Ania ti Kaipapanan ti Libro nga Apocalipsis?
Sungbat ti Biblia
Ti Griego a nagan ti Libro ti Biblia nga Apocalipsis ket A·po·kaʹly·psis, kaipapananna ti “Panangipalgak” wenno “Panangibutaktak.” Ti nagan nga Apocalipsis, ibutaktakna dagiti bambanag a nailemmeng ken ipalgakna dagiti mapasamak sakbay pay a maisurat. Adu kadagiti nadakamat a padto ti saan pay a natungpal.
Sumario ti libro nga Apocalipsis
Introduksion.—Apocalipsis 1:1-9.
Dagiti mensahe ni Jesus iti pito a kongregasion.—Apocalipsis 1:10–3:22.
Sirmata a mangipakita a nakatugaw ti Dios iti tronona idiay langit.—Apocalipsis 4:1-11.
Dagiti agsasaruno a sirmata:
Pito a selio.—Apocalipsis 5:1–8:6.
Pito a trumpeta, ti maudi a tallo dakamatenna dagiti nakabutbuteng a pasamak.—Apocalipsis 8:7–14:20.
Pito a malukong, tunggal maysa naglaon iti saplit a mangirepresentar iti panangukom ti Dios a maibukbok ditoy daga.—Apocalipsis 15:1–16:21.
Dagiti sirmata maipapan iti pannakadadael dagiti kabusor ti Dios.—Apocalipsis 17:1–20:10.
Dagiti sirmata maipapan kadagiti bendision a naggapu iti Dios para iti langit ken daga.—Apocalipsis 20:11–22:5.
Konklusion.—Apocalipsis 22:6-21.
Dagiti pamay-an tapno matarusan ti libro nga Apocalipsis
Saan a nakabutbuteng no di ket positibo ti kaipapananna para kadagiti agserserbi iti Dios. Nupay adu ti manginaig iti sao nga “apocalipsis” iti nakaro a didigra, ti libro nga Apocalipsis ket mangrugi ken agngudo kadagiti sasao a naragsak dagidiay mangbasa, mangtarus, ken mangyaplikar iti mensahena.—Apocalipsis 1:3; 22:7.
Nagusar ti Apocalipsis kadagiti adu a “pagilasinan,” wenno simbolo, ket saan a tarusan a literal.—Apocalipsis 1:1.
Adu kadagiti kangrunaan a pasamak ken simbolo iti libro nga Apocalipsis ket nadakamaten a nasaksakbay iti Biblia:
Ni Jehova—“ti pudno a Dios iti langlangit” ken ti Namarsua iti amin a banag.—Deuteronomio 4:39; Salmo 103:19; Apocalipsis 4:11; 15:3.
Ni Jesu-Kristo—“ti Kordero ti Dios.”—Juan 1:29; Apocalipsis 5:5; 14:1.
Ni Satanas a Diablo—ti kabusor ti Dios.—Genesis 3:14, 15; Juan 8:44; Apocalipsis 12:9.
Ti Babilonia a Dakkel—kas iti nagkauna a Babilonia (Babel) a kabusor ni Jehova a Dios ken ti ilina ken pagtataudan dagiti palso a narelihiosuan a sursuro.—Genesis 11:2-9; Isaias 13:1, 11; Apocalipsis 17:4-6; 18:4, 20.
“Ti baybay”—dagiti dakes a tattao a bumusbusor iti Dios.—Isaias 57:20; Apocalipsis 13:1; 21: 1.
Dagiti bambanag a katupag ti nagkauna a tabernakulo a nausar iti panagdaydayaw iti Dios—a pakairamanan ti lakasa ti tulag, simmarming a baybay, (palanggana a pagbugguan), dagiti pagsilawan, daton nga insienso, ken ti altar a pagidatonan.—Exodo 25:10, 17, 18; 40:24-32; Apocalipsis 4:5, 6; 5:8; 8:3; 11:19.
Atap nga animal—a mangiladawan kadagiti gobierno ti tao.—Daniel 7:1-8, 17-26; Apocalipsis 13:2, 11; 17:3.
Nausar dagiti numero iti simboliko a pamay-an.—Apocalipsis 1:20; 8:13; 13:18; 21:16.
Agaplikar dagiti sirmata “iti aldaw ti Apo” a nangrugi idi naipasdek ti Pagarian ti Dios idi 1914 ken nangrugi nga agturay ni Jesus kas Ari. (Apocalipsis 1:10) Namnamaentayo ngarud a ti kangrunaan a kaitungpalan ti Apocalipsis ket iti kaaldawantayo.
Tapno matarusan ti libro nga Apocalipsis, kasapulantayo dagiti isu met laeng a bambanag a nakatulong kadatayo a nangtarus iti dadduma a paset ti Biblia, agraman ti sirib a naggapu iti Dios ken tulong manipud kadagiti nakatarusen iti dayta.—Aramid 8:26-39; Santiago 1:5.