Dimmakkelak iti siudad ti Alicante, iti daya nga igid ti baybay ti Spain. Nakagulgulo ti pamiliami, isu nga ad-adda a kalkalsada ti naggigianak idi agtutuboak. Iti asideg ti balaymi, adda pagtarimaanan iti pilid. Nagayyemko ti maysa nga empleado a ni José María. Isu ket mannakigayyem ken ipapaayannak iti atension a saan a naited ti pamiliak. No adda problemak, isu ket pudno a gayyem ken imbilangnak a kabsat, nupay in-inauna ngem siak iti 20 a tawen.

Ni José María ket nakipagadal iti Biblia kadagiti Saksi ni Jehova. Makunak a magusgustuanna ti Biblia ken masansan nga ibagbagana kaniak dagiti naadalna a kinapudno. Dimngegak met kenkuana ngem pulos a diak naginteres iti imbagbagana. Kas maysa a tin-edyer, sabali a bambanag ti nakaisentruan ti atensionko. Ngem di nagbayag, nagbalbaliw dayta.

Diak kayat a mapagsasaritaan ti maipapan iti pannakaaksidentek. Ti la makunak ket saanak nga agpampanunot idi ken kaskaseroak. Iti maysa la nga aldaw, nagbaliw a namimpinsan ti biagko. Maysaak idi a naganaygay a tin-edyer ngem bigla a diak metten magaraw ti bagik ken nakaospitalakon. Narigatanak a nangawat iti kastoy a kasasaadko. Sangkadamagko iti bagik, ‘Adda pay ngata serserbi ti biagko?’

Sinarungkarannak ni José María, ken dagus nga inyurnosna ti panangbisita kaniak dagiti kakongregasionna a Saksi ni Jehova iti ospital. Natukay ti pusok kadagidiay a regular nga ibibisita. Idi nakaruarakon iti intensive care unit, nakipagadalak a dagus iti Biblia. Naadalko no apay nga agsagsagaba ken matmatay dagiti tattao ken no apay nga ipalpalubos ti Dios a mapasamak ti dakes. Naammuak met dagiti kari ti Dios iti masanguanan, a mapnonto ti daga kadagiti perpekto a tattao ket awanton ti agkuna: “Masakitak.” (Isaias 33:24) Idi laeng a naaddaanak iti nakaskasdaaw a namnama.

Idi nakaruarakon iti ospital, alistoak a rimmang-ay iti panagadalko iti Biblia. Iti tulong ti naipasadia a wheelchair, kabaelak payen ti umatendar kadagiti gimong dagiti Saksi ni Jehova ken mabalinkon ti kumuyog a mapan mangasaba. Idi Nobiembre 5, 1988, iti edad a 20, nabautisaranak iti naipasadia a bathtub. Tinulongannak ni Jehova a Dios nga agbalin a positibo. Ngem kasano a maipakitak ti panagyamanko?

Determinadoak a saan a ti kasasaadko ti manglapped kaniak a mangipaay iti amin a kabaelak nga agserbi ken Jehova. Kayatko ti rumang-ay. (1 Timoteo 4:15) Saan a nalaka dayta idi damo ta busbusorennak ti pamiliak gapu iti baro a pammatik. Ngem adda dagiti kapammatiak, a kakabsatko iti naespirituan. Sigsiguraduenda nga awan ti malanganak a gimong ken makapanak iti ministerio.

Ngem iti panaglabas ti panawen, kasapulan nga adda 24-oras a mangasikaso kaniak. Kalpasan ti nabayag a panagsapsapul, nakabirokak met laeng iti center a pakataraknan dagiti baldado. Masarakan dayta iti siudad ti Valencia, a 160 a kilometro (100 mi) iti amianan ti Alicante. Dayta ti nagbalin a permanente a pagtaengak.

Nupay naidalitakon, determinadoak nga agtultuloy nga agserbi ken Jehova. Adda aw-awatek a pension para kadagiti baldado ken dadduma pay a tulong ti gobierno. Gapu iti dayta, nakagatangak iti kompiuter ket impaikabilko iti abay ti iddak. Nakagatangak met iti selpon. Kada agsapa, luktan ti caregiver ti kompiuter ken selponko. Tapno mausarko ti kompiuter, adda aramatek a joystick (mausar a pangkontrol iti kompiuter) babaen ti timidko. Adda met am-ammalak a naipasadia a pagitalmegko iti letra wenno numero iti selpon.

