Nicolas enggau Céline napi cabaran ti bebida. Pampang opis Perancis ngasuh seduai iya pindah ngagai raban gempuru ti baru. Seduai iya madahka: “Terubah iya, kami amat gagit ati. Tang udah nya, kami nyau lelengauka bala kaban kami. Kami mega bedau entu rapat enggau bala menyadi ba raban gempuru ti baru nya.” a Taja pan bisi cabaran, tang baka ni nuan agi ulih mujur lebuh pindah ngagai raban gempuru ti baru? Baka ni bala menyadi bukai ulih nulung? Lalu, baka ni nuan ulih meransang orang bukai sereta bulih peransang ari raban gempuru ti baru nya?

EMPAT PRINSIP KE ULIH NULUNG NUAN NELEBAKA DIRI

1. Bepanggai ba Jehovah. (Mas. 37:5) Kazumi, ke diau ba Jepun, pindah ngagai raban gempuru ti baru laban nitihka laki iya ke pindah endur kereja. Iya udah enggau raban gempuru nya pengelama 20 taun. Baka ni Kazumi ‘nyerahka pengidup iya ngagai Jehovah’? Ku iya madahka: “Aku mayuh kali besampi ngagai Jehovah lalu madahka pasal asai ati aku. Aku suah berasai panik, sunyi, sereta irau. Lalu tiap kali aku ngereja nya, Jehovah meri aku pengering ke diguna aku.”

Baka ni nuan ulih bepanggai agi ba Jehovah? Utai tumbuh begunaka ai enggau nutrien ari tanah ngambika ulih tumbuh. Baka nya mega, pengarap kitai begunaka utai ke ulih disemaka baka ai enggau nutrien ke deka nulung iya majak tegap. Nicolas, ke dipadah tadi, belematika teladan Abraham, Jesus, enggau Paul, ke udah ngaga mayuh pengorbanan ngambika ulih ngereja peneka Petara. Lebuh iya belematika teladan sida, tu nulung iya andal agi Jehovah deka nulung iya. Enti nuan seruran belajarka Bup Kudus, tu ukai aja nulung nuan napi perubahan ba pengidup nuan, tang nuan mega  deka belajarka utai ke ulih dikena nuan meransang bala menyadi bukai ba raban gempuru ti baru.

2. Anang manding. (P-jar. 7:10) Siku menyadi lelaki ke benama Jules, patut nelebaka diri enggau budaya ti amat bebida lebuh iya pindah ari Benin ngagai Amerika Serikat. Ku iya ngenang baru: “Tiap kali aku betemu enggau orang ti baru, aku ngasaika diri patut becherita pasal cherita pengidup aku.” Ketegal iya enda biasa ngereja nya, iya berengkah ngenyauhka diri ari bala menyadi Kristian ba raban gempuru. Tang pengudah iya ngelala bala menyadi enggau manah agi, iya ngubah runding iya. Iya madahka: “Diatu aku sedar, enda ngira ba dini kitai, semua kitai sama aja. Semina chara kitai bejaku sereta ulah kitai aja enda sama. Nyadi amat penting kitai enda nguji ngubah bala menyadi kitai.” Nya alai, anang mandingka raban gempuru nuan ti baru enggau raban gempuru nuan ti suba. Baka ke dipadah Menyadi Anne-Lise, siku menyadi indu ke ngerintis: “Aku pindah laban aku deka belajarka utai ti baru. Ukai laban aku ngarapka utai ba endur ti baru sama baka endur ti lama.”

Bala tuai gempuru mega patut nyeliah ari mandingka raban gempuru sida ti suba enggau raban gempuru ti baru. Tuai gempuru ba raban gempuru ti baru engka ngena chara bukai ngereja utai. Tang tu ukai reti iya chara sida salah. Sebedau nuan meri cadangan, manah agi enti nuan ulih belajar mayuh agi pasal situasi tempatan. (P-jar. 3:​1, 7b) Manah agi ngajar nengah teladan ari ke ngansak bala menyadi ngereja utai nitihka runding nuan.—2 Kor. 1:24.

3. Mengkang kisuk ba raban gempuru nuan ti baru. (Plp. 1:27) Endang amat, pengawa pindah begunaka mayuh awak enggau pengering. Tang, penting amat nuan datai ngagai raban gempuru ti baru enggau lengkas, lalu enti ulih, enggau chara betunga mua. Nama kebuah tu penting? Bala menyadi ba raban gempuru ti baru patut suah agi meda nuan ngambika ulih rapat agi enggau nuan sereta nulung nuan. Lucinda, ke pindah enggau dua iku anak indu iya ngagai siti bandar ti besai ba Afrika Selatan, ngenang baru: “Bala kaban aku meransang aku ngambika bekaban enggau bala menyadi ba raban gempuru ti baru, nginjil begulai enggau sida, sereta meri komen ba gempuru. Kami mega madah ngagai bala menyadi, sida ulih ngena rumah kami ngaga gempuru sebedau nginjil.”

“Gawa enggau pangan diri” kena ngereja pengawa ba raban gempuru enggau bala menyadi Kristian nuan deka nulung negapka nuan enggau orang bukai. Anne-Lise ke dipadah tadi madahka bala tuai gempuru meransang iya ngambika nguji nginjil enggau semua orang ba raban gempuru iya ti baru. Nama asil iya? Ku iya madahka: “Aku sedar, tu chara ti pemadu manah nyadi sebagi ari raban gempuru.” Pia mega, lebuh nuan enggau sukarela ngereja utai baka meresi sereta nyaga Palan Gempuru, bala menyadi deka nemu, diatu nuan ngumbai raban gempuru ti baru nya raban gempuru nuan. Mayuh agi utai ke dikereja nuan enggau raban gempuru nuan ti baru, jampat agi bala menyadi Kristian deka berasai selesa enggau nuan. Lalu nuan deka ngasaika tu meh ruang bilik rohani nuan ti baru.

