. Kunana: “Natulongannak dayta a makigayyem iti Dios ken nagbalin isuna a pudpudno kaniak.”

Maragragsakan dagiti nataengan no maad-adalda ti namnama iti masanguanan nga inkari ti Biblia. “Pagyamanan ta idandanonyo kadakami ti makaliwliwa a mensahe ti Biblia,” kuna ti nataengan a ni Lynette kadagiti Saksi. Kuna pay ti maysa a baket: “Imbaonnakayo ti Dios kadakami!”

Magusgustuan ni Margaret ti ibibisita dagiti Saksi nga uray la regularen nga umat-atender kadagiti gimong dagiti Saksi ni Jehova iti Kingdom Hall iti asidegda. Dakkel a sakripisio dayta kenkuana ta nakapuy ti salun-atna ken saan unayen a makagunay. Imbagana kadagiti Saksi: “Inikkandakami amin iti rason tapno agtultuloy nga agbiag.”

Ap-apresiaren met dagiti empleado kadagiti nursing home ti ibibisita dagiti Saksi. Kuna ti lumugar a Saksi a ni Anna: “Komkombinsiren dagiti empleado dagiti nataengan nga umatender iti panagadal ta nadlawda a naragragsakda kalpasan dayta.” Innayon ni Brian, a naibaga itay: “Mannakigayyem ken mannakikooperar dagiti empleado. Nakasaganada a tumulong no kasapulan.”

Agyamyaman dagiti kapamilia dagiti natataengan gapu ta makitkitada a maragragsakan dagitoy iti panagadalda. Inyebkas ti balasang ti maysa a nataengan ti apresasionna kadagiti Saksi. Kunana: “Nakasaysayaat daytoy nga ar-aramidenyo para ken mamangko.”