Pemandai Petara jauh tinggi agi ari pemandai kitai. Iya ngintu kitai baka Apai ti rinduka anak iya. Ukai tuju Iya ngelak mensia limpang ari Iya. (Jeremiah 10:23) Nya alai baka anak mit ti begunaka tunjuk ajar apai indai iya, kitai semua mega begunaka tunjuk ajar ari Petara. (Isaiah 48:​17, 18) Tunjuk ajar ari Bup Kudus nya siti pemeri Petara.​—Bacha 2 Timoti 3:16.

Adat enggau tunjuk ajar Jehovah ngajar kitai chara idup ti pengabis manah diatu lalu nunjukka chara bulih pemaik ti meruan jemah ila. Laban kitai ditempa Petara, kitai patut beterima kasih lalu nitihka tunjuk ajar Iya.​—Bacha Masmur 19:​7, 11; Pemandang 4:11.

Jaku ajar Bup Kudus tu pun pemendar. Jaku ajar Bup Kudus ulih ngajar kitai ba mayuh pekara. Tang, adat selalu dikena ngatur siti-siti pekara. (Ulang Adat 22:8) Kitai patut ngena pemintar runding kena meretika jaku ajar Bup Kudus dalam ngatur siti-siti pekara. (Jaku Dalam 2:​10-12) Ngambika chunto, Bup Kudus madahka nyawa nya pemeri Petara. Jaku ajar tu ulih ngiring runding nuan maya nuan kereja, ba alai diau tauka maya mindah. Jaku tu ngasuh kitai berundingka pengelikun diri empu enggau orang bukai.​—Bacha Kereja Rasul 17:28.

Jesus bisi madahka dua iti jaku ajar ti beguna bendar. Keterubah nya iya madahka tuju  pengidup mensia, iya nya ngelala Petara, rinduka Iya sereta nyembah Iya enggau taluk. Jaku ajar ti keterubah tu patut dirunding kitai lebuh ngaga semua pemutus dalam idup kitai. (Jaku Dalam 3:6) Sida ti nitihka jaku ajar tu deka nyadi pangan Petara, bulih pengelantang ti bendar enggau pengidup ti meruan.​—Bacha Matthew 22:​36-38.

Jaku ajar ti kedua ngiring kitai ngambika kitai ulih begulai manah enggau orang bukai. (1 Korint 13:​4-7) Enti kitai deka nitihka jaku ajar tu, kitai enda tau enda nitihka penyiru Petara ngagai mensia.​—Bacha Matthew 7:12; 22:​39, 40.

Jaku ajar Bup Kudus ulih nyerakup diri sebilik ngena pengerindu. (Kolosi 3:​12-14) Jaku Petara mega bisi jaku ajar bukai ti nyaga diri sebilik, ti ngasuh tikah nya meruan belama-lama.​—Bacha Pemungkal 2:24.

Enti kitai nitihka ajar Bup Kudus, kitai ulih nyaga pemisi enggau pengelikun ati kitai. Ngambika chunto, orang ka agi ngaji orang ke nitih jaku ajar Bup Kudus ti ngasuh orang lurus ati sereta gawa enggau bendar. (Jaku Dalam 10:​4, 26; Hebrew 13:18) Jaku Petara mega ngajar kitai patut puas ati enggau pemisi kitai. Kitai mega patut rinduka Petara lebih agi ari reta.​—Bacha Matthew 6:​24, 25, 33; 1 Timoti 6:​8-10.

Enti kitai nitihka jaku ajar Bup Kudus, iya ulih nyaga pengerai kitai. (Jaku Dalam 14:30; 22:​24, 25) Ngambika chunto, jaku Petara nagang kitai mabuk. Tu ulih nyaga kitai ari penyakit ti ulih munuh tauka ari bebadi. (Jaku Dalam 23:20) Petara enda nagang kitai ngirup ai bisa, tang anang ngirup kelalu mayuh. (Masmur 104:15; 1 Korint 6:10) Jaku Petara mega ngajar kitai nyaga ulah enggau runding kitai. (Masmur 119:​97-100) Tang, Kristian ti bendar ukai ngasika Jaku Petara semina deka ngulihka penguntung diri empu. Sida ngasi laban sida bebasaka Petara.​—Bacha Matthew 5:​14-16.