“Gapu iti ar-aramiden dagiti tattao, asidegen a mapasamak dagiti nakaro a didigra. Lumned iti danum dagiti dadakkel a siudad, mapadasantayo ti kakaruan pay laeng a kinabara ti daga, nakaam-amak a bagyo, nasaknap a kurang a suplay ti danum, ken pannakapukaw ti minilion a klase wenno species dagiti mula ken animal. Saan la a sarsarita wenno nalabes nga estoria dagita. Dayta ti ibagbaga ti siensia a mapasamak no saan a balbaliwan dagiti gobierno dagiti linteg iti panagusar iti enerhia.”—Imbaga ni António Guterres, secretary-general ti United Nations, maipapan iti report ti Intergovernmental Panel on Climate Change a nairuar idi Abril 4, 2022.

 “Impakdaar dagiti sientista nga iti sumaruno a tawtawen, dandani amin nga 423 a national park [iti United States], ket madadael gapu ta nalaka a maapektaran dagita iti panagbalbaliw ti klima. Dagitoy a dakes a banag a mabalin a mapasamak ket kas kadagiti didigra a mabasa iti Biblia: uram ken layus, pannakarunaw dagiti yelo, panagngato ti lebel ti danum iti baybay ken nakaro a pudot.”—“Flooding Chaos in Yellowstone, a Sign of Crises to Come,” The New York Times, Hunio 15, 2022.

 Masolbar pay kadi dagiti problema iti aglawlaw? No wen, asino ti mangsolbar kadagita? Kitaentayo no ania a talaga ti ibaga ti Biblia.

 Ibaga ti Biblia a ti Dios ‘dadaelennanto dagidiay mangdaddadael iti daga.’ (Apocalipsis 11:18) Adda tallo a banag nga isuro kadatayo daytoy a bersikulo:

1.  1. Madaddadael ti daga gapu iti ar-aramiden dagiti tattao.

2.  2. Agsardengto ti pannakaperdi ti daga.

3.  3. Ti Dios, saan a dagiti tattao, ti mangsolbar kadagiti problema iti aglawlaw.

 Ibaga ti Biblia a “ti daga agtalinaed iti agnanayon.” (Eclesiastes 1:4) Agtultuloyto dayta a mapagyanan.

•   “Dagiti nalinteg kukuadanto ti daga, ket agyandanto iti dayta iti agnanayon.”—Salmo 37:29.

 Maisublinto ti perpekto a kasasaad ti planetatayo.

•   “Agragsakto ti let-ang ken ti natikag a daga, ket agrag-onto ti desierto ken agsabongto a kas iti safron.”—Isaias 35:1.