Ibagada a “Nasingpet a Samaritano” ti maysa a tao no tumultulong kadagiti agkasapulan. Daytoy a termino ket naala iti maysa nga estoria ni Jesus, a mangipakita a ti nasingpet a kaarruba siaasi a tulonganna ti sabsabali, uray ania ti nasion wenno kasasaadda iti biag.

Iti daytoy nga artikulo

•  Ania ti estoria maipapan iti “Nasingpet a Samaritano”?

•  Apay nga inyestoria daytoy ni Jesus?

•  Ania ti leksion iti estoria?

•  Siasino dagiti Samaritano?

•  Talaga kadi a napasamak ti estoria maipapan iti nasingpet a Samaritano?

Kastoy ti sumario dayta nga estoria ni Jesus: Maysa a Judio a lalaki ti agbibiahe manipud Jerusalem nga agpa-Jerico. Iti dalan, naholdap, nabugbog, ken napanawan a dandani matay.

Adda Judio a padi ken di nagbayag, sabali pay a Judio a lider ti relihion ti nanglabas iti dayta a nasugatan a lalaki. Uray kapadada iti puli ti lalaki, awan kadakuada ti nagsardeng a tumulong kenkuana.

Di nagbayag, limmabas met ti maysa a lalaki a sabali ti nasionna. Maysa a Samaritano. (Lucas 10:33; 17:16-18) Naasian ti Samaritano ket inagasanna dagiti sugat ti lalaki. Kalpasanna, impanna ti nasugatan a lalaki iti pagdagusan. Nagpatnag nga inasikasona ti lalaki. Kabigatanna, binayadanna ti agay-aywan iti pagdagusan tapno asikasuenna ti lalaki sa imbagana a bayadannanto ti dadduma pay a magastos.—Lucas 10:30-35.

Inyestoria daytoy ni Jesus iti maysa a lalaki a mangibilang a dagiti laeng kailian ken karelihionanna ti kaarrubana. Kayatna nga isuro iti dayta a lalaki ti importante a leksion—a saan laeng a dagiti padana a Judio ti ibilangna a “kaarruba.” (Lucas 10:36, 37) Nairaman daytoy iti Biblia tapno masursuro met dayta dagidiay mayat a mangaramid iti pagayatan ti Dios.—2 Timoteo 3:16, 17.

Isuro daytoy nga estoria nga ipakita ti nasingpet a kaarruba ti asina babaen ti aramid. Tulonganna ti tao a marigrigatan—uray ania ti kasasaad ti biag, puli, wenno nasion dayta a tao. Ti pudno a kaarruba tratuenna ti dadduma a kas iti kayatna a pannakatrato.—Mateo 7:12.

Aggigian dagiti Samaritano iti mismo nga amianan ti Judea. Kaputotan ida dagiti nagiinnasawa a Judio ken saan a Judio.

Idi umuna a siglo C.E., addaanen dagiti Samaritano iti bukodda a relihion. Inakseptarda ti umuna a lima a libro ti Hebreo a Kasuratan ngem saan ti dadduma pay a libro a paset dayta.

Idi kaaldawan ni Jesus, inuy-uyaw ti adu a Judio dagiti Samaritano ken saanda a nakikadkadua kadakuada. (Juan 4:9) Inusar ti dadduma a Judio ti termino a “Samaritano” kas panginsulto.—Juan 8:48.

Saan nga ipakita ti Biblia no ti estoria maipapan iti Samaritano ket naibatay iti pudpudno a pasamak. Ngem iti panangisuro ni Jesus, masansan a nagusar kadagiti popular a kaugalian ken lugar tapno nalaka a maawatan dagiti agdengdengngeg kenkuana ti puntona.

Adu a detalye ti estoria ni Jesus ti talaga nga adda idi. Kas pagarigan:

• Ti kalsada manipud Jerusalem nga agpa-Jerico—a nasurok a 20 a kilometro (12 milia) ti kaatiddogna—ket maysa a kilometro (0.6 milia) a pasalog. Husto ti imbaga ti estoria a dagiti agbibiahe nga agpa-Jerico ket ‘sumalogda’ manipud Jerusalem.—Lucas 10:30.

• Regular a dumalan iti daytoy a kalsada dagiti papadi ken Levita nga aggigian idiay Jerico nga agpa-Jerusalem.

• Aglemmeng dagiti mannanakaw iti igid ti kalsada nga awan ti matataona, nga agur-urayda iti biktimaenda—lalo dagiti agsolsolo nga agbibiahe.