Saan a mangidumduma ti Dios ken kayatna a bendisionan ti amin a tao.

Inkari ti Dios ken propeta Abraham a ‘sigurado a mabendisionanto ti amin a pamilia babaen kenkuana.’​—Genesis 12:3.

Ania ti maadaltayo? Ay-ayatennatayo unay ti Dios ken kayatna a bendisionan ti amin a pamilia nga agtulnog kenkuana​—lallaki, babbai, ken ubbing.

Naasi ti Dios ken bendisionanna dagidiay mangikagkagumaan a mangam-ammo kenkuana.

Inikkan ti Mannakabalin-amin ni propeta Moises iti pannakabalin a mangaramid kadagiti nakaskasdaaw a milagro. Nupay kasta, inkararag ni Moises: “Ipakaammom koma kaniak dagiti dalanmo, tapno maam-ammoka ken kanayon a maragsakanka kaniak.” (Exodo 33:13) Naragsakan ti Dios iti kiddaw ni Moises isu a binendisionanna iti ad-adu a pannakaammo ken pannakaawat maipapan iti pagayatanna ken kadagiti kualidadna. Kas pagarigan, naammuan ni Moises a ti Namarsua ket “maysa a Dios a naasi ken mannakipagrikna.”​—Exodo 34:6, 7.

Ania ti maadaltayo? Kayatnatayo amin a bendisionan ti Dios​—lallaki, babbai, ken ubbing​—no ikagumaantayo nga am-ammuen. Impakitana kadatayo iti Nasantuan a Kasuratan no kasano ti panagdayawtayo kenkuana ken ti tarigagayna a manganamong ken mangbendision kadatayo.

Magun-odtayo dagiti agnanayon a bendision ti Dios no adalentayo ti maipapan ken Jesus ken dagiti inaramid ken insurona.

Naglaon ti Sao ti Dios kadagiti adu a detalye maipapan iti biag ken pannursuro ni Jesus. Inikkan ti Dios ni Jesus iti pannakabalin a mangaramid iti adu a nakaskasdaaw a milagro, kas iti panangpaimbag iti bulsek, tuleng, ken pilay. Nangpagungar pay kadagiti natay. Impakita ni Jesus dagiti bendision nga ipaay ti Dios kadagiti tattao iti masanguanan. Inlawlawagna no kasanotayo a magun-odan dagitoy a bendision: “Maaddaanto iti biag nga agnanayon dagidiay mangam-ammo kenka, ti maymaysa a pudno a Dios, ken ti imbaonmo, ni Jesu-Kristo.”​—Juan 17:3.

Ni Jesus ket mannakipagrikna, nadungngo, ken naasi. Immasideg kenkuana dagiti lallaki, babbai, ubbing ken natataengan idi inyawisna: “Agsursurokayo kaniak, ta naalumamay ken napakumbabaak, ket magin-awaankayto.” (Mateo 11:29) Idi panawenna, nababa ti panangkita ti dadduma kadagiti babbai ngem trinato ida ni Jesus nga addaan iti asi, dignidad, ken respeto.

Ania ti maadaltayo? Impakita ni Jesus ti nagpaiduma nga ayat kadagiti tattao, ken nangipakita iti naisangsangayan nga ulidan no kasanotayo a tratuen ti tunggal maysa.

Isuro ti Nasantuan a Kasuratan a “maymaysa laeng ti Dios” ken ni Jesus ket maysa a napakumbaba a mensahero ti Dios. (1 Corinto 8:6) Nalawag nga imbaga ni Jesus a natantan-ok ti Dios ngem kenkuana ken imbaon ti Dios ditoy daga.​—Juan 11:41, 42; 14:28. *