Kain, anak tuai Adam enggau Awa. Iya jadi enggau seiku ari menyadi indu iya empu. Fakta tu diambi ari cherita Bup Kudus pasal Kain enggau sida sebilik.

Fakta pasal Kain enggau sida sebilik

•   Semua mensia datai ari peturun Adam sereta Awa. “Iya udah ngaga semua bansa ari siku orang [Adam], lalu Iya ngasuh sida diau di serata dunya.” (Kereja Rasul 17:26) Bini Adam iya nya Awa, nyadi “indai semua mensia.” (Pemungkal 3:20) Nya kebuah, kitai ulih pechaya Kain jadi enggau seiku ari peturun Adam sereta Awa.

•   Kain enggau menyadi iya Abel, ngembuan diri menyadi ke bukai, ti diadaka Awa. (Pemungkal 4:1, 2) Maya Kain diburu ketegal munuh Abel, iya madah, “Barang sapa tetemuka aku, deka munuh aku.” (Pemungkal 4:14) Kain takutka sapa? Bup Kudus bisi madahka, Adam “bisi anak ti bukai.” (Pemungkal 5:4) Tu nunjukka, peturun Adam sereta Awa ke bukai engka ulih ngemedis Kain.

•   Ba pun sejarah mensia, jadi enggau diri menyadi nya dikemendarka. Ngambika chunto, seiku lelaki ke tetap ati ke benama Abraham, jadi enggau menyadi ambu iya. (Pemungkal 20:12) Beratus taun udah nya, baru meh bisi ukum ti nagang tikah ba entara diri menyadi. Tu nitihka ukum Moses. (Adat Lewi 18:9, 12, 13) Maya tu suba, anak ke diadaka asil ari tikah ke datai ari diri menyadi tauka kaban belayan ke semak, kurang agi bulih penimpang ba pendiau dibandingka enggau kitai kemayaharitu.

•   Nitihka Bup Kudus, cherita pasal Adam sereta Awa enggau sida sebilik nya sejarah ti betul. Tiris peturun Adam ke ditulis Moses enggau silik ukai semina ditulis ba bup Pemungkal, pia mega ditulis pakar sejarah baka Esra enggau Luke. (Pemungkal 5:3-5; 1 Bansa Israel 1:1-4; Luke 3:38) Bala penulis Bup Kudus nulis cherita Kain, nyadika siti ari sejarah utai ke nyadi.—Hebrew 11:4; 1 John 3:12; Jude 11.