Inlawlawag ni Jesus a “bassit nga ipastoran” laeng ti maikkan iti lugar iti Pagarian ti langit. (Lucas 12:32) Ngem masapul a saan a laglag-anen ti panangawat iti kasta a gunggona. Kinapudnona, impaganetgetna a nagpateg nga ipakita ti maysa ti umiso a kababalin no isu ket agbalin a paset ti Pagarian.

Gapuna, binalakadan ni Jesus dagiti adalanna nga agsaganada iti panagsublina. Kinunana: “Agrubbuatkayo ken agsaganakayo ket sindianyo dagiti lamparayo. Agbalinkayo koma a kas kadagiti mangpaspasungad iti panagsubli ti apoda manipud iti kasar, tapno inton sumangpet ken agtuktok, mailukatda a dagus ti ridaw para kenkuana. Naragsak dagita nga adipen a naridam a masangpetan ti amoda!”​—Lucas 12:​35-37.

Nalaka laeng a maawatan dagiti adalan ti kababalin nga ipapaawat ni Jesus. Nakasagana dagiti adipen a dinakamatna, nga ur-urayenda ti panagsubli ti apoda. Inlawlawag ni Jesus: “Uray no sumangpet [ti apoda] iti tengnga ti rabii [manipud iti alas nuebe iti rabii agingga iti tengnga ti rabii], wenno iti panagtataraok dagiti kawitan [manipud iti tengnga ti rabii agingga iti alas tres ti parbangon], naragsakda inton masangpetanna ida a nakasagana!”​—Lucas 12:38.

Daytoy ket saan laeng a balakad maipapan iti panagbalin a nagaget nga adipen wenno trabahador. Nalawag dayta iti pananginaig ni Jesus, ti Anak ti tao, iti bagina iti ilustrasion. Imbagana kadagiti adalanna: “Masapul ngarud a kanayon a nakasaganakayo met, ta umay ti Anak ti tao iti oras a saanyo nga ipagarup.” (Lucas 12:40) Gapuna, umay ni Jesus iti aniaman a tiempo iti masanguanan. Kayatna a nakasagana dagiti pasurotna, nangnangruna ti “bassit nga ipastoran.”

Kayat ni Pedro a nalawag a maawatanna ti kaipapanan ti imbaga ni Jesus, isu a dinamagna: “Apo, para laeng kadi kadakami daytoy nga ilustrasion wenno para iti amin?” Imbes a sungbatan ni Jesus ni Pedro, nangibaga iti ilustrasion. Kinunana: “Asino a talaga ti matalek a mayordomo, daydiay masirib, a dutokan ti apona a mangaywan iti amin nga adipen ti apona, tapno kanayon nga ipaayanna ida iti umdas a taraon iti umiso a tiempo? Naragsak dayta nga adipen no masangpetan ti apona a kasta ti ar-aramidenna! Ipasiguradok a dutokannanto a mangaywan iti amin a sanikuana.”​—Lucas 12:​41-44.

Iti immun-una nga ilustrasion, “ti apo” ket nalawag a tumukoy ken Jesus, ti Anak ti tao. Nalawag ngarud a “ti matalek a mayordomo” ket buklen dagiti tattao a paset ti “bassit nga ipastoran” a pakaitedanto ti Pagarian. (Lucas 12:32) Ibagbaga ni Jesus a dadduma a miembro daytoy a grupo ti mangipaayto iti taraon​—“umdas a taraon iti umiso a tiempo”​—iti “amin nga adipen ti apona.” Gapuna, ni Pedro ken ti dadduma nga adalan nga isursuro ken pakpakanen ni Jesus iti naespirituan maikunada nga addanto tiempo nga umay ti Anak ti tao. Ket iti dayta a tiempo, addanto maaramid nga urnos para iti naespirituan a panangpakan kadagiti pasurot ni Jesus, ti “amin nga adipen” ti Apo.

Impaganetget ni Jesus ti sabali pay a pamay-an no apay a masapul a naridam dagiti adalanna ken masapul nga asikasuenda ti kababalinda. Ngamin, mabalin a saan a maseknan ti maysa ken mabalin a busorenna pay dagiti kakaduana: “Ngem no panunoten ti adipen, ‘Mabayag pay a sumangpet ti apok,’ ket kabilenna dagiti lallaki ken babbai a padana nga adipen, ken mangan ken uminum ken agbartek, umayto ti apona iti aldaw a saanna a namnamaen ken iti oras a dina ammo, ket dusaennanto iti kakaruan ken ipannanto iti ayan dagiti saan a matalek.”​—Lucas 12:​45, 46.

Imbaga ni Jesus nga immay tapno “mangirugi iti apuy ditoy daga.” Talaga a kasta ti inaramidna. Nangpataud kadagiti isyu a nakaigapuan ti nabara a panagsusupiat nga arigna nangpuor kadagiti  palso a sursuro ken tradision. Daytoy pay ti mamagsisina kadagiti tattao nga agkaykaysa koma, ta kontraen ti “ama ti anakna a lalaki, ti anak a lalaki kontraenna ti amana. Ti ina kontraenna ti anakna a babai, ti anak a babai kontraenna ti inana. Ti katugangan-a-babai kontraenna ti manugangna-a-babai ken ti manugang-a-babai kontraenna ti katuganganna-a-babai.”​—Lucas 12:​49, 53.

Daytoy nga imbagana ket nangnangruna a para kadagiti adalanna. Kalpasanna, inturong ni Jesus ti atensionna kadagiti tattao. Saan a patien ti kaaduan dagiti ebidensia nga isu ti Mesias, isu a kinunana: “No makitayo a napuskol ti ulep iti laud, kunayo a dagus, ‘Adda umay a bagyo,’ ket kasta ti mapasamak. Ket no madlawyo nga aggapu ti angin iti abagatan, kunayo, ‘Addanto nakaro a pudot,’ ket kasta ti mapasamak. Managinsisingpet! Maibagayo ti kasasaad ti paniempo babaen ti panangkitayo iti daga ken langit, ngem apay a diyo ammo ti kaipapanan dagiti mapaspasamak iti daytoy a tiempo?” (Lucas 12:​54-56) Nalawag a saanda a nakasagana.