Lebuh Moses ba Bukit Sinai, Jehovah ngasuh iya ngaga siti langkau ke dikumbai langkau sembiang, endur orang Israel ulih nyembah Iya. Sida ulih ngangkat langkau sembiang nya lebuh mindah ngagai endur bukai.

Ku Jehovah: ‘Asuh orang Israel meri sebarang utai ke ulih diberi sida kena ngaga langkau sembiang.’ Orang Israel meri emas, pirak, batu ti berega enggau barang kemas. Sida mega meri bulu bedus, kain linin, kulit jelu enggau mayuh agi utai bukai. Sida amat gerah jari nyentukka Moses madah ngagai sida: ‘Chukup nya! Anang mai agi.’

Mayuh lelaki enggau indu ti landik nulung ngaga langkau sembiang. Jehovah meri sida pengelandik kena gawa. Sekeda ngulung ubung, betenun tauka nyulam. Ke bukai nyediaka batu, ngaga perengka ngena emas tauka ngukir kayu.

Orang Israel ngaga langkau sembiang nitihka utai ke dipadah Jehovah ngagai sida. Sida ngaga tirai ti manah kena nyerara langkau sembiang ngagai dua begian, iya nya Endur ti Kudus enggau Endur ti Pemadu Kudus. Ba Endur ti Pemadu Kudus bisi peti lampang batu adat ke digaga ngena kayu akasia enggau emas. Ba Endur ti Kudus bisi penuduk lampu emas, siti mija enggau alta kena nunu menyan. Ba tengah laman bisi siti bisin enggau alta ti besai. Peti lampang batu adat ngingatka orang Israel pasal semaya sida ke deka ngasika Jehovah.

 Jehovah milih Aron enggau bala anak lelaki iya bekereja nyadi imam ba langkau sembiang. Sida patut nyaga langkau sembiang sereta meri pemeri ngagai Jehovah. Semina Aron, imam besai, ulih tama ngagai Endur ti Pemadu Kudus. Iya ngaga nya sekali setaun kena meri pemeri ke dosa iya, dosa ruang bilik iya sereta dosa semua bansa Israel.

Orang Israel nembuka langkau sembiang nya setaun pengudah sida ninggalka menua Ejip. Diatu sida bisi endur nyembah Jehovah.

Jehovah nunjukka Iya gaga ati enggau langkau sembiang nya lalu ngengkahka remang ba atas nya. Seagi-agi remang nya bisi ayan ba atas langkau sembiang, orang Israel enda mindah ari endur nya. Tang lebuh remang mindah ari langkau sembiang, sida nemu nya maya sida patut mindah. Sida muka langkau sembiang lalu nitihka remang nya.