Maria Lúcia, ke asal ari Brazil bisi penyakit Sindrom Usher, iya nya penyakit keturunan ke ngasuh orang tuli tauka bengal sereta belubah-lubah nyadi buta. Iya endang ada bengal lalu belajarka jaku bengal-bisu kenyau ari mit. Udah nya, maya iya beumur dalam urung 30 taun, iya berengkah enda meda. Taja pan napi penanggul tu, Maria Lúcia enda ngenyauhka diri ari orang bukai. Diatu, lebih 70 taun, iya terus idup enggau gaga ati sereta ngembuan pengidup ti bisi tuju.

 Maria Lúcia betemu enggau Saksi-Saksi Jehovah ba taun 1977, sebedau iya berengkah buta. Ku iya madah, “Aku betemu enggau kaban sekula aku ke suba iya nya Adriano, ke nyadi Saksi empai lama tu. Iya bekunsi enggau aku pasal semaya Petara jemah ila ba bumi Paradais, lebuh semua orang ngembuan pengerai ti manah. Utai ke dipadah iya amat negu ati aku, nyentukka aku deka belajarka Bup Kudus. Enda lama udah nya, aku berengkah begulai enggau raban gempuru ba Rio de Janeiro. Ba raban gempuru tu sekeda gempuru nya bisi disalin ngagai jaku bengal-bisu. Enggau tulung Jehovah, aku mansang ba pengarap lalu dibaptisa kena bulan Julai 1978.”

 Pengudah nya, Maria Lúcia pindah ngagai raban gempuru ke nadai siku pan Saksi ke nemu jaku bengal-bisu. Keterubah iya, tu amat tusah ba iya laban iya enda nemu nama utai ke disebut maya begempuru. Dua iku menyadi Kristian meri bantu ngagai iya. Sida duduk enggau iya maya gempuru lalu nuliska nota kena nerangka utai ke disebut. Maria Lúcia madahka, “Ba rumah, aku ulih macha nota nya beulang-ulang nyentukka aku ulih faham nama utai ke ditulis nya. Udah nya, dua iku menyadi indu nya belajarka jaku bengal-bisu lalu nyadi penyalin aku.”

 Seraya mata Maria Lúcia majak enda meda, iya enda agi ulih meda jaku bengal-bisu ke dikenataika sida. Nyadi iya berengkah ngena jaku bengal-bisu enggau chara negu. Nama reti nya? Iya nerangka, “Aku ngengkahka jari aku ngagai sida ke nulung aku nyalin. Enggau chara nya, aku ulih ngasaika nama utai ke deka disalin sida.”

 Maria Lúcia amat beterima kasih ke pengawa penyalin iya. Ku iya madah baru, “Sida baka pemeri ti amat berega ari Jehovah. Ari bantu sida, aku bulih penguntung ba gempuru ninting minggu, gempuru besai sereta konvensyen.”

 Maria Lúcia mengkang ransing ba pengawa nginjil. Ngena chara jaku bengal-bisu enggau chara negu, iya ulih nginjil ngagai sida ke bengal. Sida amat alit ati enggau usaha iya ke bebendar ngiga sida, lalu ngerembaika Berita Manah. Maya pandemik COVID-19, Maria Lúcia udah nulis mayuh surat ngagai sida ke bengal enggau tulung ari menyadi iya José Antônio, ke mega bengal enggau buta. a

 Baka ni iya ngereja nya? Ku iya madah, “Aku ngena plastik ke bebentuk L nyadika perengka kena ngukur. Enggau chara tu, utai ke ditulis aku ba genteran enda singit. Pia mega, José Antônio ulih ingatka utai enggau manah. Iya meri idea pasal topik enggau ayat Bup Kudus, lalu aku nyimpan nya dalam surat. Aku nguji nulis enggau chara ti senang ba orang ke bengal, laban ukai semua sida ke bengal teleba meda jaku ke ditulis.”

 Taja pan diatu Maria Lúcia nadai ulih meda agi, tang iya terus ransing ba pengawa iya. Karoline, siku ari penyalin iya madahka, “Maria Lúcia ngereja semua kereja rumah. Iya nentuka rumah iya seruran beresi sereta kemas. Iya rindu manduk pemakai lalu bekunsika nya enggau bala kaban iya.”

 Jefferson, siku ari tuai gempuru ba raban gempuru Maria Lúcia mega madahka, “Maria Lúcia bisi pengerindu ti dalam ngagai Jehovah. Iya rinduka orang. Iya seruran ngereja utai ke penguntung orang bukai. Iya enda berundingka diri empu.”—Pilipi 2:4.