Pemansut 6:1-30
6 Nyadi, Jehovah bejaku ngagai Moses: “Diatu, nuan deka meda utai ke deka digaga Aku ngagai Firaun. Ngena kuasa Aku, Aku deka maksa iya ngasuh kita mupuk. Lalu pengudah iya meda kuasa Aku, iya deka ngasuh kita pansut ari menua iya.”
2 Udah nya, Petara bejaku ngagai Moses: “Aku tu Jehovah.
3 Aku kala ngayanka Diri nyadi Petara ti Pemadu Bekuasa ngagai Abraham, Isak, enggau Jakop. Tang bekaul enggau nama Aku, Jehovah, Aku nadai madahka sida reti nama nya.*
4 Aku mega udah ngaga sempekat enggau sida deka meri sida menua Kanaan. Suba, sida diau ba dia nyadi orang asing.
5 Aku udah ninga sebana orang Israel ke nyadi ulun orang Ejip. Aku ingatka sempekat Aku.
6 “Nya alai, padahka tu ngagai orang Israel: ‘Aku tu Jehovah. Aku deka ngelepaska kita ari nyadi ulun orang Ejip, sereta nyelamatka kita ngambika sida enda agi maksa kita gawa. Aku deka nyelamatka kita ngena lengan Aku ti bekuasa, lalu Aku deka ngukum sida enggau balat.
7 Kita deka nyadi nembiak Aku, lalu Aku deka nyadi Petara kita. Kita deka nemu, Aku tu meh Petara kita, Jehovah, ke ngelepaska kita ari nyadi ulun orang Ejip.
8 Aku deka mai kita ngagai menua ke udah disemayaka Aku, ke deka diberi Aku ngagai Abraham, Isak, enggau Jakop. Aku deka meri menua nya nyadika pesaka kita. Aku tu meh Jehovah.’”
9 Udah nya, Moses madahka pesan nya ngagai orang Israel. Tang sida enggai mendingka Moses, laban sida asa ati ketegal dipaksa nyadi ulun enggau chara ti amat jai.
10 Jehovah lalu bejaku ngagai Moses:
11 “Alai nuan mansang betemu enggau Firaun, raja Ejip nya. Padah ngagai iya, iya mesti ngemendarka orang Israel pansut ari menua iya.”
12 Tang ku Moses nyaut Jehovah: “Orang Israel empu deh enggai mendingka aku. Baka ni ku Firaun ka mendingka aku deh? Aku bejaku pan enda lanchar.”
13 Sekali agi, Jehovah madah ngagai Moses enggau Aron pasal pesan ke patut dipadahka seduai iya ngagai orang Israel enggau Firaun, raja Ejip nya, ngambika orang Israel ulih pansut ari menua Ejip.
14 Tu meh nama bala tuai suku raban bansa Israel: Hanok, Pallu, Hesron, enggau Karmi. Sida tu meh peturun Reuben, lalu sida mega anak lelaki Reuben. Reuben nya anak tuai Israel.
15 Tu meh nama anak lelaki Simion: Jemuel, Jamin, Ohat, Jachin, Sohar, enggau Shaul. Shaul nya anak siku indu orang Kanaan. Sida tu meh peturun Simion.
16 Tu meh nama bala anak lelaki Lewi nitihka suku raban bansa sida: Gerson, Kohat, enggau Merari. Lewi idup pengelama 137 taun.
17 Tu meh nama anak lelaki Gerson ke nyadi tuai ruang bilik sida empu: Libni enggau Shimei.
18 Tu meh nama bala anak lelaki Kohat: Amram, Izhar, Hebron, enggau Uziel. Kohat idup pengelama 133 taun.
19 Tu meh nama anak lelaki Merari ke nyadi tuai ruang bilik sida empu: Mahli enggau Musi.
Semua sida nya peturun Lewi.
20 Amram ngambi Jokibit, menyadi apai iya, nyadika bini iya. Jokibit ngadaka Aron enggau Moses. Amram idup pengelama 137 taun.
21 Tu meh nama anak lelaki Izhar: Korah, Nefek, enggau Sikri.
22 Tu meh nama anak lelaki Uziel: Misael, Elsapan, enggau Sitri.
23 Aron ngambi Elisheba, iya nya anak indu Aminadap, nyadika bini iya. Elisheba nya menyadi indu Nason. Elisheba ngadaka Nadap, Abihu, Eleasar, enggau Itamar.
24 Tu meh nama anak lelaki Korah: Asir, Elkanah, enggau Abiasap. Sida nya meh peturun Korah.
25 Eleasar, iya nya anak lelaki Aron, ngambi siku ari anak indu Putiel nyadika bini iya. Bini iya ngadaka Pinehas.
Semua sida nya peturun Lewi, lalu sida iya mega tuai ruang bilik diri empu.
26 Nya meh tusut peturun Aron enggau Moses. Ku Jehovah bejaku ngagai seduai iya: “Bai orang Israel pansut ari Ejip nitihka raban.”*
27 Moses enggau Aron meh ke bejaku enggau Firaun, raja Ejip nya, ngambika ulih mai orang Israel pansut ari menua Ejip.
28 Lebuh Jehovah bejaku enggau Moses ba menua Ejip,
29 Jehovah madah ngagai Moses: “Aku tu Jehovah. Padah ngagai Firaun, raja Ejip nya, semua utai ke dipadahka Aku ngagai nuan.”
30 Udah nya, Moses bejaku ngagai Jehovah: “Aku tu enda lanchar bejaku. Baka ni ku Firaun deka mendingka aku deh?”
