Ti korapsion iti gobierno ket maysa a problema iti intero a lubong nga addaan kadagiti makadadael nga epekto. a Kas pagarigan, bayat ti COVID-19 pandemic, dagiti opisial iti adu a pagilian ket maak-akusaran a taktakawenda ti pondo a nairanta koma para iti pandemic. Gapu iti dayta, adu a tattao ti saan a nakaala iti health care a kasapulanda, a nagresulta iti adu a panagsagaba ken ipapatay.

 Nakaro dagiti epekto ti korapsion iti gobierno. Kuna ni David Cameron, a dati a prime minister ti United Kingdom: “Ti korapsion ket maysa a dakkel ken komplikado a saput, a nangsilo iti amin a pagilian.”

 Ngem sigurado nga asidegen nga agpatingga ti korapsion iti amin a gobierno. Apay? Kitaem no ania ti ibaga ti Biblia nga aramiden ti Dios.

 Nairekord iti Biblia daytoy nga imbaga ti Dios: “Siak, ni Jehova, ay-ayatek ti hustisia; kagurak ti panagtakaw ken kinakillo.” b (Isaias 61:8) No agrigat dagiti tattao gapu ta agkorap ti dadduma, ammo ti Dios dayta. (Proverbio 14:31) Ikarkarina: “Gapu ta marigrigatan dagiti mairurrurumen, . . . agtignayakto.”—Salmo 12:5.

 Anianto ti aramiden ti Dios? Imbes nga irepormana dagiti agdama a gobierno, suktanna dagita iti bukodna a nailangitan a gobierno, a maaw-awagan “ti Pagarian ti Dios.” (Marcos 1:14, 15; Mateo 6:10) Kuna ti Biblia: “Mangipasdekto ti Dios ti langit iti maysa a pagarian . . . [ket] rumeken ken pagpatinggaennanto amin dagitoy [dadduma] a pagarian, ket daytanto laeng ti agtalinaed iti agnanayon.” (Daniel 2:44) Iti kasta, pagpatinggaento ti Dios ti korapsion a makitkitatayo ita.

 Kasano nga ammotayo a saanto nga agbalin a korap ti gobierno ti Pagarian ti Dios? Panunotem dagitoy.

1.  1. Pannakabalin. Naggapu iti Mannakabalin-amin a Dios ti pannakabalin daytoy a Pagarian.—Apocalipsis 11:15.

    No apay a napateg daytoy: Tapno agandar dagiti gobierno ti tao, kasapulanda ti kuarta dagiti umili. Dayta ti rason no apay a mapaspasamak ti panagpasuksok, panagtakaw, ken panangimaniobra. Nupay kasta, supsuportaran ti Mannakabalin-amin a Dios daytoy a Pagarian, isu a kanayon a maipaayna ti amin a kasapulan dagiti iturayanna.—Salmo 145:16.

2.  2. Agturay. Inapointaran ti Dios ni Jesu-Kristo kas Agturay iti Pagarian.—Daniel 7:13, 14.

    No apay a napateg daytoy: Uray no dagiti kasayaatan a tao ti agturay, mabalin a maimpluensiaan latta ti dadduma nga agaramid iti dakes. (Eclesiastes 7:20) Ngem naiduma ni Jesus ta saan a mapasuksokan. (Mateo 4:8-11) Kasta met, kanayon nga agtignay gapu iti pudno nga ayatna kadagiti iturayanna ken talaga nga interesado iti pagimbaganda.— Salmo 72:12-14.

3.  3. Linlinteg. Perpekto ken makapabang-ar dagiti linteg ti Pagarian ti Dios.—Salmo 19:7, 8.

    No apay a napateg daytoy: Masansan a komplikado, makapadagsen, wenno saan a maipatungpal a naimbag dagiti linteg ti tao, isu a mapanunot ti dadduma ti agkorap. Ngem praktikal ken makatulong dagiti linteg ti Dios. (Isaias 48:17, 18) Kanayonanna, saan laeng a maipapan iti tigtignay ti saklawen dagitoy a linteg no di ket uray pay dagiti motibo. (Mateo 22:37, 39) Siempre, mabasa ti Dios ti puso ken ipasiguradona a maipatungpal dagitoy a linteg a nabuyogan iti asi.—Jeremias 17:10.

 Awisendaka nga ammuem ti ad-adu pay maipapan iti ikarkari ti Biblia a gobierno nga awanan korapsion.

•   Basaem ti artikulo a “Pagarian ti Dios—Maysa a Gobierno nga Awanan Kurapsion” tapno maammuam ti tallo pay a rason no apay a saanto a pulos nga agbalin a korap ti Pagarian ti Dios.

•   Buyaem ti video nga Ania ti Pagarian ti Dios? tapno maammuam ti ad-adu pay maipapan iti gobierno iti Dios ken no anianto ti aramidenna ditoy daga.

•   Padasem ti libre a panagadal iti Biblia tapno makitam no kasano a makatulong kenka dagiti karina.