Kelia, Jesus meri tanggung pengawa ngagai bala murid iya lalu nyebut, “Kita deka nyadi saksi aku . . . enggau ngagai ujung dunya.” (Surat Kereja Rasul 1:8) Kemayaharitu, Saksi-Saksi Jehovah enggau ransing, agi neruska pengawa tu ngagai serata dunya. Taja pia, enda ulih diseliahka, ba sekeda endur, nyengkaum menua ke besai sereta mayuh orang, agi bisi ari sida bedau kala ninga Berita Manah. Nambahka nya mega, ba sekeda menua mimit aja bala Saksi ba dia. (Matthew 9:37, 38) Nyadi, nama patut dikereja kitai ngambika mayuh agi orang ningaka pesan Petara?

 Ngambika kitai ulih terus ngereja pengawa ke diasuh Jesus, Komiti Nginjil di Baruh Raban ti Ngiring Saksi-Saksi Jehovah, nganjung pengerintis seberai tasik ngagai endur ke begunaka bantu. Naka ke diatu, bisi 3.090 iku bala pengerintis seberai tasik dianjung ngagai sekeda endur ba serata dunya. a Mayuh ari sida udah dilatih ba Sekula Bup Kudus, chunto iya Sekula Penginjil Perintah Petara. Sida sanggup ninggalka menua diri lalu pindah ngagai menua bukai. Laban sida tegap ba pengarap, udah dilatih, sereta bepeneleba, sida ulih meri tulung ti besai ba pengawa nginjil, lalu nyadi teladan ke bala menyadi ti bukai.

 Ba tiap iti pampang opis, Begian Penginjil ke bekerejasama enggau Komiti Pampang Opis, ngemataka utai ti diguna bala pengerintis seberai tasik. Sida nentuka, bala pengerintis seberai tasik tu bisi endur diau, ngiga chara berubat, sereta bantu ba utai ke diguna sida ninting hari. Sepemanjai taun nginjil 2020, Saksi-Saksi Jehovah udah ngena nyauka 27 juta dolar U.S (tauka RM111,742,087.16) kena bejalaika pengawa pengerintis seberai tasik. Ketegal tu, sida ulih ngena semua awak enggau pengering sida ba pengawa nginjil sereta ngeringka pengarap bala menyadi ba eklisia.

 Nama pengawa pengerintis seberai tasik ba pengawa nginjil? Menyadi Frank Madsen, seiku Komiti Pampang Opis Malawi madahka: “Bala pengerintis seberai tasik ke berani sereta landik tu, meransang bala penginjil ke bukai sama nginjil ngagai endur ke tusah. Chunto iya, endur ke dijaga enggau terit lalu orang dia ngena bansa jaku bukai. Kelimpah ari nya, sida pan bebendar belajarka bansa jaku ba endur ke ditulung sida, sereta adat orang dia. Tu nyadika teladan ti manah ngagai menyadi bukai ba menua nya empu. Bala pengerintis seberai tasik mega meransang bala nembiak gawa penuh jam ke Jehovah. Kami amat beterima kasih ngagai Jehovah laban bisi bala pengerintis seberai tasik dianjung kitu.”

 Seiku Komiti Pampang Opis ari menua bukai mega madah: “Nengah pengerintis seberai tasik tu, kitai ulih meda nembiak Jehovah endang amat beserakup ba serata dunya. Indah, orang ke ukai Saksi pan ulih meda, adat enda ulih mechahka kitai. Tang kitai ulih beserakup nyadi siti ruang bilik laban ajar Bup Kudus.”

 Nama tulung ke diberi pengerintis seberai tasik ngagai penginjil ba menua nya empu? Menyadi Paulo ari Timor-Leste amat beterima kasih ke pengawa bala pengerintis seberai tasik, ke mantu eklisia sida. Ku iya, “Endur kami amat angat. Tang, bala pengerintis seberai tasik tu datai ari menua ke chelap. Taja pia, sida enda nejuka pengangat tu nagang sida ari nginjil. Sida selalu datai nginjil mua ke pagi. Aku pan selalu lalu meda sida datai ngabas maya tengahari, ba maya ti benung balat amat angat. Sida pan kala datai ngabas maya malam hari. Sida udah nulung mayuh orang belajarka pemendar, nyengkaum aku empu. Sida amat ransing. Sida ngena pengidup diri nyembah Jehovah enggau pengabis ati. Ketegal teladan sida, semua kami ba eklisia mega bisi ati deka ngereja mayuh agi ba pengawa nginjil.

 Menyadi Ketti, seiku pengerintis biasa ba Malawi, nyeritaka baka ni sepasang pengerintis seberai tasik nulung sida sebilik: “Maya sepasang pengerintis seberai tasik nya dianjung ngagai eklisia kami, semina aku ke Saksi ba kami sebilik. Tang laki-bini nya selalu begulai enggau aku, lalu sida pan rapat enggau kami sebilik. Teladan sida muka runding anak kami, nyembah Jehovah nya ulih ngasuh idup kitai lantang sereta puas. Ketegal ulah ti positif ari sida, ketiga-tiga anak indu aku nyadi pengerintis biasa diatu, lalu laki aku pan berengkah datai begempuru.”

 Baka ni pengawa bala pengerintis seberai tasik tu dipelanja? Nengah pemeri ti sukarela ari serata dunya, lalu mayuh ari pemeri nya diberi nengah donate.isa4310.com. Terima kasih ngagai semua menyadi ke gerah jari meri pemeri kita.