1. Nama kebuah kitai begunaka iring ari Jehovah? Padahka siti chunto.

 GAMBARKA nuan tesat ba utan. Ba dia, bisi mayuh jelu liar, indu utai, enggau utai tumbuh ti berachun. Nuan mega engka ulih labuh ngagai lubang. Tang, enti bisi orang ke nemu utan nya enggau manah, lalu ulih ngiring nuan, nuan tentu berasai nyamai agi. Iya nemu dini endur ti bahaya, lalu nulung nuan nyeliahka nya. Dunya tu tau disemaka baka utan nya. Bisi mayuh utai ti bahaya ke ulih ngerusak kaul kitai enggau Jehovah. Tang, kitai bisi Jehovah, ke ulih ngiring kitai. Iya nulung kitai nyeliahka utai ti bahaya ngambika kitai ulih terus ba jalai ti nuju ngagai pengidup ti meruan belama iya ba dunya baru.

2. Baka ni Jehovah ngiring kitai?

² Baka ni Jehovah ngiring kitai? Keterubah iya, Iya ngiring kitai nengah Bup Kudus. Iya mega ngena mensia ngiring kitai. Ambika chunto, Iya ngena “ulun ke tetap ati sereta bepenemu-dalam” nyediaka utai ti negapka pengarap kitai, ke ulih nulung kitai ngaga pemutus ti manah. (Mat. 24:45) Iya mega ngena bala menyadi lelaki ti tau dikearapka, baka bala tuai ti ngabas enggau bala tuai gempuru. Jehovah ngena sida meransang kitai sereta meri iring ke ulih nulung kitai tan napi situasi ti tusah. Kitai amat beterima kasih laban kitai bisi iring ti tau dikearapka ba hari ti penudi tu. Enggau nya, kitai ulih terus nyadi kaban Jehovah, lalu ngembuan pengidup ti lantang, ukai aja diatu, tang mega ba jemah ila.

3. Nama utai ti deka dikerandauka kitai dalam artikel tu?

³ Tang kekadang, kitai engka tusah deka nitihka iring ari Jehovah, kelebih agi enti iring nya datai ari mensia ti enda sempurna. Nama kebuah? Kitai engka enda rindu enggau iring ke diberi sida. Tauka, kitai engka ngasaika iring ke diberi sida nya enda masuk akal, lalu kitai ngumbai iring nya tentu ukai ari Jehovah.  Ba maya nya meh kitai patut andal, Jehovah ke ngiring bala nembiak Iya. Lalu enti kitai nitihka iring nya, tu deka mai penguntung ngagai kitai. Kena nulung kitai ngereja nya, artikel tu deka berandauka (1) baka ni Jehovah ngiring bala nembiak Iya kelia menya, (2) baka ni Iya ngiring kitai kemayaharitu, sereta (3) nama penguntung ke diulih kitai enti kitai seruran nitihka iring Iya.

BAKA NI JEHOVAH NGIRING ORANG ISRAEL?

4-5. Baka ni Jehovah nunjukka Iya ngena Moses ngiring orang Israel? (Peda gambar.)

⁴ Jehovah milih Moses kena ngiring orang Israel pansut ari menua Ejip. Lalu, Iya mega meri bukti kena nunjukka Iya benung ngiring sida nengah Moses. Ambika chunto, Iya nyediaka tiang remang maya siang hari enggau tiang api maya malam hari. (P-sut. 13:21) Moses nitihka tiang nya, lalu tiang nya mai semua sida ngagai Tasik Mirah. Tang lebuh orang Israel meda bala soldadu orang Ejip begagaika sida, sida nyadi amat takut. Sida ngumbai bala soldadu orang Ejip deka munuh sida. Sida nyalahka Moses laban udah mai sida ngagai Tasik Mirah. Tang, utai ke dikereja Moses enda salah. Jehovah ke udah ngena Moses ngiring sida kia. (P-sut. 14:2) Udah nya, Jehovah nyelamatka sida enggau chara ti ngalitka ati.​—P-sut. 14:​26-28.

⁵ Pengelama 40 taun pengudah nya, Moses terus nitihka tiang remang nya, laban iya andal Jehovah ngena tiang nya ngiring nembiak Iya ba menua puang. a Ba siti timpuh, Jehovah ngengkah tiang nya ba atas langkau kain Moses. Enggau nya, semua orang Israel ulih meda tiang nya. (P-sut. 33:​7, 9, 10) Ari tiang nya, Jehovah bejaku enggau Moses. Lalu udah nya, Moses madahka pesan Jehovah ngagai orang Israel. (Mas. 99:7) Amat, orang Israel ulih meda enggau terang, Jehovah ngena Moses ngiring sida.

