Dalam 30 taun ti udah, mayuh orang ngasaika kaul entara mayuh menua ba serata dunya makin manah. Taja pia, utai ke nyadi baru-baru tu nunjukka utai nya enda amat.

•   “Mayuh orang irau perang ba Gaza deka ngerampit ngagai menua ke semak, laban piak Israel enggau piak Hezbollah berengkah beperang ba sempadan Lebanon.”—Reuters, 6 Januari 2024.

•   “Sekeda raban ke di baruh kuasa Iran benung beperang ba menua bukai lalu tiba-tiba Iran belabuh ngaga bom nuklear baru. Nambahka nya, Rusia enggau China diatu bekerejasama enggau Iran. Semua tu ngenakutka menua Barat.”—The New York Times, 7 Januari 2024.

•   “Rusia terus nyerang menua Ukraine lalu ngujungka mayuh pengerusak.”—UN News, 11 Januari 2024.

•   “Menua China mansang ba ekonomi, enggau kuasa ari segi soldadu enggau senyata. Asai temegahka menua diri majak kuat ba entara orang Taiwan. Lalu kaul entara China enggau Amerika Serikat enda entu manah diatu. Semua tu ulih ngasuh perang senang nyadi.”—The Japan Times, 9 Januari 2024.

 Kati Bup Kudus bisi madah nama-nama utai pasal gaya dunya ke enda entu stabil kemayaharitu? Kati utai nya ulih mai ngagai perang dunya?

 Bup Kudus nadai madah enggau nyemetak pasal sesiti perang baka ke dipeda kitai kemayaharitu. Taja pia, Bup Kudus bisi madahka pasal perang ke deka nyadi ba dini-dini endur ba jeman kitai, lalu nya deka “ngerampas pengelikun ari dunya.”—Pemandang 6:4.

 Bup Daniel madahka, ba hari ti penudi, kuasa dunya deka “nyerang” pangan diri, tauka ngerampas kuasa pangan diri. Laya tu ngujungka sida deka mandangka pemesai kuasa senyata enggau soldadu ba baruh sida, sereta ngena mayuh amat “pengaya” tauka duit ba pengawa beperang.—Daniel 11:40, 42, 43.

 Bup Kudus madahka, gaya dunya diatu deka majak jai sebedau iya nyadi manah. Jesus madahka: “Penusah ti Besai deka nyadi. Penusah nya nadai kala nyadi kenyau ari penumbuh dunya.” (Matthew 24:21) “Penusah ti Besai” nya deka mai perang ke dikumbai Armagedon. Bup Kudus nerangka nya “perang ke nyadi maya hari besai Petara ti Pemadu Bekuasa.”—Pemandang 16:14, 16.

 Taja pia, perang Armagedon ukai deka ngemunaska mensia, tang deka nyelamatka mensia. Nengah perang nya, Petara deka muai perintah mensia ke ngasuh perang majak nyadi. Kena nemu baka ni perang Armagedon deka mai pengelantang sereta pengelikun ti meruan, bacha meh artikel tu:

•   “Apakah Itu Perang Armagedon?” dalam jaku Melayu

•   “Kitai Ulih Gaga Ati Nganti Penatai Armagedon!”