Ngambika nyaga takah entara pangan diri, mayuh perintah menua nginsil gempuru orang mayuh. Saksi-Saksi Jehovah keran deka ngasika atur ari perintah, tang ba maya ti sama neruska sembah sida. Ngambika ulih begempuru, mayuh eklisia ngena aplikasi video call, baka Zoom.

 Ngambika ulih begempuru enggau tetap, Raban ti Ngiring ngemendarka duit pemeri kena melanja eklisia ti ngena Zoom. Atur tu udah nulung mayuh eklisia ti enda ulih melanja ungkus Zoom, enggau rega entara 15 dolar ngagai 20 dolar tauka lebih, iya nya entara RM64.00 ngagai RM85.00 dalam sebulan. Sekeda ari eklisia nya udah ngena aplikasi ti pechuma, tang aplikasi nya enda ulih nampung mayuh orang tama Zoom sereta enda tentu likun. Tang diatu, semua eklisia ke ngena Zoom, dipelanja gerempung, lalu ulih nyaga pengelikun sereta ulih nampung mayuh orang enggau begempuru nengah Zoom. Naka ke diatu, lebih ari 65,000 iti eklisia dalam lebih ari 170 menua benung ngena Zoom tu.

 Suba, Eklisia Kairagi di Manado, Sulawesi Utara Indonesia, ngena aplikasi video call ti pechuma, tang diatu sida udah berengkah ngena Zoom ti dipelanja gerempung kitai. Menyadi Hadi Santoso nerangka: “Indah bala menyadi ti enda tentu pandai ngena perengka elektronik, diatu ulih enggau gempuru. Tu ketegal, sida semina log in sekali aja tiap kali bisi gempuru.”

 Lester Jijón, Jr., seiku tuai gempuru ba Eklisia Guayacanes Oeste di Guayaquil Ecuador nerangka, “Ketegal mayuh bala menyadi enda tentu bepemisi, tusah amat sida melanja Zoom, ti enda natak penyampau orang ke ulih enggau. Kami amat beterima kasih ngagai gerempung, laban melanja Zoom ti ngemendarka mayuh amat orang enggau. Nyadi, kami ulih mai mayuh orang datai begempuru ngena Zoom.

 Johnson Mwanza, seiku tuai gempuru ba Eklisia Ngwerere Utara, di Lusaka Zambia nulis, “Mayuh bala menyadi suah madah, ‘ketegal gerempung udah melanja Zoom kami, kami ukai semina berasai rapat agi enggau bala menyadi, tang pia mega berasai dikerindu sereta dikeibuhka Jehovah.’”

 Zoom tu dipelanja ngena duit ti suah dikena meri tulung ngagai pengerusak alam. Belanja tu datai ari duit pemeri, ke diberi ngagai kutak pengawa di serata dunya. Diatu, mayuh ari duit pemeri tu, diberi nengah online ba donate.isa4310.com. Terima kasih enggau pengerah jari kita, ti meri duit pemeri ti suah dikena meri tulung ba pengerusak alam ba serata dunya.—2 Korint 8:14.