Iti nasapa a bigat ti Pebrero 24, 2022, rinugianen ti militar ti Russia a sakupen ti Ukraine, uray no ikagkagumaan dagiti lider iti lubong a liklikan ti gubat. Ania ngata ti epektona iti lubong? Sumagmamano nga aldaw sakbay dayta, imbaga ni António Guterres a secretary-general ti United Nations: “Sigurado nga agresulta dayta iti nakaro unay a rigat ken pannakadadael a mangapektar iti seguridad dagiti pagilian iti Europe ken iti intero a lubong.”

•   Impakpakauna ni Jesu-Kristo a “bumusorto ti nasion iti sabali a nasion ken ti pagarian iti sabali a pagarian.” (Mateo 24:7) Basaem ti artikulo nga “Ania ti Pagilasinan Dagiti ‘Maudi nga Aldaw,’ Wenno ‘Tiempo ti Panungpalan’?” tapno maammuam no kasano nga ipakita ti Biblia a dagiti gubat a mapaspasamak ita ket kaitungpalan ti padto ni Jesus.

•   Iti Apocalipsis a libro ti Biblia, ti gubat ket nailadawan a nakasakay iti “kabalio a kasla apuy ti kolorna” ken “mangikkat iti talna iti daga.” (Apocalipsis 6:4) Basaem ti artikulo a “Ti Uppat a Kumakabalio—Siasinoda?” tapno maammuam no kasano a daytoy a padto ket agaplikar kadagiti gubat a mapaspasamak ita.

•   Impakpakauna ti libro a Daniel nga agribal “ti ari ti amianan” ken “ti ari ti abagatan.” (Daniel 11:25-45) Buyaem ti video a Natungpal a Padto—Daniel Kapitulo 11 tapno maammuam no apay a ti Russia ken dagiti kaaliadona ti nagbalin nga ari ti amianan. a

•   Dineskribir met ti Apocalipsis ti “gubat ti naindaklan nga aldaw ti Dios a Mannakabalin-amin.” (Apocalipsis 16:14, 16) Ngem dayta ket saan a gubat dagiti nasion a kas iti makitkitatayo ita. Basaem ti artikulo nga “Ania ti Gubat ti Armagedon?” tapno maammuam ti ad-adu pay nga impormasion maipapan iti dayta a pasamak iti masanguanan.

•   Ibaga ti Biblia a ti Dios ‘pagsardengennanto dagiti gubat iti intero a daga.’ (Salmo 46:9) Basaem ti artikulo nga “Adda Nasaysayaat a Masakbayan” tapno maammuam ti ad-adu pay maipapan iti masanguanan nga inkari ti Dios.

•   Insuro ni Jesus kadagiti pasurotna nga ikararagda nga umayen ti Pagarian ti Dios. (Mateo 6:9, 10) Dayta a Pagarian ket ti nailangitan a gobierno a mangitungpalto iti pagayatan ti Dios para iti daga. Karaman iti pagayatan ti Dios ti sangalubongan a talna. Tapno maammuam no kasanoka a mabenepisiaran iti dayta a Pagarian, buyaem ti video nga Ania ti Pagarian ti Dios?

 Nasurok a 129,000 dagiti Saksi ni Jehova idiay Ukraine. Kas kadagiti Saksi iti dadduma pay a pagilian, tultuladenda ni Jesus babaen ti panagtalinaedda a neutral iti politika ken saanda a pannakiraman iti gubat. (Juan 18:36) Iti intero a lubong, itultuloy dagiti Saksi ni Jehova nga ipakaammo “ti naimbag a damag maipapan iti Pagarian” kas ti solusion ti amin a problema dagiti tattao, a pakairamanan ti gubat. (Mateo 24:14) Kontakennakami tapno maammuam ti ad-adu pay maipapan iti namnama nga ikarkari ti Biblia.