Kasano a nakatulong kaniak dagitoy a teknolohia? Umuna, maluktak ti website a jw.org ken ti Watchtower ONLINE LIBRARY. Nagdakkel a tulong dagitoy kaniak! Kada aldaw, adu nga oras nga agadal ken agsukimatak kadagiti publikasion a naibatay iti Biblia tapno agtultuloy nga umadu ti pannakaammok maipapan iti Dios ken kadagiti nagsasayaat a kababalinna. Ken no mariknak a kasla agmaymaysaak ken medio maup-upayak, kanayon nga adda magun-odak iti website a mangpatibker kaniak.

Iti tulong ti kompiuterko, mangngegko met dagiti gimong iti kongregasion ken makapartisiparak kadagita. Makapagkomentoak, makaidauloak iti kararag, makaipaayak iti palawag, ken agbasaak pay iti Pagwanawanan no matudinganak. Nupay saanak a makapan a mismo kadagiti gimong, mariknak latta a pasetnak ti kongregasion.

Nagbalin a posible ti naan-anay a pannakiramanko iti panangasaba gapu iti telepono ken kompiuterko. Agpayso a diak makapan iti binalaybalay kas iti ar-aramiden ti kaaduan a Saksi ni Jehova, ngem saan a dayta ti nangpasardeng kaniak. Babaen ti panangusarko kadagitoy nga alikamen, mairanudko ti pammatik iti dadduma. Kinapudnona, maragragsakanak a mangasaba iti telepono. Gapu iti dayta, kiniddaw dagiti panglakayen a siak ti mangyurnos iti panangasaba babaen ti telepono. Dakkel a tulong daytoy nga urnos aglalo kadagiti kameng ti kongregasion a saan a makaruar iti pagtaenganda.

 Ngem saan la a teknolohia ti nakaisentruan ti biagko. Inaldaw a bisbisitaendak dagiti naayat a gagayyemko. Itugotda dagiti kabagian ken gagayyemda a mayat nga agadal iti Biblia. Masansan a siak ti kiddawenda a mangidaulo iti saritaan. No dadduma, adda dagiti mangbisita kaniak a pamilia ket iramandak iti panagdaydayaw ti pamiliada. Maragragsakanak no agtugaw dagiti ubbing iti abay ti iddak sa ibagada no apay nga ay-ayatenda ni Jehova.

Maay-ayatanak kadagiti nakaad-adu a bumisbisita kaniak. Masansan a mapno ti kuartok kadagiti sumarungkar a gagayyem nga aggapu iti adayo ken asideg. Masmasdaaw dagiti caregiver iti center gapu iti dayta a naayat nga atension. Agyamyamanak ken Jehova iti inaldaw gapu ta karamanak iti daytoy nagsayaat a panagkakabsat.

Tunggal adda mangkomusta kaniak, ibagak laeng no kua, “Kastoy, agtultuloyak a makilablaban!” Siempre, ammok a saan la a siak ti agpaspasar iti kastoy. Aniaman ti kasasaadtayo wenno pakarigatan iti salun-at, amin a Kristiano ket makilablaban​—“iti nasayaat a dangadang iti pammati.” (1 Timoteo 6:12) Ania ti nakatulong kaniak a makilaban iti adu a tawen? Inaldaw nga agkarkararag ken agyamyamanak ken Jehova ta adda serbin ti biagko. Ken ikagkagumaak ti agbalin nga okupado iti panagserbik iti Dios, a nakasentro dagiti matak iti namnama iti masanguanan.

Kanayon a pampanunotek ti baro a lubong ken ti kasasaad a makataray ken makalagtoakto manen. No dadduma, angawek ti gayyemko a ni José María​—nga adda poliona​—maipapan iti panagtarayminto a dua iti maraton. “Asinonto ngata ti mangabak?” kunak kenkuana. Ti met sungbatna: “Saan a napateg no asinonto ti mangabak. Ti napateg, addatanto idiay Paraiso nga aglinnumba.”

Saan a nalaka para kaniak nga awaten ken sanguen ti kasasaadko. Ammok a saan nga umiso ti inaramidko idi tin-edyerak, ket inapitko ti bungana. Ngem agyamyamanak ta saannak a binaybay-an ni Jehova. Nakaad-adu ti intedna​—dakkel a naespirituan a pamilia, ti determinasion nga agbiag, ti ragsak a tumulong iti sabsabali, ken ti nagsayaat a namnama iti masanguanan. Iti ababa a pannao, maikunak a talaga nga ad-adu ti impaay ni Jehova ngem iti pakaikariak.