6. Kati orang Israel nerima iring ari Jehovah? Terangka. (Penyampau 14:​2, 10, 11)

⁶ Sayau amat, mayuh orang Israel enggai nerima Moses nya pengari Jehovah, taja pan bisi bukti ti terang. (Bacha Penyampau 14:​2, 10, 11.) Sida bekali-kali enggai ngaku Jehovah benung ngena Moses ngiring sida. Ketegal nya, Jehovah enda ngemendarka sida tama ngagai Menua ti Udah Disemaya.​—P-pau. 14:30.

7. Padahka chunto sida ke ngasika iring ari Jehovah. (Penyampau 14:24) (Peda mega gambar.)

⁷ Taja pia, bisi sekeda orang Israel ke ngasika iring Jehovah. Ambika chunto, Jehovah madahka: “Kalep, . . . seruran ngasika Aku enggau pengabis ati.” (Bacha Penyampau 14:24.) Jehovah merekatka Kalep. Iya indah ngemendarka Kalep milih endur ti dikedekaka iya ba menua Kanaan. (Jos. 14:​12-14) Orang Israel ke dikemendarka tama ngagai Menua ti Udah Disemaya mega netapka teladan ti manah bekaul enggau ngasika iring Jehovah. Lebuh Josua nganti Moses nyadi tuai orang Israel, Bup Kudus madahka: “Ba sepemanjai idup Josua, semua orang Israel amat bebasaka iya.” (Jos. 4:14) Nya meh kebuah iya, Jehovah merekatka sida, lalu mai sida tama ngagai Menua ti Udah Disemaya.​—Jos. 21:​43, 44.

8. Baka ni Jehovah ngiring bala nembiak Iya maya jeman bala raja? Terangka. (Peda mega gambar.)

⁸ Betaun-taun udah nya, Jehovah milih bala hakim kena ngiring bala nembiak Iya. Pengudah nya, maya jeman bala raja, Jehovah milih bala nabi kena ngiring bala nembiak Iya. Bala raja ti tetap ati nitihka jaku lalau ari bala nabi.  Ambika chunto, Raja David enggau baruh ati nerima lalau ari Nabi Natan. (2 Sam. 12:​7, 13; 1 Ban. 17:​3, 4) Raja Jehosapat nitihka iring ari Nabi Jahasil, lalu meransang orang Judah “arapka utai ti disebut sida nabi [Petara].” (2 Ban. 20:​14, 15, 20) Lebuh Raja Hesekiah napi penusah, iya minta tulung ari Nabi Isaiah. (Isa. 37:​1-6) Tiap kali bala raja nitihka iring ari Jehovah, Iya merekatka sida sereta nyaga bala nembiak Iya. (2 Ban. 20:​29, 30; 32:22) Kebendar iya, semua orang patut ulih meda enggau terang, Jehovah benung ngena bala nabi ngiring bala nembiak Iya. Taja pia, mayuh bala raja sereta orang Israel enggai mendingka bala nabi Jehovah.​—Jer. 35:​12-15.

BAKA NI JEHOVAH NGIRING ORANG KRISTIAN BA ABAD KETERUBAH?

9. Sapa ke dikena Jehovah ngiring orang Kristian ba abad keterubah? (Peda mega gambar.)

⁹ Ba Pentikos 33 M., Jehovah numbuhka raban gempuru Kristian. Baka ni Iya ngiring orang Kristian ba maya nya? Iya milih Jesus nyadi kepala raban gempuru. (Eps. 5:23) Tang, Jesus enda bejaku ngagai tiap iku murid kena madahka utai ke patut dikereja sida. Iya ngena bala rasul enggau bala tuai gempuru ba Jerusalem kena ngiring sida. (SKR. 15:​1, 2) Pia mega, bala tuai gempuru dipilih kena ngiring raban gempuru.—1 Tes. 5:12; Tit. 1:5.

10. (a) Kati orang Kristian ba abad keterubah deka nitihka iring ke diterima sida? Terangka. (Surat Kereja Rasul 15:​30, 31) (b) Nama kebuah sekeda ari sida enggai nerima orang ke dikena Jehovah ngiring sida? (Peda kutak “ Nama Kebuah Sekeda Enggai Nerima Bukti ti Terang?”)

¹⁰ Kati orang Kristian ba abad keterubah deka nitihka iring ke diterima sida? Au. Mayuh ari sida gaga ati nitihka iring. Kebendar iya, “sida gaga ati lebuh ninga jaku peransang” ke diterima sida. (Bacha Surat Kereja Rasul 15:​30, 31.) Tang, baka ni Jehovah ngiring bala nembiak Iya kemayaharitu?

