DAGA dagiti bulkan ken danaw (lake) ti masansan nga awag iti Nicaragua. Adda ditoy ti kadakkelan a danaw iti Central America—ti Lake Nicaragua. Aw-awagan dayta dagiti katutubo a tribu iti Cocibolca, a kayatna a sawen “Nasam-it a Baybay.” Ginasgasut nga isla ti adda ditoy. Ken daytoy ti kakaisuna a danaw a danum-tamnay nga addaan ik-ikan a gagangay a masarakan iti baybay kas iti pating, swordfish, ken tarpon.

Makita met iti Nicaragua ti maysa kadagiti kasusulinekan a rehion iti Central America—ti Mosquito Coast. Agakaba daytoy a rehion iti 65 a kilometro ken nakaat-atiddog ta uray la saklawenna ti dandani intero a makindaya a kosta ti nasion ket dumanon pay iti kaabayna a Honduras. Maysa ti Miskito (sabali nga ispeling ti Mosquito) kadagiti sumagmamano a katutubo a tribu iti Nicaragua nga addan sadiay sakbay pay a simmangpet dagiti taga-Europa idi 1500’s.

Nadekket dagiti Miskito iti maysa ken maysa ken naidumduma ti kostumbreda. Kas pagarigan, iti lengguahe a Miskito, awan ti pormal a pangawag kas iti “Mister” wenno “Miss.” Iti aw-away, “Angkel” wenno “Anti” ti awag dagiti ub-ubing kadagiti lallakay wenno babbaket, kabagianda man wenno saan. Ti maysa a nabayagen a kaugalian dagiti babbai  a Miskito ket ti panangbeso-besoda iti nadekket a gagayyem wenno kakabagianda kas panangkablaaw. Bayat nga ar-aramidenda dayta, umanges ti babai nga immuna a kimmablaaw.