Minilion a Saksi ni Jehova agraman dagiti inawisda a bisita ti nangselebrar iti pangrabii ti Apo idi Martes, Abril 4, 2023. Nupay naipasango ti adu kadagiti narigat a kasasaad, naatenderanda latta daytoy nga espesial nga okasion.

Kas pagarigan, idiay Ukraine, rinibu ti immatender iti Memorial iti laksid ti saan a nasayaat a paniempo ken nakaro a panaggugubat iti dadduma a lugar. Gapu ta delikado ti kasasaad iti maysa nga ili iti makindaya a Ukraine, inikkan dagiti panglakayen dagiti kakabsat iti kongregasion iti nairekord a palawag ti Memorial makalawas sakbayna. Kalpasan ti sumagmamano nga aldaw, napukaw ti Internet ken koriente—saan a gapu iti nakaro a panaggugubat—no di ket gapu iti napigsa a bagyo. Nupay kasta, nangngeg latta ti amin iti kongregasion ti nairekord a palawag ti Memorial uray awan ti koriente ken agtultuloy ti gubat.

Ni Violetta nga agtawen iti 15 ken taga-Kazakhstan ket busbusoren ti maysa a kapamiliana. Agarup 20 a tawen a nakaro a bumusbusor ni lolona, a mismo a pakipagnanaedanna. Masansan a paritanna ti pamilia da Violetta a mapan makigimong ken dadaelenna pay dagiti literaturada. Ngem gapu ta ipatpategna ni Violetta nga apokona, in-inut a natignay a makitungtong kenkuana maipapan iti Biblia. Ket iti daytoy a tawen, saan a ninamnama ni Violetta a makipagadal ni lolona iti Biblia ken umatender iti Memorial!

Para iti dadduma, narigat ti umatender iti Memorial gapu iti kinaadayo ti lugarda. Kadagiti siudad ti Same ken Suai iti Timor-Leste, adda 55 a regular a mayad-adalan iti Biblia babaen ti telepono. Manipud iti kaasitgan a kongregasion dagiti Saksi ni Jehova, masapul nga agmotorka iti sumagmamano nga oras tapno madanonmo dagita a siudad. Gapu iti dayta, adda dagiti balay a nayurnos a pakaangayan ti Memorial kadagita a siudad. Maysa a panglakayen ti nagbiahe iti uppat nga oras tapno agpalawag iti Memorial idiay Same. Adda 56 a timmabuno. Sabali pay a panglakayen ti nagbiahe iti agarup pito nga oras agingga iti Suai ket nasurok a 50 ti timmabuno iti Memorial.

Narigatan met dagiti kakabsattayo idiay Hualpén, Chile nga agsapul iti lugar a pagselebraranda iti Memorial. Nagpatulongda iti lokal nga opisial tapno makasapulda iti maitutop a lugar a pagselebraranda. Sumagmamano nga oras sakbay ti Memorial, naragsakan dagiti panglakayen idi impakaammo ti opisial nga ipausarda ti cafeteria ti maysa nga eskuelaan. Dagus a napan dagiti kakabsat ket pinagbalinda ti cafeteria a napintas a pakaangayan ti Memorial. Pinatgan ti opisial ken ti mayor ti siudad ti awis dagiti kakabsat a tumabunoda iti Memorial. Kinuna ti mayor: “Apresiarek ti kinaurnos ken kinarespeto dagiti timmabuno—uray dagiti ubbing ket disiplinado. Manamnamayo a sumuportakaminto manen iti masanguanan.”

Maragsakantayo met a makadamag nga idi Nobiembre 2022, legal a nairehistron dagiti kakabsat idiay Monaco. Kalpasan ti panangselebrarda iti Memorial iti nagmayat a pasilidad nga inabanganda, kinuna ti maysa a bisita: “Nagpintas daytoy a pasilidad, ngem ad-adda a pimmintas gapu kadagiti immatender.”

Anian a makaparegta ta napagballigian ti adu a kakabsat dagiti karit tapno matungpalda ti bilin ni Kristo nga agtitipon tapno “laglagipen” ti ipapatayna!—Lucas 22:19.