1, 2. (a) Ania ti pakaragsakan dagiti adipen ti Dios ita? (b) Kasano a matulongan dagiti Kristiano a nagannak ken papanglakayen dagiti agtutubo tapno matarusanda ti kaipapanan ti bautismo?

“AM-AMMOKAN sipud pay nayanakka,” kinuna ti maysa a Kristiano a panglakayen ken Christopher, maysa nga agtutubo nga agtawen iti 12, “ket maragsakanak a makaammo a kayatmon ti agpabautisar. Damagek man kenka, ‘Apay a kayatmo ti agpabautisar?’” Nagpateg dayta a saludsod ti panglakayen. Siempre, maragsakantayo a makakita a rinibu nga agtutubo iti intero a lubong ti agpabpabautisar tunggal tawen. (Ecl. 12:1) Ngem kayat a masigurado dagiti nagannak ken panglakayen iti kongregasion a saan laeng a situtulok dagitoy nga agtutubo no  di ket natibker pay ti nakaibatayan ti desisionda.

² Ipakita ti Sao ti Dios a ti dedikasion ken bautismo ket pangrugian iti biag a saan laeng a mapasaran dagiti Kristiano dagiti bendision ni Jehova no di ket uray ti panangbusor ni Satanas. (Prov. 10:22; 1 Ped. 5:8) Ngarud, iwayaan koma dagiti Kristiano a nagannak nga isuro dagiti annakda no ania ti ramanen ti panagbalin nga adalan ni Kristo. Kadagiti annak a saan a Kristiano dagiti nagannakda, dagiti panglakayen iti kongregasion siaayat a tulonganda dagitoy nga agtutubo tapno matarusanda ti kaipapanan ti panagbalin nga adalan. (Basaen ti Lucas 14:27-30.) No kasano a kasapulan ti panagplano tapno naballigi a maileppas ti maysa a pasdek, kasapulan met ti panagsagana tapno simamatalek a makapagserbitayo ken Jehova “agingga iti panungpalan.” (Mat. 24:13) Ngem ania ti mabalin nga aramiden dagiti agtutubo tapno determinadoda nga agserbi ken Jehova iti intero a panagbiagda? Kitaentayo.

3. (a) Ania ti isuro kadatayo dagiti sasao da Jesus ken Pedro maipapan iti kinapateg ti panagpabautisar? (Mat. 28:19, 20; 1 Ped. 3:21) (b) Ania dagiti saludsod nga usigentayo, ken apay?

³ Maysaka kadi nga agtutubo nga agplamplano nga agpabautisar? No kasta, makomendaranka! Nagdakkel a pribilehio ti panagpabautisar kas maysa a Saksi ni Jehova. Kasta met, ti panagpabautisar ket makalikaguman kadagiti Kristiano, ken nagpateg dayta nga addang tapno magun-odan ti pannakaisalakan. (Mat. 28:19, 20; 1 Ped. 3:21) Gapu ta kayatmo a naimpusuan a tungpalen ti aramidem a kari ken Jehova, kayatmo a nakasaganaka iti daytoy nagpateg nga addang. No kasta, nagsayaat nga usigem dagitoy tallo a saludsod a makatulong kenka a mangtingiting no nakasaganakan nga agpabautisar: (1) Nataenganak kadin tapno agdesision nga agpabautisar? (2) Talaga kadi a kayatko ti agpabautisar? (3) Maawatak kadi no ania ti kaipapanan ti panagdedikar ken Jehova? Usigentayo dagitoy a saludsod.

4, 5. (a) Apay a saan laeng a dagiti nataengan ti edadna ti mabalin nga agpabautisar? (b) Para iti maysa a Kristiano, ania ti kaipapanan ti panagbalin a nataengan?

⁴ Saan nga ibaga ti Biblia a ti panagpabautisar ket para laeng kadagiti nataengan wenno kadagidiay nakagteng iti edad a maaddaandan kadagiti legal a kalintegan. Mabasatayo iti Proverbio 20:11: “Babaen a mismo iti ar-aramidna ipabigbig ti maysa nga ubing ti bagina no ti aramidna nasin-aw ken nalinteg.” Gapuna, uray ti maysa nga ubing maawatanna no ania ti kaipapanan ti panangaramid iti naimbag ken ti panangidedikar iti biagna iti Namarsua kenkuana. No kasta, ti bautismo ket maysa a napateg ken maitutop nga aramiden ti maysa nga ubing a nangipakitan iti kinanataengan ken nagdedikaren ken Jehova.—Prov. 20:7.