BAKA NI JEHOVAH NGIRING KITAI KEMAYAHARITU?

11. Beri siti chunto ke nunjukka chara Jehovah ngiring sida ke ngulu pengudah taun 1870.

¹¹ Jehovah terus ngiring bala nembiak Iya kemayaharitu. Iya ngereja nya nengah Bup Kudus enggau Anak Iya, iya nya kepala raban gempuru. Kati kitai ulih meda bukti ke nunjukka, Jehovah mega ngena mensia ba jeman kitai diatu? Au, ulih. Ambika chunto, perundingka  utai ke nyadi pengudah taun 1870. Charles Taze Russell enggau bala kaban iya berengkah faham pasal pemesai reti taun 1914 ke Perintah Petara. (Dan. 4:​25, 26) Baka ni sida nemu tu? Sida mansik jaku benabi dalam Bup Kudus, lalu pechaya jaku benabi nya deka dikeamatka. Kati Jehovah ngiring sida lebuh sida mansik Bup Kudus? Au, Jehovah tentu ngiring sida. Utai ke nyadi ba dunya kena taun 1914 nunjukka Perintah Petara udah berengkah merintah. Maya nya, Perang Dunya Kesatu berengkah. Udah nya, bisi penyakit berampit, tanah berenyang, enggau lapar pungkang. (Luk. 21:​10, 11) Endang amat, Jehovah ngena bala lelaki ti tetap ati nya ngambika nulung bala nembiak Iya.

12-13. Nama utai ti dikereja bala menyadi lelaki ti betanggungjawap maya Perang Dunya Kedua kena ngemansangka agi pengawa nginjil?

¹² Peratika mega utai ke nyadi maya Perang Dunya Kedua. Bala menyadi lelaki ti betanggungjawap ba indu opis mansik Pemandang 17:8. Ari utai ti dipansik, sida faham Perang Dunya Kedua enda nuju ngagai Perang Armagedon. Nyadi, sida nemu, siti timpuh pemaik deka datai pengudah perang nya. Maya nya, Saksi-Saksi Jehovah ulih nginjil ngagai mayuh agi orang. Nya alai, taja pan maya nya utai tu baka ke enda masuk akal, tang gerempung Jehovah numbuhka Kolej Gilead Watch Tower. b Sekula tu deka ngelatih bala pengerintis ke dianjung ngagai menua bukai ngambika ulih nginjil sereta ngajar ba serata dunya. Bala pengerintis tu indah dianjung maya perang nya nyadi. Nambahka nya, ulun ke tetap ati numbuhka Kursus Kereja Teokratik c ba semua raban gempuru ngambika ulih nulung semua penginjil nginjil sereta ngajar enggau manah agi. Enggau chara tu, nembiak Petara disikap ngereja pengawa nginjil.

¹³ Diatu, kitai ulih meda enggau terang Jehovah bisi ngiring bala nembiak Iya ba maya ti tusah nya. Kenyau ari Perang Dunya Kedua, nembiak Jehovah udah nginjil enggau bibas ba mayuh menua. Kebendar iya, pengawa tu benung mai asil ti besai. Mayuh orang udah ngelala Jehovah, lalu bala nembiak Iya benung nginjil ba serata dunya.

14. Nama kebuah kitai ulih arapka iring ke datai ari gerempung Jehovah sereta ari bala tuai gempuru? (Pemandang 2:1) (Peda mega gambar.)

 ¹⁴ Kemayaharitu, Raban ti Ngiring terus bepanggai ba iring ari Jesus. Sida dekaka iring ke diberi sida ngagai bala menyadi Kristian mandangka runding Jehovah enggau Jesus. Lalu, sida ngena bala tuai ti ngabas enggau bala tuai gempuru meri iring ngagai raban gempuru. d Semua tuai gempuru dalam “jari kanan” Kristus, enda ngira sekalika sida dipilih ngagai serega tauka enda. (Bacha Pemandang 2:1.) Endang amat, semua tuai gempuru enda sempurna sereta ngaga penyalah. Moses, Josua, enggau bala rasul mega kekadang ngaga penyalah. (P-pau. 20:12; Jos. 9:​14, 15; Rom. 3:23) Taja pia, kitai ulih meda enggau terang, Jesus benung ngiring ulun ke tetap ati sereta bala tuai gempuru, lalu iya deka terus ngereja nya “nyentuk ngagai pengujung dunya.” (Mat. 28:20) Nya alai, kitai ulih pechaya sereta yakin ngagai iring ke diterima ari sida ke dipilih ngulu kitai.

