“Dimmakkelak iti away,” kinuna ni Agostinho a taga-Brazil. “Nakapobpobrekami. Kapilitan a simmardengak a nageskuela tapno agtrabahoak ken makatulongak iti pamiliami.” Sa la nakasursuro ni Agostinho nga agbasa ken agsurat idi 33 ti tawenna. “Dimmakkel ti kompiansak iti bagik idi nasursurok ti agbasa ken agsurat,” kinunana.

 Karaman ni Agostinho iti nasurok a kakapat ti maysa a milion a tattao nga insuro dagiti Saksi ni Jehova nga agbasa ken agsurat iti napalabas a 70 a tawen. Apay a mangang-angay dagiti Saksi ni Jehova kadagiti kasta a klase? Kasano a nabenepisiaran dagiti tattao iti kasta a panangisuro?

 Idi 1935, mangaskasaban dagiti Saksi ni Jehova iti 115 a pagilian. Tapno madanon dagiti misionero dagiti tattao a nadumaduma ti lengguaheda, nangipatokarda kadagiti nairekord ken naipatarus a palawag a naibatay iti Biblia. Iti dadduma a kasasaad, nangipaimada kadagiti publikasion iti lengguahe dagiti lumugar. Nupay adu ti interesado iti Biblia, adu kadakuada ti narigatan nga agsursuro ta dida ammo ti agbasa ken agsurat.

 Gapu ta di mabasa dagiti tattao ti Biblia, marigatanda a mangyaplikar kadagiti prinsipio ti Biblia. (Josue 1:8; Salmo 1:2, 3) Marigatanda met a mangitungpal kadagiti responsabilidadda kas Kristiano. Kas pagarigan, no saan a makabasa dagiti nagannak, lallalo a marigatanda a mangisuro kadagiti annakda. (Deuteronomio 6:6, 7) Dagiti met kabbaro a Saksi a di makabasa saanda unay a mausar ti Biblia no isursuroda ti dadduma.

 Bayat ti 1940’s ken 1950’s, da Nathan H. Knorr ken Milton G. Henschel, a dua kadagidiay nangidaulo kadagiti Saksi ni Jehova, napanda iti nadumaduma a pagilian tapno tumulongda a mangorganisar iti trabaho a panangasaba. Kadagiti pagilian nga adu ti di makabasa ken makapagsurat, pinaregtada dagiti sanga nga opisina sadiay a mangyurnosda kadagiti klase a mangisuro iti panagbasa ken panagsurat kadagiti kongregasion.

 Nangipatulod dagiti sanga nga opisina iti instruksion kadagiti kongregasion no kasano nga angayen dagita a klase. Iti dadduma a pagilian, adda programa ti gobierno lokal a mabalinda nga usaren. Kas pagarigan, idiay Brazil, ti gobierno inikkanna ti sanga nga opisina kadagiti suplay ken libro sa impatulod dagita ti sangay kadagiti kongregasion. Iti dadduma a pagilian, dagiti Saksi ti nangaramid iti bukodda a programa a panangisuro.

 Dagiti klase a panagsursuro nga agbasa ken agsurat ket para iti amin—lallaki ken babbai, ubbing ken natataengan. Ti panggep ket tapno masursuroda ti agbasa iti nakayanakanda a lengguahe—uray kaipapanan dayta a sumagmamano a lengguahe ti maisuro iti maysa a kongregasion.

 Ania ti naitulong daytoy a programa kadagiti tattao? Kinuna ti maysa a Saksi a taga-Mexico: “Maawatak itan dagiti isursuro ti Biblia, ket dayta ti mangtukay iti pusok. Gapu ta ammokon ti agbasa, diak marigatanen a makisarita kadagiti kaarrubak, isu nga ad-adun ti pangibagbagaak iti mensahe ti Biblia.”

 Babaen dayta a programa, saan la a natulongan dagiti tattao a mangtarus iti Biblia. Kinuna ni Isaac a taga-Burundi: “Gapu ta nasursurokon ti agbasa ken agsurat, nasursurok met ti agibangon. Nagbalinen a karerak ti konstruksion. Ket ita, siakon ti mangimanmanehar iti dadakkel a proyekto a panagibangon.”

 Agtawen iti 49 ni Jesusa a taga-Peru idi nangrugi nga immatender kadagiti klase a mangisuro iti panagbasa ken panagsurat. “Kas agtagtagibalay,” kinunana, “masapul nga ammok dagiti presio ken nagan dagiti gagatangen iti palengke. Problemak idi dayta. Ngem gapu ta nasursurok ti agbasa ken agsurat, dakdakkelen ti kompiansak no makitiendaak para iti pamiliak.”

 Iti panaglabas dagiti tawen, dagiti opisial ti nadumaduma a pagilian pinadayawanda dagiti Saksi ni Jehova gapu iti panangisuroda kadagiti tattao nga agbasa ken agsurat. Agtultuloy pay laeng ita dayta a programa dagiti Saksi ni Jehova. Us-usarenda dagiti pamay-an ken materiales nga in-inut a napasayaat iti panaglabas dagiti tawen. Nagaramid ken nagimprentada met iti dandani 224 a milion a broshur iti 720 a lengguahe tapno masursuro dagiti tattao ti agbasa wenno matulongan dagidiay limitado ti edukasionda. a