NUPAY ti isusukir dagiti umuna a nagannaktayo a da Adan ken Eva ti makagapu a managbasol ken matay ti amin a tattao, saan a dayta ti nangbalbaliw iti panggep ti Dios iti tao. Iti naisurat a Saona a ti Biblia, maulit-ulit nga impasiguradona dayta.

• “Dagiti nalinteg kukuadanto ti daga, ket agyandanto iti dayta iti agnanayon.”​—Salmo 37:29.

• “Alimonennanto ni patay iti agnanayon, ket punasento ti Kangatuan nga Apo Jehova dagiti lua iti amin a rupa.”​—Isaias 25:8.

• “Mapukawto ti maudi a kabusor, ni patay.”​—1 Corinto 15:26.

• “Awanton ni patay. Awanto metten ti panagladingit wenno panagsangit wenno ut-ot.”​—Apocalipsis 21:4.

Kasano nga ‘alimonen’ ti Dios ti ipapatay tapno “mapukawto” dayta? Kas nadakamaten, nalawag a kuna ti Biblia a “dagiti nalinteg” ket agyanto ditoy daga “iti agnanayon.” Ngem ibagana met nga “awan ti nalinteg a tao ditoy daga a kanayon nga agaramid iti naimbag ken saan nga agbasol.” (Eclesiastes 7:20) Tapno mapukaw ni patay, baybay-an kadin ti Dios dagiti mismo a pagalagadanna? Imposible dayta! Dina pulos aramiden dayta ta “ti Dios . . . saan a mabalin nga agulbod.” (Tito 1:2) Ania ngarud ti aramidenna tapno matungpal ti naayat a panggepna iti panangparsuana kadagiti tattao?

Nangaramid ni Jehova a Dios iti naayat nga urnos tapno maisalakan ti amin a tao manipud ken patay​—binayadanna ti subbot. Ti subbot ket panangibayad iti banag a katupag ti gatad ti nadadael wenno panangaramid iti ipakalikagum ti hustisia. Gapu ta managbasol amin a tao ken nasentensiaan a matay, direkta nga ibaga ti Biblia: ‘Awan kadakuada ti makasubbot iti kabsatda, wenno makaited iti Dios iti pangbayadda iti biagda, (nakanginngina ti pangsubbot iti biagda, saanda a pulos kabaelan a bayadan dayta).’​—Salmo 49:7, 8.

No matay ti imperpekto a tao, dagiti laeng basolna ti mabayadanna; dina masubbot ti bagina wenno mabayadan dagiti basol ti sabali a tao. (Roma 6:7) Kasapulantayo ti maysa a tao a perpekto ken awanan basol tapno itedna ti biagna, saan a para kadagiti basolna, no di ket kadagiti basoltayo.​—Hebreo 10:1-4.

Kasta ti eksakto nga inyurnos ti Dios. Imbaonna ti Anakna a ni Jesus manipud langit tapno mayanak ditoy daga kas perpekto, awanan basol a tao. (1 Pedro 2:22) Imbaga ni Jesus nga immay tapno “itedna ti biagna kas pangsubbot iti adu.” (Marcos 10:45) Natay tapno mapukaw ti kabusor a ni patay ken agbiagtayo.—Juan 3:16.

Kas kaitungpalan ti padto ti Biblia, agbibiagtayon kadagiti “delikado ken narigat a tiempo,” a mangpaneknek nga agbibiagtayon iti “maudi nga al-aldaw” daytoy dakes a sistema ti bambanag. (2 Timoteo 3:1) Agpatingga dagiti maudi nga al-aldaw inton dumteng ti “aldaw ti panangukom ken iti pannakadadael dagiti dakes a tattao.” (2 Pedro 3:3, 7) Ngem dagiti tattao a mangay-ayat iti Dios ket maisalakan iti dayta a pannakadadael ken “agbiagto nga agnanayon.”​—Mateo 25:46.

Minilion ti maaddaan iti gundaway nga agbiag nga agnanayon inton mapagungarda. Nangpagungar ni Jesus idi napan iti siudad ti Nain. Natay ti  kakaisuna nga anak ti maysa a balo isu a “naasian” ni Jesus ket pinagungarna. (Lucas 7:11-15) Imbaga met ni apostol Pablo: “Adda namnamak iti Dios . . . nga agungarto agpadpada dagiti nalinteg ken dagiti nakillo.” Daytoy a sigurado a namnama ket maysa nga awan kapadana a panangipakita ti Dios iti ayatna iti amin a tattao.​—Aramid 24:15.

Manamnama ti binilion a tattao nga agbiagdanto nga agnanayon. Kuna ti Biblia: “Dagiti nalinteg kukuadanto ti daga, ket agyandanto iti dayta iti agnanayon.” (Salmo 37:29) Iti dayta a tiempo, mapadasandanto a mismo ti naidumduma ngem makaliwliwa nga insurat ni apostol Pablo agarup 2,000 a tawenen ti napalabas: “Patay, ayan ti panagballigim? Patay, ayan ti siludmo?” (1 Corinto 15:55) Mapukawton ni patay, ti nakabutbuteng a kabusor ti amin a tattao!