BINILION ti nakabasan wenno nakangngegen iti ibagbaga ti Biblia maipapan iti nangrugian ti uniberso. Ti salaysay a 3,500 a tawen ti kabayagnan ket mangrugi babaen iti daytoy a nalatak a sasao: “Idi punganay, ti Dios pinarsuana ti langlangit ken ti daga.”

Ngem adu ti saan a makaammo iti kinapudno a dagiti lider ti Kakristianuan agraman dagiti makunkuna a creationist ken fundamentalist ket nangaramid iti adu nga estoria maipapan iti panamarsua ngem maikontra met iti agpayso a salaysay ti Biblia. Dagita nga interpretasion ket saan a maitunos iti nasientipikuan a kinapudno. Nupay dagita nga estoria ket awan iti Biblia, dagita ti makagapu nga ibilang ti dadduma a parparbo laeng ti salaysay ti Biblia.

Nagadu ti di makaammo iti pudno a salaysay ti Biblia maipapan iti panamarsua. Nakababain dayta ta kinaagpaysuanna, ipakita ti Biblia ti mapagtalkan ken lohikal unay a panangilawlawag maipapan iti nangrugian ti uniberso, ken maitunos pay ketdi dayta iti natakuatan ti siensia. Wen, mabalin a maragsakanka no maammuam ti nailemmeng a salaysay ti Biblia maipapan iti panamarsua!

Ti salaysay ti Biblia maipapan iti panamarsua ket naibatay iti kinapudno nga adda maysa a Katan-okan a Persona, Mannakabalin-amin a Dios a nangparsua iti amin a banag. Siasino isuna ken ania ti kinapudno maipapan kenkuana? Ipalgak ti Biblia nga isu ket interamente a naiduma kadagiti didiosen kadagiti nalatak a kultura ken kaaduan a relihion. Isuna ti Namarsua iti amin a banag, ngem nagbassit ti ammo ti kaaduan maipapan kenkuana.

• Ti Dios ket maysa a persona, maysa nga indibidual. Saan a maysa a di masinunuo a puersa, awanan iti personalidad, agalla-alla nga awanan panggep iti uniberso. Adda pampanunot, rikrikna, ken panggepna.

• Awan limitasion ti pannakabalin ken sirib ti Dios. Dayta ti makagapu a komplikado ti disenio ti sangaparsuaan, nangruna dagiti sibibiag a banag.

• Pinarsua ti Dios ti amin a makita a banag. Saan ngarud a mabalin a nagtaud isuna kadagiti pisikal nga elemento a pinarsuana a mismo. Imbes ketdi, isu ket maysa nga espiritu wenno di makita a persona.

• Awan inggana ti kaadda ti Dios. Kankanayon nga adda ken agnanayonto latta nga adda. Awan ngarud ti namarsua kenkuana.

• Adda personal a nagan ti Dios, a rinibu a daras a mabasa iti Biblia. Jehova dayta a nagan.

• Ay-ayaten ni Jehova a Dios dagiti tattao ken maseknan kadakuada.

Kuna ti Biblia a pinarsua ti Dios “ti langlangit ken ti daga.” Ngem daytoy a nalawa ti saklawenna a sasao dina dinakamat ti kaatiddog ti tiempo a nausar tapno maparsua ti uniberso wenno dagiti pamay-anna a nangbukel iti dayta. Ti ngay nasaknap a patpatien dagiti creationist a pinarsua kano ti Dios ti uniberso iti literal nga innem nga aldaw a sag-24 nga oras? Dayta nga ideya a saan nga akseptaren dagiti sientista ket naibasar iti agdadata a di umiso a pannakaawat iti salaysay ti Biblia. Usigem no ania a talaga ti kuna ti Biblia.

• Ti Biblia dina supsuportaran dagiti fundamentalist ken creationist a mangibagbaga a literal a sag-24 nga oras dagiti aldaw ti panamarsua.

• Masansan nga us-usaren ti Biblia ti termino nga “aldaw” a mangtukoy iti nagduduma a periodo ti tiempo. Iti dadduma a kaso, saan a masinunuo ti kaatiddog dagitoy a tiempo. Ti maysa a pagarigan daytoy ket ti salaysay maipapan iti panamarsua a mabasa iti Genesis a libro ti Biblia.

