“Masapul nga ayaten ti asawa a lalaki ti asawana a babai kas iti bukodna a bagi. Ti lalaki a mangay-ayat ken baketna ay-ayatenna ti bagina, ta awan pay a pulos ti tao a nanggura iti bukodna a bagi, no di ket pakanen ken dungdungnguenna dayta.”​—EFESO 5:28, 29.

Ti asawa a lalaki ti ulo ti pamilia. (Efeso 5:23) Ngem ti nasayaat nga asawa a lalaki ket saan a naulpit wenno naturay. Ipatpategna ni baketna ken ipapaayna ti material ken emosional a kasapulanna. Ikagkagumaanna met a paragsaken, a saanna a kanayon nga ipilit ti kayatna. (Filipos 2:4) Ibagana ti rikrikna ken pampanunotna ken dumngeg iti ibaga ni baketna. Saanna a “pagungtan iti nakaro” wenno saktan iti pisikal wenno emosional.​—Colosas 3:19.

“Masapul nga adda nauneg a respeto ti babai iti asawana a lalaki.”​—EFESO 5:33.

No respetuen ti asawa a babai ni lakayna ken suportaranna dagiti desisionna, maadda ti talna iti pamilia. No agkamali ni lakayna, saanna a tagibassiten, no di ket naalumamay ken ipakitaanna latta iti respeto. (1 Pedro 3:4) No adda problema nga ibagana, mangpili iti nasayaat a tiempo tapno makisarita kenkuana iti nadayaw a pamay-an.​—Eclesiastes 3:7.

“Ti lalaki . . . ket makitiponto iti asawana ket agbalindanto a maymaysa a lasag.”​—GENESIS 2:24.

No agkasar ti lalaki ken babai, maaddaanda iti nadekket a relasion. Masapul ngarud nga ikagumaan dagiti agassawa a pagtalinaeden a natibker ti relasionda babaen ti naimpusuan a komunikasion ken panangaramid kadagiti nasayaat a banag para iti tunggal maysa. Masapul met nga agtalinaedda a matalek iti maysa ken maysa babaen ti saan a pannakidenna iti saanda nga asawa. Nakasaksakit ti epekto ti di kinamatalek, wenno panangliput iti asawa. Dadaelenna ti panagtalek ken ti pamilia.​—Hebreo 13:4.

“Sanayem ti ubing iti dalan a rumbeng a papananna; uray inton lumakay saannanto a panawan dayta.”​—PROVERBIO 22:6, footnote.

Inikkan ti Dios dagiti nagannak iti responsabilidad a mangsanay kadagiti annakda. Ramanen dayta ti panangisuroda kadagiti nasayaat a kababalin ken panangipakita iti nasayaat nga ulidan kadakuada. (Deuteronomio 6:6, 7) No agkamali ti anak, saan a nalabes ti reaksion ti masirib a nagannak. Isu ket “alisto a dumngeg, . . . nainayad nga agsao, nabannayat nga agpungtot.” (Santiago 1:19) No marikna ti nagannak a masapul a madisiplina ti anak, aramidenna dayta gapu iti ayat, saan a gapu iti pungtot.

“Annak, agtulnogkayo kadagiti nagannakyo . . . ‘Dayawem da tatang ken nanangmo.’”​—EFESO 6:1, 2.

Masapul nga agtulnog dagiti annak kadagiti nagannakda ken ipakitaanda iti nauneg a respeto. No padayawan dagiti annak dagiti nagannakda, agbalin a naragsak ken natalna ti pamilia. Mapadayawan dagiti adulto nga annak dagiti nagannakda no siguraduenda a maaywananda a naimbag. Mabalin a ramanen dayta ti panangtulongda a mangmantener iti balayda wenno panangted iti kasapulan a pinansial a tulong.​—1 Timoteo 5:3, 4.