⁵ Ania ti kaipapanan ti panagbalin a nataengan? Ti kinanataengan ket saan laeng a pisikal a panagdakkel. Ibaga ti Biblia a dagiti nataengan a tattao ‘sanayenda ti pannakabalin ti pannakaawatda a mangilasin agpadpada iti umiso ken di umiso.’ (Heb. 5:14) Gapuna, ammo dagiti nataengan a tattao no ania ti umiso iti panangmatmat ni Jehova ken determinadoda a mangaramid iti dayta. Saanda ngarud a nalaka a maallukoy nga agaramid iti dakes ken saanda met a kanayon a mabagaan a mangaramid iti umiso. Ngarud, nainkalintegan laeng a manamnama a ti maysa nga agtutubo nga agpabautisar itakderanna dagiti pagalagadan ti Dios uray no awan dagiti nagannakna wenno sabali nga adulto.—Idilig ti Filipos 2:12.

6, 7. (a) Ania dagiti narigat a situasion a nakaipasanguan ni Daniel idi adda idiay Babilonia? (b) Kasano nga impakita ni Daniel nga isu ket nataengan?

⁶ Talaga kadi a maipakita ti maysa nga agtutubo ti kasta a kinanataengan? Usigentayo ti ulidan ni Daniel a nairekord iti Biblia. Mabalin a tin-edyeren idi naisina kadagiti nagannakna ket naipan idiay Babilonia. Bigla a nakipagnaed ni Daniel kadagiti tattao a naiduma unay ti panangmatmatda iti naimbag ken dakes. Kasta met, adda pay sabali a narigat a kasasaad a nakaipasanguan ni Daniel: Espesial ti pannakatratona idiay Babilonia. Kinapudnona, maysa ni Daniel kadagiti agtutubo a napili nga agtakder iti sanguanan ti ari! (Dan. 1:3-5, 13) Agparang nga adu a bambanag nga awan idiay Israel ti mabalin a magun-od ni Daniel idiay Babilonia.

⁷ Ania ti inaramid ti agtutubo a ni Daniel? Nasulisog kadi iti kinangayed ken kinabaknang ti Babilonia? Impalubosna kadi a ti baro nga aglawlawna ti mangbalbaliw iti kinataona wenno mangdadael iti pammatina? Saan! Kuna ti Biblia nga idi adda idiay Babilonia, “inkeddeng ni Daniel iti pusona a saanna a rugitan ti bagina” iti aniaman a mainaig iti ulbod a panagdayaw. (Dan. 1:8) Impakita ngarud ni Daniel ti naisangsangayan a kinanataengan!

8. Ania ti maadalmo iti ulidan ni Daniel?

⁸ Ania ti maadalmo iti ulidan ni Daniel? Ti maysa a nataengan a tao itakderanna dagiti patpatienna. Saan a kas iti bannagaw (chameleon) a baliwbaliwanna ti kolorna tapno maibagay iti aglawlawna. Saan nga agtignay a gayyem ti Dios no adda iti Kingdom Hall ngem gayyem ti lubong no adda iti eskuelaan. Imbes a mayallo-allon, agtalinaed a natibker uray masubok ti pammatina.—Basaen ti Efeso 4:14, 15.

9, 10. (a) Apay a makagunggona iti maysa nga agtutubo ti panangusigna no ania ti inaramidna kadagiti nabiit pay a nangsubok iti pammatina? (b) Ania ti kaipapanan ti bautismo?

⁹ Siempre, imperpektotayo amin. Agpada nga agkamali dagiti ubbing ken adulto sagpaminsan. (Ecl. 7:20) Nupay kasta, no agplamplanoka nga agpabautisar, nagsayaat a tingitingem no determinadoka a mangsurot kadagiti pagalagadan ni Jehova. Kasano a  maammuam ti katibker ti determinasionmo? Isaludsodmo iti bagim, ‘Ania dagiti pakakitaan a tungtungpalek dagiti pagalagadan ti Dios?’ Lagipem no kasanom a sinango dagiti nabiit pay a nangsubok iti pammatim. Impakitam kadi nga addaanka iti pannakaawat a mangilasin iti umiso ken di umiso? Kasanon no kas ken Daniel, naisangsangayan ti panangtrato kenka ti lubong ni Satanas? Kabaelam kadi nga ‘itultuloy a lasinen no ania ti pagayatan ni Jehova’ uray no ti pagayatan ti Dios ket saan a maitunos iti kayatmo nga aramiden?—Efe. 5:17.