KITAI BULIH PENGUNTUNG LEBUH KITAI TERUS NITIHKA IRING ARI JEHOVAH

15-16. Nama ulih dipelajarka nuan ari pengalaman sida ke nitihka iring ari Jehovah?

¹⁵ Lebuh kitai terus nitihka iring ari Jehovah, kitai bulih penguntung indah diatu. Peratika teladan Andy enggau Rose. e Seduai iya nitihka jaku lalau ari ulun ti tetap ati, lalu idup enggau sederhana. (Heb. 13:5) Asil iya, seduai iya ulih nulung ba projek nirika bengunan teokratik. Ku Rose madahka: “Kekadang, kami diau ba endur ti mit. Kesuah iya, ba endur ke baka nya, nadai dapur. Lalu, aku patut nyual mayuh perengka ke dikena aku ngambi gambar, taja pan nya hobi ti dikerinduka aku. Aku nyabak lebuh aku nyual perengka-perengka nya. Tang baka bini Abraham, Sarah, aku enggai tusah ati enggau utai ti udah dilengkaka aku, tang aku deka gaga ati enggau utai ke ulih dikereja aku diatu ke Jehovah.” (Heb. 11:15) Nama penguntung ke diulih Andy enggau Rose? Ku Rose: “Kami amat gaga ati laban kami nemu, kami benung meri Jehovah semua utai ke dikemisi kami. Lebuh kami duai ngereja pengawa teokratik, kami ulih ngambarka baka ni gaya pengidup ba dunya baru.” Andy mega setuju. Iya madah: “Kami amat gaga ati laban kami meri semua awak enggau pengering kami kena nyukung Perintah Petara.”

 ¹⁶ Nama penguntung ke bukai ke deka diulih kitai lebuh kitai terus nitihka iring Jehovah? Peratika pengalaman Marcia. Pengudah abis sekula menengah, Marcia keran deka nitihka nasihat ke diterima ari gerempung Jehovah, lalu nyadi pengerintis. (Mat. 6:33; Rom. 12:11) Ku iya madahka: “Aku nerima tawaran biasiswa pengelama empat taun ngambika ulih belajar ba universiti. Tang, aku deka ngereja mayuh agi ke Jehovah. Nyadi, aku nulak tawaran nya, lalu milih belajarka siti pengelandik ke deka nulung aku ngulihka chukup duit ngambika ulih ngerintis. Nya meh pemutus ti pemadu manah ke digaga aku. Aku diatu gaga ati nyadi pengerintis biasa. Ketegal jadual kereja aku fleksibel, aku ulih nulung ba Bethel, sereta ngereja mayuh agi pengawa ke bukai ke Jehovah.”

17. Nama penguntung ke bukai lebuh kitai terus nitihka iring ari Jehovah? (Isaiah 48:​17, 18)

¹⁷ Kekadang, kitai nerima jaku lalau ari gerempung kitai ke deka nyaga kitai. Ambika chunto, kitai ditangkan ngambika enda rinduka duit sereta enda ngereja utai ke ulih ngujungka kitai ngelanggar adat Jehovah. Enti kitai nitihka iring ke baka nya, kitai tentu bulih penguntung. Kitai ulih ngetanka ati ti beresi sereta nyeliahka mayuh penanggul. (1 Tim. 6:​9, 10) Asil iya, kitai ulih nyembah Jehovah enggau pengabis ati. Tu deka meri kitai pengaga ati sereta pengelantang.​—Bacha Isaiah 48:​17, 18.

18. Nama kebuah nuan keran deka terus nitihka iring ari Jehovah?

¹⁸ Endang amat, Jehovah deka terus ngena mensia meri iring maya Penusah ti Besai nyentuk ngagai Seribu Taun Kristus Merintah. (Mas. 45:16) Kati kitai deka terus nitihka iring nya, taja pan ba maya nya, kitai engka bisi pengingin deka nitihka chara bukai? Kitai deka senang agi nitihka iring Jehovah ba maya nya, enti kitai nitihka iring Jehovah ari diatu. Nya alai, aram meh kitai terus nitihka iring ari Jehovah, nyengkaum iring ke datai ari bala menyadi lelaki ke dipilih kena ngulu kitai. (Isa. 32:​1, 2; Heb. 13:17) Kitai ulih andal enggau pengabis ati ngagai Jehovah ke ngiring kitai, laban Iya deka nulung kitai nyeliah ari sebarang utai ke ulih ngachau kaul kitai enggau Iya, sereta ngiring kitai ngagai pengidup ti meruan belama iya ba dunya baru.