• Iti salaysay ti Biblia, tunggal maysa kadagiti innem nga aldaw ti panamarsua ket mabalin a nagpaut iti rinibu a tawen.

• Nalpasen a pinarsua ti Dios ti uniberso agraman ti awan biagna a planeta a Daga idi nangrugin ti umuna nga aldaw ti panamarsua.

• Agparang a ti innem nga aldaw ti panamarsua ket atiddog a tiempo kabayatan a ni Jehova a Dios insaganana ti daga a pagnaedan ti tao.

• Ti salaysay ti Biblia maipapan iti panamarsua ket maitunos kadagiti konklusion ti siensia maipapan iti kabayagen ti kaadda ti uniberso.

Adu ti di mamati iti Biblia. Akseptarenda ti teoria a dagiti sibibiag a banag ket naggapu kadagiti awan biagna a kemikal babaen iti di ammo ken awanan panggep a proseso. Adda kano tiempo idi a timmaud ti kasla bakteria a makapataud iti kakikitana nga organismo nga in-inut a nagbalin nga amin a kita nga adda ita. Ipakita ngarud daytoy a ti mamagpanunot a komplikado unay a tao ket nagtaud laeng iti bakteria.

Ti teoria nga ebolusion ket patien met ti adu a mangibagbaga nga akseptarenda ti Biblia kas sao ti Dios. Mamatida a ti Dios ti nangpataud iti umuna a biag ditoy daga ngem kalpasanna, binantayan ken nalabit inwanwanna ti proseso ti ebolusion. Ngem saan a kasta ti kuna ti Biblia.

• Sigun iti Biblia, pinarsua ni Jehova a Dios ti amin a kangrunaan a kita ti mula ken animal, agraman ti perpekto a lalaki ken babai a makabael nga agdesision, ken mangipakita iti ayat, sirib, ken kinahustisia.

• Dagiti kita ti animal ken mula a pinarsua ti Dios ket nalawag a nagbalbaliw ken nakapataud iti agduduma a kakikitada. Iti adu a kasasaad, nakadkadlaw ti nagdudumaan dagita.

• Ti salaysay ti Biblia maipapan iti panamarsua ket maitunos iti naobserbaran ti siensia nga adda panagduduma ti maysa a kakikita.

Idi katengngaan ti 1800’s, immanamong ti British biologist a ni Alfred Russel Wallace iti teoria ti ebolusion ni Charles Darwin a natural selection (dagiti laeng kapigsaan ti matda). Ngem uray dayta a biologist a nalatak nga ebolusionista ket naipadamag a nagkuna: ‘Para kadagidiay addaan iti mata a makakita ken isip a nairuam nga agpanunot, adda Isip wenno intelihente ken masirib a mangiwanwanwan kadagiti kabassitan a selula, iti dara, iti intero a daga, ken iti namituen nga uniberso.’

Agarup 2,000 a tawen sakbay ni Wallace, nabayagen a mabasa iti Biblia ti maipapan iti Dios: “Ta dagiti di makita a kualidadna ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid, ti mismo nga agnanayon a pannakabalin ken kina-Diosna.” (Roma 1:20) Mabalin a no dadduma, kayatmo nga utoben dagiti nakaskasdaaw a kinakomplikado dagiti bambanag a makita iti sangaparsuaan—manipud iti maysa a bulong ti ruot agingga iti di mabilang a bituen iti langit. No sukimatem ti sangaparsuaan, maamirismo nga adda la ketdi Namarsua.

Nalabit maisaludsodmo, ‘Ngem no adda naayat a Dios a nangparsua iti amin a banag, apay nga ipalpalubosna ti panagsagaba? Binaybay-anna kadin dagiti parsuana ditoy daga? Ania ti masakbayan?’ Naglaon ti Biblia iti adu pay a salaysay a nailemmeng—dagiti kinapudno a ginaburan dagiti natauan a kapanunotan ken narelihiosuan a pannursuro isu a nailimed iti kaaduan a tattao. Dagiti Saksi ni Jehova a mangipabpablaak iti daytoy a magasin ket maragsakan a tumulong kenka a mangsukimat iti nasin-aw a kinapudno iti Biblia ken mangammo iti ad-adu pay maipapan iti Namarsua ken iti masakbayan dagiti tattao a pinarsuana.