¹⁰ Apay nga usigentayo dagitoy a prangka a saludsod? Makatulong dagita tapno umiso ti panangmatmatmo iti bautismo. Kas naibaga itay, ti panagpabautisarmo ipakitana a nangaramidka iti serioso a kari ken Jehova. Inkarim kenkuana nga ayatem ken naimpusuan a pagserbiam iti agnanayon. (Mar. 12:30) Masapul a determinado ti maysa nga agpabautisar a mangtungpal iti karina.—Basaen ti Eclesiastes 5:4, 5.

11, 12. (a) Ania ti masapul a siguraduen ti maysa nga agplamplano nga agpabautisar? (b) Ania ti makatulong kenka tapno umiso ti panangmatmatmo iti urnos ni Jehova maipapan iti bautismo?

¹¹ Kuna ti Biblia a dagiti adipen ni Jehova, a pakairamanan dagiti agtutubo, “situtulok nga idatondanto ti bagbagida” iti panagserbida kenkuana. (Sal. 110:3) Gapuna, masapul a siguraduen ti maysa nga agplamplano nga agpabautisar a personal a desisionna dayta. Mabalin a kalikaguman dayta ti panangusigmo iti bagim. Apay? Gapu ta mabalin a naisangsangayan ti kasasaadmo kas agtutubo. Kas pagarigan, mabalin a napadakkelka iti kinapudno.

¹² Iti adu a tawen, mabalin nga adun ti am-ammom a nagpabautisar a pakairamanan dagiti padam nga agtutubo ken nalabit uray dagiti kakabsatmo. No kasta ti kasasaadmo, ania ti masapul a pagannadam? Saanka koma nga agpabautisar gapu ta maysakan nga adulto a dayta ti masapul nga aramiden ti amin nga agtutubo no adultodan. Ania ti aramidem tapno masiguradom nga umiso ti panangmatmatmo iti urnos ni Jehova maipapan iti bautismo? Iwayaam nga utoben a masansan dagiti rason no apay a nakapatpateg ti panagpabautisar. Kinapudnona, adu dagiti maammuam a napateg a rason iti daytoy nga artikulo ken iti sumaruno.

13. Kasanom a maibaga a naimpusuan ti desisionmo nga agpabautisar?

¹³ Adda dagiti pamay-an tapno maammuam no naimpusuan ti desisionmo nga agpabautisar. Kas pagarigan, ipakita dagiti kararagmo no naimpusuan ti tarigagaymo nga agserbi ken Jehova. No masansan ken espesipiko dagiti kararagmo ipakitana a nasinged ti relasionmo ken Jehova. (Sal. 25:4) Ti maysa a nagpateg a pamay-an a sungsungbatan ni Jehova dagiti kararagtayo ket babaen ti panangiturongna iti atensiontayo iti Saona. No kasta, ti kinapasnektayo a mangadal iti Biblia ipakitana pay a talaga a kayattayo ti agbalin a nasingsinged ken Jehova ken naimpusuan nga agserbi kenkuana. (Jos. 1:8) Gapuna, isaludsodmo iti bagim: ‘Espesipiko kadi dagiti kararagko? Regular kadi ti personal a panagadalko iti Biblia?’ Ket no addaan ti pamiliam iti regular a Panagdaydayaw ti Pamilia, isaludsodmo iti bagim: ‘Makituntunosak kadi iti dayta nga urnos ti pamilia?’ Dagiti sungbatmo kadagitoy a saludsod tulongannaka a makaammo no personal a desisionmo ti agpabautisar.

14. Ania ti nagdumaan ti dedikasion ken bautismo?

¹⁴ Matikaw ti dadduma iti nagdumaan ti dedikasion ken bautismo. Kas pagarigan, kuna ti dadduma nga agtutubo a nagdedikardan ken Jehova ngem saanda pay a nakasagana  nga agpabautisar. Umiso kadi dayta? Ti panagdedikar kaipapananna ti panangibaga ken Jehova nga agserbika kenkuana iti agnanayon. No agpabautisar ti maysa, ipakpakitana iti sabsabali nga isu ket nagdedikaren ken Jehova. Gapuna, ti bautismo ket panangipakita iti publiko a personal a nagdedikarkan ken Jehova babaen ti kararag. Sakbay ngarud nga agpabautisarka, masapul a siguraduem a maawatam ti kaipapanan ti dedikasion.