 4. Ngiga kaban ti baru. (2 Kor. 6:​11-13) Enti bala menyadi nemu nuan ibuhka sida, nuan deka senang agi nyadi kaban sida. Nyadi, kena meh chukup awak sebedau gempuru berengkah sereta pengudah gempuru ngambika nuan ulih berandau enggau bala menyadi bukai sereta bekelala enggau sida. Uji ingatka nama sida. Lebuh nuan ingatka nama bala menyadi, peramah, sereta nyamai enggau berandau, bala menyadi deka agi ngelala nuan lalu kita engka ulih nyadi kaban ti manah.

Nuan enda ibuh pepura nyadi orang bukai ngambika bala menyadi deka rinduka nuan. Tang awakka bala menyadi ngelala sapa nuan ti bendar. Belajar meh ari Lucinda ke madahka: “Diatu, kami bisi bala kaban ti manah laban kami ngambi inisiatif mai bala menyadi datai ngagai rumah kami.”

“NERIMA PANGAN DIRI”

Sekeda orang engka berasai takut lebuh tama ngagai raban gempuru ti baru. Nyadi, baka ni nuan ulih nulung bala menyadi ke baru pindah ngagai raban gempuru nuan? Rasul Paul meransang kitai: “Baka Kristus ke nerima kita, kita patut nerima pangan diri.” (Rom. 15:7) Lebuh bala tuai gempuru neladan Kristus, sida ulih nulung bala menyadi ti baru berasai dikelaluka. (Peda kutak “ Pindah ngagai Raban Gempuru ti Baru enggau Mujur.”) Taja pia, semua menyadi ba raban gempuru, nyengkaum bala anak, ulih nulung bala menyadi ti baru berasai selesa.

Nerima orang bukai ukai semina mai reti mai orang nya datai ngagai rumah nuan. Tang tu mega mai reti meri tulung ti praktikal ngagai sida. Ambika chunto, siku menyadi indu mai menyadi indu ke baru pindah ngagai endur iya, bejalai ba bandar lalu nunjukka iya chara ngena perengka pengangkut. Ati menyadi indu ti baru nya amat ditegu, lalu tu ngasuh iya berasai selesa agi ba endur iya ti baru.

PELUANG NGAGA PEMANSANG

Lebuh siku buntak mansang besai, iya patut nukar kulit beberapa kali sebedau iya ulih terebai. Baka nya mega, lebuh pindah ngagai raban gempuru  ti baru, nuan patut muai sebarang pengirau ke deka nagang nuan ari “terebai” jauh agi tauka ngereja mayuh agi ba pengawa ke Jehovah. Ku Nicolas enggau Céline madahka: “Pindah ngagai raban gempuru ti baru nya siti latihan ti manah. Ngambika ulih nelebaka diri enggau orang sereta endur ti baru, kami patut ngemansangka sifat ti baru.” Jean-Charles, ke dipadah ba pun artikel, madahka chara sida sebilik udah bulih penguntung. Ku iya madahka: “Ba raban gempuru kami ti baru, bala anak kami udah nyadi matang agi sereta majak semak enggau Jehovah. Pengudah beberapa bulan, anak indu kami bisi begian ba gempuru tengan minggu, lalu anak lelaki kami nyadi penginjil ke bedau dibaptisa.”

Tang baka ni enti ketegal situasi nuan, nuan enda ulih pindah ngagai endur ke begunaka mayuh agi penginjil? Nuan ulih ngasuh raban gempuru nuan ti lama berasai baka baru enggau ngereja sekeda cadangan ke dipadah dalam artikel tu. Seraya nuan bepanggai ba Jehovah, terus meh kisuk ba raban gempuru nuan. Nuan ulih nginjil enggau bala menyadi bukai ba raban gempuru, ngiga kaban ti baru, tauka ngelala bala kaban nuan enggau manah agi. Nuan mega engka ulih meri bantu ti praktikal ngagai sida ke baru tauka sida ke begunaka tulung. Ketegal pengerindu nya tanda orang Kristian ti bendar, lebuh nuan nulung orang bukai, nya deka nulung nuan semak agi enggau Jehovah. (Jhn. 13:35) Lalu nuan ulih andal, “Petara lantang ati enggau pemeri ke baka nya.”—Heb. 13:16.

Taja pan napi mayuh cabaran, tang mayuh menyadi Kristian udah mujur pindah ngagai raban gempuru ti baru. Lalu nuan mega ulih mujur! Ku Anne-Lise madahka: “Ketegal aku udah pindah ngagai raban gempuru ti baru, tu udah nulung aku nukangka ati aku enggau besai agi.” Ku Kazumi madahka: “Lebuh nuan pindah ngagai raban gempuru ti baru, nuan ulih ngasaika sukung ari Jehovah enggau chara ti enda kala diasaika nuan.” Lalu baka ni enggau Jules? Iya madahka: “Bala kaban aku nulung aku berasai nyamai agi begulai enggau bala menyadi. Diatu, aku ngasaika diri sebagi ari raban gempuru aku ti baru, nyentukka aku tusah deka ninggalka sida.”