Naisangsangayan a Libro

I-PLAY

Naisangsangayan a Libro

“Ti Biblia ti kasaknapan a naiwaras a libro iti pakasaritaan ti tao.”—The World Book Encyclopedia.

NASUROK a 550 a tawenen ti napalabas, ti Aleman nga imbentor a ni Johannes Gutenberg inrugina ti agimprenta babaen ti movable type. Ti Biblia ti immuna a kapatgan a libro nga inyimprentana. * Sipud idin, binilion a nagduduma a libro ti nayimprenta. Ngem ti Biblia ti naisangsangayan kadakuada amin.

▪ Napattapatta a nasurok nga 4.7 bilion a Biblia (intero wenno pasetna) ti nayimprenta. Nasurok a lima a daras nga ad-adu dayta ngem iti maikadua a kasaknapan a naiwaras a publikasion, ti Quotations From Chairman Mao.

▪ Iti nabiit pay, nasurok a 50 milion a kopia ti Biblia wenno pasetna ti naiwaras iti maysa laeng a tawen. “Ti Biblia ti kaaduan a malako a libro iti kada tawen,” kuna ti magasin a The New Yorker.

▪ Naipatarus ti Biblia iti nasurok a 2,400 a lenguahe, intero man wenno pasetna. Dadduma a paset ti Biblia ti magun-odan iti lenguahe nga us-usaren ti nasurok a 90 porsiento a tattao iti intero a lubong.

▪ Agarup kagudua iti bilang dagiti mannurat iti Biblia ti nakairingpas kadagiti sursuratda sakbay ti pannakaipasngay ni Confucius, ti mararaem a pilosopo a Tsino, ken ni Siddhārtha Gautama, ti nangipasdek iti Budismo.

▪ Dakkel ti impluensia ti Biblia iti tay-ak ti arte, a pakairamanan ti dadduma a kalalatakan a lamina, musika, ken literatura iti lubong.

▪ Nalasatan ti Biblia dagiti panangiparit ti gobierno, panangpuor dagiti relihioso a bumusbusor, ken panangkondenar dagiti kritiko. Awan ti sabali a libro a naipasango ken nakalasat iti kasta unay nga ibubusor.

Saan kadi a naisangsangayan dagita a kinapudno maipapan iti Biblia? Siempre, saan laeng a dagiti nakaskasdaaw a detalye ken estadistika ti mangpaneknek a mapagtalkan ti Biblia. Adalentayo iti sumaganad nga artikulo dagiti lima a rason no apay a minilion a tattao ti nakombinsir nga agtalek iti Biblia.

[Footnote]

^ par. 3 Ti Biblia nga inyimprenta ni Gutenberg ket maysa a patarus a Latin ken nairingpas idi agarup 1455.

[Dagiti Ladawan iti panid 4]

Ti pagimprentaan ni Gutenberg ken maysa a panid ti Biblia nga inyimprentana

[Gubuayan]

AGRIINGKAYO!