Ukir ba dinding tu ngembuan peninggi lapan meter (26 kaki) lalu diengkah ba pintu penama ngagai rumah sembiang orang Ejip ke digaga kena nyembah petara Amun ba Karnak. Nitihka sekeda pakar, ukir tu nunjukka pengawa Raja Ejip Sisak ke ngalahka sekeda menua ba timur laut Ejip, lalu tu nyengkaum menua Judah enggau perintah ba begian utara menua Israel.

 Ukir nya nunjukka Amun ti benung mandangka 150 iku orang ke ditaban ngagai Sisak tauka Sheshonk. a Genap iku orang ti ditaban nya ngarika menua tauka raban orang ke ditaban. Nama bandar nya diukir ba tubuh tiap iku orang ke ditaban nya. Sekeda nama nya chukup terang, lalu sekeda ke bukai amat dikelala orang ke macha Bup Kudus. Tu nyengkaum Bet-san, Gibeon, Megido enggau Sunem.

 Pengawa Ejip ke ngalahka menua Judah bisi dipadah ba Bup Kudus. (1 Raj. 14:25, 26) Bup Kudus mega bisi meri penerang ti nyemetak pasal chara Raja Sisak ngalahka menua nya. Bup Kudus madahka: “Dalam taun ti kelima Rehoboam nyadi raja, . . . Raja Sisak menua Ejip nyerang Jerusalem ngena 1,200 buah kerita perang, 60,000 iku bala soldadu ke nepan kuda, enggau mayuh soldadu bukai ti enda ulih diitung. . . . Iya ngalahka nengeri ti bekuta di menua Judah, lalu nyerang nyentuk ngagai Jerusalem.”—2 Bansa Israel 12:2-4.

 Ukai semina ukir ba Karnak nya aja ke nyadi bukti arkeologi ti nunjukka Raja Sisak kala ngalahka menua Israel. Kerimpak batu ke ditemu ba Megido, siti endur ke bisi ba Bup Kudus, bisi mega nulis nama “Sheshonk.”

 Rikut Bup Kudus ti betul pasal Raja Sisak ti ngalahka menua Judah, nunjukka penulis Bup Kudus nya amat lurus. Sida enggau lurus nulis semua utai pasal menua sida nyengkaum lebuh bansa sida menang tauka alah ba perang. Pengelurus ke baka tu tusah deka ditemu ba penulis jeman kelia menya.