15. Ania ti kaipapanan ti dedikasion?

¹⁵ Ngarud, no indedikarmo ti biagmo ken Jehova, saanmon a kukua ti bagim. Inkarim ken Jehova nga ipangpangrunam nga aramiden ti pagayatanna imbes a ti aniaman a sabali a banag iti biagmo. (Basaen ti Mateo 16:24.) Masapul a saantayo a tagtagilag-anen ti aniaman a kari, ngem nangnangruna ti karitayo ken Jehova a Dios! (Mat. 5:33) Ngem kasano a maipakitam a talaga a saanmon a kukua ti bagim no di ket kukuan ni Jehova?—Roma 14:8.

16, 17. (a) Iyilustrarmo ti kaipapanan ti panangtallikud iti bagi. (b) Ania a talaga ti ibagbaga ti maysa no agdedikar ken Jehova?

¹⁶ Kas panangyilustrar, panunotem a rinegaluannaka ti gayyemmo iti lugan. Intedna kenka ti papeles ti lugan ket kinunana: “Kukuamon ti lugan.” Ngem kasanon no kuna ti gayyemmo: “Siak ti mangiggem iti tulbek ken siak ti agmaneho, saan a sika.” Ania ti makunam iti intedna a “regalo”? Ania ti riknam iti daydiay nangted?

¹⁷ Ita, panunotem no ania ti nainkalintegan a namnamaen ni Jehova iti maysa a nagdedikar ken nangibaga kenkuana: “Ipaayko ti biagko kenka. Kukuanakon.” Kasanon no mangrugi a doble kara ti panagbiag dayta a tao, nalabit ilimlimedna ti makiinnarem iti saan a Saksi? No ngay awatenna ti trabaho a manglapped iti naan-anay a panagserbina iti ministerio wenno iti pannakigimongna? Saan kadi a kapada dayta ti saan a panangited iti tulbek ti lugan? Ti maysa a nagdedikar ken Jehova, arigna ibagbagana: “Kukuamon ti biagko, saankon a kukua. No naiduma ti kayatmo iti kayatko, ti kayatmo ti kanayon a surotek.” Ipakita dayta ti panagpampanunot ni Jesus idi adda ditoy daga. Kinunana: “Bimmabaak manipud langit tapno aramidek, saan a ti pagayatak, no di ket ti pagayatan daydiay nangibaon kaniak.”—Juan 6:38.

18, 19. (a) Kasano nga ipakita ti komento da Rose ken Christopher a ti panagpabautisar ket maysa a pribilehio a mangted kadagiti bendision? (b) Ania ti makunam maipapan iti pribilehio a panagpabautisar?

¹⁸ Nalawag a ti panagpabautisar ket maysa a serioso nga addang a masapul a saanmo a tagilag-anen wenno ti asinoman. Nupay kasta, dakkel a pribilehio ti panagbalin a dedikado ken bautisado nga adipen ni Jehova. Dagiti agtutubo a mangay-ayat ken Jehova ken makatarus iti kaipapanan ti panagdedikar saanda nga agkedked nga agpabautisar ken saanda a pulos pagbabawyan ti desisionda. “Ay-ayatek ni Jehova, ken awanen ti sabali a pagragsakak no di ti agserbi kenkuana,” kuna ti bautisado a tin-edyer a ni Rose. “Awanen ti ad-adda a sigurado a desisionko iti biag no di ti panagpabautisarko.”

¹⁹ Komusta met ni Christopher a nadakamat iti rugi daytoy nga artikulo? Natibker kadi ti nakaibatayan ti desisionna nga agpabautisar idi agtawen iti 12? Maragsakan ni Christopher a manglagip iti panagdedikar ken panagpabautisarna. Nagbalin a regular pioneer idi agtawen iti 17 ken nadutokan a ministerial nga adipen idi agtawen iti 18. Agserserbi itan iti Bethel. Kinunana: “Ti panagpabautisar ti umiso a desisionko. Napno ti biagko iti makapnek a trabaho para ken Jehova ken ti organisasionna.” No agplamplanoka nga agpabautisar, kasano a makapagsaganaka? Sungbatan ti sumaganad nga artikulo dayta a saludsod.