Kena bulan Mac 2020, Gerempung Pengerai Entarabansa (WHO) madahka jaku gerah, COVID-19 nya penyakit berampit ke dikumbai pandemik. Keterubah iya suba, mayuh orang enda nyangka virus tu ulih berampit ngagai serata dunya. Bejuta iku orang, nyengkaum Saksi-Saksi Jehovah, merinsa ba fisikal, emosi, enggau ba belanja ketegal penyakit tu. Nyadi, baka ni Saksi-Saksi Jehovah ngatur lalu meri bantu sepemanjai penusah tu?

 Dikemataka Komiti Ngatur ari Raban ti Ngiring Saksi-Saksi Jehovah, lebih ari 950 Komiti Tulung Pengerusak Alam (DRC) udah ditumbuhka ba serata dunya ketegal COVID-19 tu. Ba sekeda situasi, sida ngatur bala menyadi ba menua nya empu meri bantu ngagai menyadi ke begunaka tulung. Bisi mega, bala Saksi bulih bantu ari perintah. DRC mega meri bantu dalam penyampau ti besai.

 Chunto iya, ba Paraguay. Siti surat khabar madahka riput, “mayuh orang ke diau ba Paraguay enda chukup pemakai” ketegal penyakit berampit tu. Tang, DRC ba Paraguay udah berengkah nyadung kutak bantu ke ngembuan pemakai, perengka betuchi, sereta perengka kena nyaga pemeresi diri. Ungkus tiap iti kutak nya kira-kira 30 dolar Amerika (tauka RM125.15).

 Baka ni bala sukarela enggau orang bukai nyaga diri ari dirampit? Sida ngena penutup idung enggau mulut sereta nyaga takah. Sida mega nentuka kompeni ke nyediaka pemakai beresi, lalu nitihka atur ti udah ditetapka. Reti iya, sida ke nyediaka kutak bantu nya tadi patut ngena penutup idung enggau mulut, meresi sereta sanitasi perengka pengangkut sida, sereta nyimpan kutak bantu nya ba endur ke udah disanitasi ari kuman. Sida ke nganjung kutak bantu tu pan patut nyaga takah ari bala menyadi ke nerima bantu.

 Nyentukka ngagai bulan Januari 2021, Komiti Ngatur udah ngemendarka belanja lebih ari 25 juta dolar Amerika (tauka RM104,417.58) kena mantu sida ke napi penusah sepemanjai COVID-19. Pampang opis sereta DRC ngena duit pemeri enggau chara ti betul, lalu sida naka ulih ngulihka barang ke enda mar kelebih agi barang ke diguna ninting hari. Chunto iya, ba Chile. Bala menyadi lelaki ke ngatur deka meli 750 kilogram kachang. Tang, rega kachang nyau niki ngagai dua kali ganda dalam sebulan aja! Tang menyadi kitai tetap setuju meli kachang nya. Dua jam udah nya, orang ke nyual kachang nya madahka bisi orang bukai mulaika baru kachang ke udah dibeli iya. Nya alai, orang ke nyual kachang nya pan sanggup nyual enggau rega ti murah nitihka rega ba pasar baka ke sebedau tu!

 Tang enda memukai, lebuh menyadi kitai datai deka ngambi kachang nya, orang ke bejual kachang enggai nyual kachang nya ngagai sida. Iya nuduh sida nyadung pemakai enggau chara ti enda lurus, baka sekeda gerempung ke bukai. Pengudah besampi dalam ati, seiku ari menyadi kitai madahka orang bejual nya, tiap iti eklisia ke udah dipantau nunjukka sida amat begunaka bantu. Bala menyadi kitai pan nerangka, kutak bantu deka disadung nitihka utai ke diguna tiap iti ruang bilik sereta adat sida. Sida mega madah, semua duit ke dikena sida sereta kena nyukung pengawa sida, datai ari duit pemeri ti sukarela. Pengudah nya, ukai aja iya setuju nyual kachang enggau rega ti murah, tang iya pan meri 400 kilogram kachang ngagai menyadi kitai ke meli pengudah nya.

 Lusu, seiku balu ti udah tuai ba Liberia, begulai enggau lima iku diri sebilik iya. Bisi sekali, benung sida makai pagi lalu berandauka ayat ninting hari, uchu lelaki Lusu ke beumur tujuh taun meda nadai agi pemakai ba rumah. Nyadi iya pan nanya, “Nama utai empa kitai?” Lusu madahka diri udah besampi minta bantu, lalu iya andal Jehovah deka nyediaka utai ke diguna sida. Lemai nya, seiku tuai gempuru ba eklisia iya betalipun lalu ngasuh iya ngambi pemakai. Iya pan nyerita, “Uchu aku madahka, diatu baru meh iya nemu Jehovah ulih ninga sampi, laban Iya udah nyaut sampi aku.”

 Seiku indu ba Republik Demokratik Congo diau semak enggau siti ruang bilik Saksi. Pengudah iya meda ruang bilik nya nerima bantu ari menyadi Kristian, ku iya, “Pengudah penyakit berampit tu ila, kami deka nyadi Saksi-Saksi Jehovah, laban sida nyaga orang ke sama sepengarap enggau sida ba maya ti tusah tu.” Laki iya pan nanya, “Kati nuan sanggup nyadi Saksi ketegal sekampit beras?” Iya pan nyaut, “Ukai, tang sekampit beras nya meh tanda pengerindu ti bendar.”

 Saksi-Saksi Jehovah ulih meri bantu enggau jampat sepemanjai penyakit berampit tu, ketegal pemeri kita ti gerah jari. Terima kasih atas pemeri kita ke diberi enggau mayuh macham chara nengah donate.isa4310.com.