Satu Peter 1:1-25
1 Aku, Peter, ke nyadi rasul Jesus Kristus, nulis surat tu ngagai orang ke diau enda lama ba dunya tu, iya nya sida ke dipilih Petara ke ngachir ba serata Pontus, Galatia, Kapadosia, Asia,* enggau Bitinia.
2 Kita udah dipilih nitihka utai ke udah ditemu Petara ti Apai kitai. Nengah kuasa kudus,* kita udah nyadi tuchi ngambika kita ngasi sereta dipechik ngena darah Jesus Kristus:
Ngarapka semua kita bulih mayuh agi pemanah ati ti besai sereta pengelantang.
3 Beri puji meh ngagai Petara sereta Apai Tuan kitai Jesus Kristus. Ketegal pengasih Iya ti besai, Iya ngasuh kitai diadaka baru. Nya alai, nengah pengangkat Jesus Kristus ari mati, kitai bisi utai ke ulih dianti kitai enggau andal ke meruan belama iya.
4 Kitai mega nerima pesaka ke enda ulih reput,* ke tuchi, sereta ke tan belama iya. Pesaka tu disimpan ba serega ke kita
5 ke dijaga kuasa Petara ketegal kita arap. Petara nyaga kita ngambika kita nerima pengelepas ke deka dipandangka ba timpuh ti penudi.
6 Ketegal nya, kita balat gaga ati taja pan kita patut merinsa enda lama laban napi bemacham penguji.
7 Utai tu nyadi ngambika pengarap kita ke udah diuji* ngasuh kita nerima puji, mulia, sereta basa lebuh Jesus Kristus dipandangka. Pengarap ke baka nya jauh berega agi ari emas ke ulih anchur taja pan udah diuji ngena api.
8 Taja pan kita enda kala meda Kristus, kita rinduka iya. Taja pan diatu kita enda meda iya, tang kita arapka iya sereta balat amat gaga ati, lalu pengaga ati ti besai nya enda ulih digambarka ngena leka jaku.
9 Nya ketegal kita deka bulih pengelepas laban kita arap.
10 Bala nabi ke udah madah pasal pemanah ati ti besai ke diterima kita udah mansik enggau bejimat sereta bebendar meresa pengelepas nya.
11 Sebedau nya, Petara udah madah ngagai sida nengah kuasa kudus Iya ke bisi ba sida pasal Kristus ke deka merinsa, lalu udah nya deka dimuliaka. Nya alai, sida terus mansik pasal utai ke deka nyadi ngagai Kristus sereta ni maya utai nya deka nyadi.
12 Petara ngasuh bala nabi sedar sida ukai ngereja utai ke diri empu, tang ke kita. Bala nabi udah nulis pasal utai ke ditusui ngagai kita, ke didinga kita ari orang ke nusui Berita Manah ngagai kita ngena bantu kuasa kudus ke datai ari serega. Bala melikat pan bebendar deka meretika utai nya.
13 Nya alai, sediaka runding kita kena ngereja pengawa enggau bebendar. Jaga meh runding kita enggau pengabis iya. Arapka meh ngagai pemanah ati ti besai ke deka diterima kita lebuh Jesus Kristus dipandangka.
14 Suba, lebuh kita nadai penemu pasal Petara, kita ngereja utai nitihka pengingin ti salah. Badu agi ngereja nya laban diatu kita nyadi anak Petara ke ngasika Iya.
15 Tang, baka Petara ti kudus ke ngangauka kita, kita patut kudus baka Iya dalam semua ulah kita,
16 laban Bup Kudus madahka: “Kita patut kudus, laban Aku kudus.”
17 Apai enda berat sepiak lebuh ngakim tiap iku orang nitihka pengawa sida siku-siku. Nya alai, enti kita ngangauka Iya, tentuka ulah kita diseretaka enggau ati ti nangika Petara lebuh kita nyadi orang ke diau ba dunya tu enda lama.
18 Kita udah dilepaska* ari jalai pengidup ke nadai guna ke diulih kita ari aki ini* kita, lalu kita nemu utai ke ngelepaska kita ukai utai ke ulih reput, ukai pirak tauka emas.
19 Tang kita udah dilepaska ngena darah Kristus ke berega. Darah iya baka darah anak bedus ke nadai penimpang sereta tuchi.
20 Amat, sebedau penumbuh dunya,* Petara endang udah milih iya. Tang iya udah mandangka diri ba pengujung jeman tu ketegal kita.
21 Nengah iya, kita pechayaka Petara ke udah ngidupka iya baru ari mati lalu ke meri iya mulia, ngambika kita arap sereta andalka Petara.
22 Ketegal kita ngasika pemendar, kita udah ngasuh diri nyadi tuchi, lalu nya ngasuh kita enda pura-pura rinduka pangan diri baka diri menyadi. Nya alai, enggau bebendar meh rinduka pangan diri ari ati.
23 Nengah jaku Petara ti idup sereta meruan belama iya, kita udah diadaka baru, ukai ari benih ke ulih reput, tang ari benih* ke enda ulih reput.
24 Nya ketegal “semua mensia baka rumput, lalu mulia sida baka bungai ba padang. Rumput deka layu, lalu bungai deka gugur.
25 Tang jaku Jehovah* deka meruan belama iya.” “Jaku” tu meh Berita Manah ke ditusui ngagai kita.
Nota Kaki
^ Peda Penerang Leka Jaku.
^ Tauka “luluh.”
^ Tauka “digaga nyadi tulin.”
^ Jaku Asal, “ditebus.”
^ Tauka “adat.”
^ Iya nya, sebedau anak Adam seduai Awa ada.
^ Iya nya, benih ke ulih meri pengidup ti baru.
^ Peda nota kaki ba Matthew 1:20.
