Ebanghelio ni Mateo 10:1-42
10 Inayaban ni Jesus ti 12 nga adalanna ket inikkanna ida iti autoridad a mangparuar kadagiti dakes nga espiritu+ ken mangpaimbag iti amin a kita ti sakit.
2 Dagitoy ti 12 nga apostol:+ Ni Simon, a naawagan iti Pedro,+ ken ni Andres+ a kabsatna; da Santiago ken Juan+ nga annak ni Zebedeo;
3 da Felipe ken Bartolome;+ da Tomas+ ken Mateo+ nga agsingsingir iti buis; ni Santiago nga anak ni Alfeo; ken ni Tadeo;
4 ni Simon a Cananeo;* ken ni Judas Iscariote, a nangtraidor kenkuana idi agangay.+
5 Imbaon ni Jesus dagitoy a 12 ket imbilinna:+ “Dikay mapan iti kalsada dagiti nasion, ken saankayo a sumrek iti aniaman a siudad dagiti Samaritano;+
6 no di ket birokenyo laeng dagiti napukaw a karnero iti Israel.+
7 Inkayo ket ikasabayo: ‘Asidegen ti Pagarian ti langit.’+
8 Agasanyo ti masakit,+ pagungarenyo ti natay, paimbagenyo ti agkukutel, paruarenyo dagiti demonio. Inawatyo nga awan bayadna, itedyo nga awan bayadna.
9 Dikay mangitugot iti balitok wenno pirak wenno gambang nga ikabilyo iti sinturonyo,+
10 wenno pagkargaan iti taraon, ta maikari ti trabahador a maikkan iti taraon.+ Dikay met mangitugot iti dua a bado,* wenno sandalias, wenno sarukod.+
11 “Iti aniaman a siudad wenno ili a serkanyo, birokenyo ti asinoman a maikari, ket agyankayo sadiay agingga a pumanawkayo.+
12 No sumrekkayo iti balay, kablaawanyo dagiti bumalay.
13 No awatendakayo, agtalinaed koma kadakuada ti talna nga inkablaawyo;+ ngem no saan, agtalinaed koma kadakayo ti talna.
14 No saandakayo nga awaten wenno denggen, pampagenyo ti tapok kadagiti sakayo ket pumanawkayo iti dayta a balay wenno siudad.+
15 Pudno kunak kadakayo, nalaklakanto a makaibtur ti Sodoma ken Gomorra+ ngem iti dayta a siudad inton Aldaw ti Panangukom.
16 “Ibaonkayo a kas karnero iti tengnga dagiti lobo; naannadkayo koma a kas kadagiti uleg ngem naamo a kas kadagiti kalapati.+
17 Agannadkayo kadagiti tattao, ta idarumdakayto kadagiti korte+ ken saplitendakayto+ kadagiti sinagoga.+
18 Maipankayto kadagiti gobernador ken ari+ gapu kaniak ket ipakaammoyonto kadakuada ken kadagiti nasion+ ti maipapan kaniak.
19 Ngem no idarumdakayo, dikay madanagan no kasano wenno ania ti ibagayo, ta maitedto kadakayo ti ibagayo iti dayta nga oras;+
20 ta saan laeng a dakayo ti agsao, no di ket tulongannakayto ti espiritu ni Amayo.+
21 Ipapatayto met dagiti tattao ti mismo a kabsatda, wenno anakda, ket busorento dagiti annak dagiti nagannakda ken ipapataydanto ida.+
22 Guraendakayto ti amin a tattao gapu iti naganko,+ ngem ti makapagibtur* agingga iti panungpalan, maisalakanto.+
23 No idadanesdakayo iti maysa a siudad, mapankayo iti sabali;+ ta pudno kunak kadakayo, diyonto pay maileppas a kasabaan dagiti tattao kadagiti siudad ken ili ti Israel, dumtengton ti Anak ti tao.
24 “Saan a natantan-ok ti estudiante ngem iti mangisursuro kenkuana, wenno ti adipen ngem iti amona.+
25 Mapnek koman ti estudiante nga agbalin a kas iti mangisursuro kenkuana, ken ti adipen a kas iti amona.+ No ti ulo ti pamilia ket awagan dagiti tattao iti Beelzebub,*+ sigurado a kastanto met ti iyawagda kadagiti miembro ti pamiliana!
26 Gapuna, diyo kabuteng ida ta awan ti naabbongan a saan a malukaisan, ken awan ti sekreto a dinto maammuan.+
27 Ti ibagak kadakayo iti kasipngetan, ibagayo iti lawag; ket ti mayarasaas kadakayo, ipakaammoyo iti tuktok dagiti balay.+
28 Dikay agbuteng kadagiti mangpapatay iti bagi ngem saanda a madadael ti kararua;*+ no di ket agbutengkayo iti daydiay makabael a mangdadael iti bagi ken iti biag idiay Gehenna.*+
29 Saan aya a ti dua a billit-tuleng ket mailako iti sinsilio a bassit ti pategna?* Kaskasdi ammo ni Amayo no matnag ti uray maysa kadakuada iti daga.+
30 Ngem ammona uray ti bilang ti buok ti uloyo.
31 Dikay ngarud agbuteng; napatpategkayo ngem iti adu a billit-tuleng.+
32 “Gapuna, ti mangbigbig kaniak iti sanguanan dagiti tattao,+ bigbigekto met iti sanguanan ni Amak idiay langit.+
33 Ngem ti mangilibak kaniak iti sanguanan dagiti tattao, ilibakkonto met iti sanguanan ni Amak idiay langit.+
34 Diyo panunoten nga immayak mangyeg iti talna ditoy daga; saanak nga immay a mangyeg iti talna, no di ket panagsisina.*+
35 Immayak a mangpataud iti panagsisina: ti anak a lalaki kontra iti amana, anak a babai kontra iti inana, ken manugang a babai kontra iti katuganganna a babai.+
36 Laglagipenyo a dagiti kabusor ti maysa a tao ket dagitinto miembro ti pamiliana.
37 Ti dakdakkel ti panagayatna iti ama wenno inana ngem kaniak, saan a maikari kas adalak; ken ti dakdakkel ti panagayatna iti anakna a lalaki wenno babai ngem kaniak, saan a maikari kas adalak.+
38 Ti saan a mangibaklay iti kayo a pagtutuokan* ken saan a sumurot kaniak, saan a maikari kas adalak.+
39 Ti makasarak iti kararuana,* mapukawnanto; ket ti makapukaw iti kararuana* maigapu kaniak, masarakannanto.+
40 “Ti umawat kadakayo awatennak met, ket ti umawat kaniak awatenna met Daydiay nangibaon kaniak.+
41 Ti umawat iti propeta gapu ta maysa a propeta, umawatto iti gunggona ti maysa a propeta;+ ken ti umawat iti nalinteg a tao gapu ta nalinteg, umawatto iti gunggona ti maysa a nalinteg.
42 Ti mangted iti uray sangabaso laeng a nalamiis a danum iti maysa kadagitoy a nanumo a tattao gapu ta maysa nga adalan, pudno kunak kadakayo, sigurado a magunggonaanto.”+
Footnotes
^ Wenno “naregta.”
^ Wenno “maysa pay a bado.”
^ Wenno “agib-ibtur.”
^ Awag ken Satanas, ti prinsipe, wenno agturay, kadagiti demonio.
^ Wenno “biag,” kayatna a sawen, panagbiag iti masanguanan.
^ Lit., “espada.”
^ Wenno “biagna.”
^ Wenno “biagna.”